وآهني :- من تاب لله من ذنوبه / وأناب ..زهد بـ ( دنياً ) .. مساوي كثرها / قلّها

حاسبت نفسي وضاقت بي وساع الرحاب = كثرت خطاياي مدري كيف ابا اقلّها !
جاهرت بـ.. ذنوبي اللي كنهّن الهضاب = وقصّرت في واجبات ٍ كنت فاطن لها
تبعت درب الخطاء وآخطيت درب الصواب = اتبع هوى نفسي اللي غيّ ارضاً لها
يالله .. وانت المجيب اللي مادونك حجاب = تقدر تعز النفوس .. وتقدر تذلّها
يامحيي الارض بأمرك من حقوق السحاب = اعوذ بك .. من ذنوب ٍ عاتقي ملّها
واعوذ من دعوة ٍ تدعى ولا تستجاب = ومن كلمة ٍ مادريت ابها وانا ازلّها

كم واحد ٍ يطرد آمال ٍ سوات السراب = شي ٍ يبي ياصله وأشياءً ماياصلّها
يجمع حطام ٍ .. مصيره للفنا والذهاب = ومن الطمع عنده ان الارض يحتلّها
اغرته بنت الهوى والقلب الاقشر شباب = وانساق معها وهي ما احد ٍ خليلٍ لها
ماحث رجله على درب الاجر والثواب = اسحرته المغريات وصار .. عبد ٍلها
في غفلته كم رقد واصبح وودّا وجاب = اظله ابليس .. مع ناس ٍ قد اظلها
يشعب ركابه مع اللي يشعبون الركاب = نسى ان الايام شجره زايل ٍ ظلها
لابد من ساعة ٍ مابعدها الا المآب = الله ما يهمل عباده .. اليا امهلّها

منشى البنادم تراب .. ومرجعه لـ..التراب = والروح أمانه على من هو وديع ٍ لها
اليوم صفحه .. وعمر المودماني كتاب = مدوّن ٍ فيه .. دق اعماله وجلها
ماضايع ٍ منه حاجه .. في نهار الحساب = كل ٍ يبي يشوف مافي صفحته / كلها

كلمات / مشعان البرَّاق