سلايل ابو خيرين

هلا مرحبا واعداد ما هل وبل رعـود=وعد النجــــوم الساريـه في نواحيها
دعاني سعد وانا على دعوته موجود =نرحب نيـــابــــه والتراحيــب نثنيها
هل سدير ومجزل وخزه وريح العود=يا فيصل ترحب بك حضرها وباديها
مادامك ولد مشعل ومشعل ولد لسعود=جزيــل القصايد فيــــك تفخــر قوافيها
فريد المعاني والقوافي درر وعــقــود=قلايـــد لاميـر العز والطيـــب نهديها
سلايل ابو خيـرين ما في الحكـايا فود= ابد ما توفيـــك القصايــــد مــعــانيــها
تربيت في ظل الشرف واشهب البارود=حويت المراجــــل كــلهـا وانت راعيها
ومن صغر سنــك ما تعرضت للمنقود=علـــوم ٍ تسرحها والاخـرى تضويـها
تفرعت من شجرة ملوك العرب والجود=تبــارك شجرة العز وســعـود مسقيها
سلاطين نجـــد وفزعة الخايف المظهود= زحـــول الرجـال اللي عريبه مجانيها
الا يا حـفــيــــد مجمل البيــرق المعقود=ابو تركي اللي عـــز نجـد وصحاريها
شهرفي سما العارض ولاحى هبوب النود=وحدّر على الصيــــــــده ودمّى ثناديـها
كسر ما انكسر والسيــف في قبضته مجرود=وقــوم يصبــّحـــها وقـوم ٍ يــمسّيـــــها
تعلا على عــــوص النضا وبذل المجهود =تهاذب عطــــايا الله طـــــوال ٍ مساريها
شفوق ٍ على المصمك وميـــــراثه المفقود=وقال الله اكبــــــر واعتزى في عزاويها
ويازينها يـــوم استـــــــرد الحكم مردود=وكـبـــر مؤذنــهـــــا وصــــلى مصليـها
تباشر بـــه الدنيا وتنثـــر عطر وورود=حـــكــــم بالشريعه والتزم في مباديها
وحكم بعده سعود وعطا المال دون حدود=يغيث اليتامى والفـــقــــارى ويغنيها
وانا اليوم ابذكـــر موقف ٍ له عليه شهود=صحيح المواقف تثبت فعول اهاليها
نـهــار ٍ بمـكــه والحرم ضايــق ٍ بوفود=حجيــــــــج الحرم طافوا ولبى ملبيها
والى به خسيــس ٍ اجنبي مجرم ٍ نمرود=تحين يبي له فرصــة ٍ ويهجــــم فيها
شهر خنجره واهوى بها الفاسق المقرود =يبيها على عبــدالـعـزيـز بـمــراميـها
رمى سعود نفسه واحتمى والده بعضود=وبالله غيـــــر ســعـود ذي من يسويها
شجاع وكريم ويغني البايــــس الملهود=عليه العيــــــــون مسبـلات ٍ عباريها
وابعود لك يا امير والعـود لك محمود=مدحـنـاك باولها ونـمـدحــك تــاليــها
وما دامك ولد مشعل ومشعل ولد لسعود=طبيـــعـــة ســعـــود وعادته ما تخليها