سمحات الدروب

اختـار سمحـات الـدروب النظيفـه= اللي غسلها رايـح المـزن برشـاش
يمشونهـا قـوم النفـوس الشريفـه =اللي ضمايرهـم نقيـة كمـا الشـاش
ابيوتهـم مثـل الحصـون المنيـفـه=ما هي لطير البوم غيـران واعشـاش
وحلالهـم للضيـف دايــم مريـفـه =لو رجلهم يسرح ويضوي على مـاش
والرجـل منهـم مـا يخلـي رديفـه =إن ما ت مثله مات وان عاش له عاش
وان مات منهم رجـل عقـب خليفـه= يطعن نحور القـوم ويـرد الادبـاش
يعرف هدف روحـه ويعـرف وليفـه =ما يعرف الخونـة ولا هـو بغشـاش
وليـا رزقـه الله بعـذراء عفيـفـه= ايحطها مـا بيـن نونـه والارمـاش
ماهو علـى الخفـرات يستـل سيفـه= وان طالعوا فيـه الرياجيـل ينحـاش
حلـو النبـا سمـح المحيـا لضيفـه =ويصير لـه خـادم مسخـر وفـراش
وان مـد مـا مـدت يمينـه قصيفـه =مدت يمينـه تبهـر الخبـل والـلاش
واليا هـرج تلقـى علومـه طريفـه =ما هـو لهفـوات المناعيـر منقـاش
وان شبت النيـران مـا هـو بليفـه =في ساعة الكربـة سـواري ورشـاش
سده بعيـد ولا أحـد يعـرف غريفـه =ولا هو لعرض المكرم العرض نهـاش
والشوك في جنبـه سـوات القطيفـه=إن كان ما له بيت مامـون وافـراش
ما يرتكـي فـوق الخبـول الضعيفـه= اللـي ليـا حركتهـا قدرهـا طـاش
وان جـا نهـار كـل قـرم يعيـفـه =ما هو ليا ثارت على القـوم رمـاش
الكذب يعـرف بيـن الأجـواد زيفـه =والصدق مثل السيف صاطي وحشاش
وصحيفتة يـا طيبهـا مـن صحيفـه =ولهـا مـن العقـال كاتـب ونقـاش
حـاز المراجـل والمراجـل كليـفـه =الا على اللي كـل مـا رامهـا هـاش
وان شاف له من جانب القـوم خيفـه= تلقـاه للخيفـة مهـاجـم وبـطـاش
الصدق والمعـروف والطيـب كيفـه= ويغبش لها مع طلعة الفجـر مغبـاش
للحمـل مـا تلقـى جنوبـه صخيفـه =حوله بروق تعمـي العيـن وافـلاش
يصبر على جرحـه ويمسـح نزيفـه =طبه بشبه خير مـن طـب الاحبـاش
ولا هو كمـا سبـع سنونـه ضعيفـه =دايـم يلحسهـا وللعـظـم عــراش

تسلم يا أبا مشهور على هالقصيدة وحسن الاداء

مساء الخير ياالطيبين وش أحوالكم
أبشركم لقيت أسم الشاعر اللي كتب القصيدة
وأنا والله بالبدية ماعرفت اسمه ولاكأن موجود
يقال
ان القصيدة للشاعر الراحل
مطلق الثبيتي
الله يرحمه ويبيحه
وكل الشكر للأخ المبدع والمتألق
صاحب الصوتى العذب
المبدع/ أبو مشهور

لكم مني خالص الحب والموده
أخوكم /
راعي الفزعــــــــــــــــــــــــــــــــــــــــات

وليـا رزقـه الله بعـذراء عفيـفـه00000ايحطها مـا بيـن نونـه والارمـاش
اي والله ان من المرجله المحافظه على الزوجه ومراعاتها
وصح لسان الشاعر وتسلم يامخاوي الحرف