ليت ابو محمد يجي ياليت/ابالقوايل

حريم ابا القوايل
ليت ابومحمد يجي ياليت= حتى يتفرج على حالي
ابا القوايل بنى له بيت= قصرن على النايف العالي
اخذت انا من النسا وخليت= وامسك ثلاثن من هبالي
ابي الطرب والكرم والصيت= من شانهن ارخص الغالي
تحويشة العمر به حطيت= ياعل ماللفقر تالي
الفرش من غالي الموكيت= والجبس من كل الاشكالي
ومطبخ رخامن به اهتميت= ولمعة ثرياته تلالي
شغل الخزف والخشب ظنيت= ماهوب يطري على البالي
وعازل وتكييفه اسبليت= ومسابح اطفال ورجالي
وجبت الحريم المسا وحطيت= في بيتنا عفشنا الغالي
سبعة لواري مع الونيت= جابوه عشرين حمالي
وياشين عجزن بهن بليت= تهاوشن عند مدخالي
تماسكن هن وانا هجيت= يالله تماكنت جوالي
ضرب المكانس مع التصويت= وارجادهن تقل زلزالي
وجر الشوش صار والتشويت= والعض واصراخهن عالي
وتسمع صياح ومعه تفليت= يالله عسى مالهن تالي
وابليس معهن يصب الزيت= ويوقد على النار بشعالي
على الغرف هوشهن وان جيت= تهاوشن لاجل مقيالي
وكلن تبيني مع المبيت= اقول له يابعد حالي
وين رحت وش جبت وش سويت= والصبح خمسمية ريالي
وبالغصب لازم يقوم الميت= وإلا تدفيّن بعقالي
وانا عن علومهن نشيت= كني مع الوقت مخيالي
كيف اعسفني بلا توقيت= بس اتبهلل تبهلالي
هن احلبني وانا دريت= يادرتن مالها تالي
لاوحيت حس المره فزيت= افز لو هو يورا لي
وان ناظرتني فانا هلِّيت= يمغصني البطن طوالي
ولا شفت انا ازوالهن سميت= اقرا التعاويذ بتفالي
ماينفع الطيب لو شميت= ماشتاق لو هي تحلوالي
صار العطر تقل ريح فليت= وهن غدن مثل عمالي
والحلو عندي غدا حلتيت= ما اميز المر والحالي
وان جيت ابشرب فانا غصيت= مقدر على حالي احتالي
إحولَّت العين وانلثيت= مقدر على القيل والقالي
بس اتنافض وانا ماخطيت= ماتبي حالي ولا فالي
من الشِّعر في شهر حتيت= ماتبي حالي ولا فالي
محدودبن تقل بسكليت= او تقل للصيد ختالي
ومن الهزل صرت لا كحيت= بالارض يطيح سروالي
وبالليل اصيف ابي لاجيت= ماتنتبه ام العيالي
وامشي على الهون لامريت= من عندها وافصخ نعالي
وازحف على البطن وان عديت= امشي على اصابعي تالي
وادخل فراشي وكني ميت= إيلا تغطيت بجلالي
وإلا ان صحت بي فانا ونيت= ومن كثر ماون يوّالي
وان طاحت ايده علي نطيت= ما داني اللمس من تالي
لي اكثر من السنه ماشويت= من عام الاول بشوالي
وابطلب الله إيلا صليت= يفكن ويلطف بحالي

اقتباس ويـاشـيـن عـجــزن بـهــن بـلـيــت تــهــاوشــن عـــنــــد مــدخــالـــي تمـاسـكـن هــــن وانــــا هـجـيــت يالله تــمـــاكـــنـــت جـــــوالــــــي ضـرب المكانـس مــع التصـويـت وارجـــادهـــن تـــقـــل زلـــزالـــي وجـر الشـوش صــار والتشـويـت والــعــض واصـراخـهــن عــالــي وتسـمـع صـيـاح ومـعــه تفـلـيـت يالله عـــســـى مــالــهــن تـــالـــي وابلـيـس معـهـن يـصـب الـزيــت ويـوقــد عـلــى الــنــار بـشـعـالـي علـى الغـرف هوشهـن وان جيـت تــهــاوشــن لاجـــــــل مـقــيــالــي وكــلــن تـبـيـنـي مــــع الـمـبـيــت اقـــــول لــــــه يــابــعــد حـــالـــي وين رحت وش جبت وش سويت والـصــبــح خـمـسـمـيـة ريــالـــي وبالـغـصـب لازم يـقــوم الـمـيــت وإلا تــــدفــــيّـــــن بـــعـــقـــالــــي وانـــا عــــن عـلـومـهـن نـشـيــت كــنــي مــــع الــوقــت مـخـيـالــي