وانتهينا منك يالمليون مره ...

جاء لكم شاعر وحصل في مطاره=كلمةٍ وأنفاس وازوالٍ وجرة
وارتفع بالطايرة واحسن قراره=مايبي شخصٍ يسبب له مضرة
القيادة عندنا تبقى ..شعـاره=فك جيـبـك يالحصيـني لا تطره
يالخبل مقصورةٍ ماهي غمارة=بالفضاء ماهو شويرع لك تفره
ويل ويله من يصوت بالمغارة=ويل ويله مالقى منقذ يمره
ويل ويله من بذر بذرة مرارة=ويل ويله اصبحت دنياه مره
ويل ويله من قدح راس الشرارة=ويل ويله انكشف للناس ضره
ويل ويله من ظلم لو بالاشارة=ويل ويله لاغدا بالقبر صرة
ويل ويله ويل ويله بـ أنتظاره=واديٍ مالك لمقعاده يجره
جاء لنا برنامجٍ قصده تجارة=لا تعق الشعر تكفى ولاتبره
ياعرب برنامجٍ واضح دماره=التجاري انكشف هدّفه وسره
الجزالة روحت واغلق ستاره=اشهد انه للشعر دايم يضره
الشعر في ديرتي تاج الامارة=واقع المنصف لنا دايم يقره
انظلم شعارنا وشبت حرارة=قاطعوا ظالم قبل ظلمه يكره
وخبروا نجمٍ تعلى في مداره=كلنا نهتف نعم لله دره
ناصر الشعر الحقيقي في مساره=نادرٍ في هامة الموروث غرة
ان غرف جاب البداوة والحضارة=وان بدع درة تقفاها بدرة
حطم الفاشل مثل برج التجارة=وسرنا جعل الولي ناصر يسره
احترق كرتك مثل راس الزقارة=وانتهينا منك يالمليون مره