شاعر المليون قصائد وشيلات كامله في نقل مباشراضغط هنا

والله أنّي جيت مانـي بمحـدودي = ماخذك من زاوية .. طبّ وتخيّـر
لين خوفي من مساميـر الكبـودي = ردني لأجيك ضيف !! ولا مسيّـر
والغلا زاد وتعـدا بـي حـدودي = وأنت ما ترحم كبيرك .. يا صغيّر
لا رحم جدّك تقول انّـك يهـودي = ما تقول أنّك بري وإنسـان خيّـر
يا بري حالي عليك !! ويا وجودي = أحسب أنّك في يدي شيـكٍ مجيّـر
لين جيت ورحت ما شدّن عضودي = من حبالك لا طويل .. ولا قصيّـر
والحسود أن عـاد وإلا لايعـودي = جعل ماله فوق وجه الأرض ديّـر
كل مـا يقتادنـي للمـوت قـودي = ما ذكرت الا أنت !! يالريم المذيّر
يا أنتعاشي في الحياه .. ويا وقودي = دلّني لا صـرت بالـراي متحيّـر
لو تذعذع بك رياحيني .. و نودي = النصيب أن ماتسيّـر .. ماتسيّـر
لا يهمك لا عذول !! ولاحسـودي = هـد روعـك ياحبيبـي لا تطيّـر
أنت حبّك كنّه ( الحكم السعودي ) = ثبّتـه ( عبدالعزيـز ) ولاتغـيّـر

وادعينـي وأتركينـي عسـى دربــك سـمـاح = القنـاعـه كـنـز عـنـد الضمـيـر المسـتـريـح
أتركيـنـي ضـايـق الـبـال مكـسـور الـجـنـاح = آتـثــاقــل قـومــتــي وآتــحـــالا لـلـمـطـيـح
ياهـنـوفٍ علّـقـت قـلـب شـاعـرهـا وطـــاح = وأحفـرت لـه فـي مسابـل مدامعهـا ضـريـح
تنقله مـن بـورة اجـراح إلـى بـورة اجـراح = مثـل ماينقـل علـى متـن الإسعـاف الجـريـح
يــوم قـفّـت تـرّفـع اللـيـل وتـحـط الـصـبـاح = كنّهـا شـيـخٍ مــن الطـيـب مطغـيـه المـديـح
تــــدري أن الله وأكــبــر وحــيّــا لـلـفــلاح = لا علـى الديـن اليهـودي ولا ديـن المسـيـح
مـيـر ذمّــة شيـخـة الغـيـد سـيّــدة الـمــلاح = ذمة ( أحمد نور عبدالصمد عبدالسميح ) !!
لــه عـلـى كــل المـحـاور منـافـذ وإنـفـتـاح = مـــرّةٍ يـكــذب ومـــرّه يـعـلــم بالـصـحـيـح
مـادريـت أن إجتـيـاح المـجـاريـح إجـتـيـاح = ياطـريـح ألــزم فـراشـك وخـلــك يـاطـريـح
الـحـيـاة أحـلامـهـا تـذهــب أدراج الـريــاح = توهمـك بأشيـا تكـوّن عـلـى الـبـال وتبـيـح
أعذريـنـي يــوم أقـابـل طـعـونـك بـإرتـيـاح = كيـف لا والجـرح مملـوح والـجـارح ملـيـح
أعذب مـن النسمـه اللـي يمـر بهـا الصبـاح = لا أستقـرت فـي فـوادٍ مـن الفـرقـى جـريـح

يالله أنا نعبـدك وأنـت رب العالميـن = كاشـفٍ غراتهـا عالـمٍ بأسـرارهـا
وحدوك عبـادك الخايفيـن الخاضعيـن = مملينٍ في رجـا جنتـك عـن نارهـا
صابرين وصبرهم يامعيـن الصابريـن = مايضيع ورحمتـك ماسدلـت استارهـا
ضلت الناس الهدايـه وحنـا المهتديـن = روسنا مايدخـل الشـك بيـن أفكارهـا
المواقف تختلف بين حين وبيـن حيـن = والاوادم فـي مقاماتـهـا وأنظـارهـا
في كبيرات المواقف كبـار وحاظريـن = وفي صغيرات المواقف تقوم صغارهـا
لاوقفنا في الكبيـره ملينـا كـل عيـن = يـوم مايغنـي عـن غيابهـا حظّارهـا
ياطويل العمر جيتك وأنا عذري سميـن = وأنت من يقبل مـن الطيبيـن أعذارهـا
العذر يغسل ويمحـى ذنـوب المذنبيـن = والسما تغسل ذنـوب الثـرا بأمطارهـا
صار لي ماصار لـي وأوّل المتسببيـن = الليـال السـود وظروفهـا وأقدارهـا
جملتنـي مـره وفشلتـنـي مرتـيـن = وألبستنـي تهمـةٍ ماقـدرت إنكارهـا
حط في هذيك طينه وفي هـذي عجيـن = دون إذاعة ( منتوكارلو ) ودون أخبارها
بايعيـن الذمّـه منافقيـن مجامليـن = و بيديهم ردوا الشمس عـن مظهارهـا
مير ياليت المقادير وظـروف السنيـن = ناس لجل أدعي عليها بقصر أعمارهـا
وأدعي الله يحفظك ياطويل العمر ليـن = الجبال اتصـادم أحجارهـا بأحجارهـا
لنّـك أوّل جامعـه عالمـيـه للبنـيـن = كل مايعلـو بالإنسـان بيـن أسوارهـا
مستمـدٍ مـن حيـاة الرعيـل الأوليـن = طيـب سيرتهـا وتاريخهـا وأذكارهـا
فيك من عبدالعزيز الذرا الصلب المتين = إستماتـة نفسـه وسعيهـا وإصرارهـا
للدرجـات الرفيعـه بعـزمٍ مايلـيـن = أستـوت عنـده سهالاتهـا وأخطارهـا
ياعوين اللي ماخلّت لـه الدنيـا عويـن = تشخص عيونه على المقبلات أبصارها
ماطـرا لـي لاتذكرتـك إلا حاجتيـن = للظهور إحزامهـا والحلـوق زرارهـا
وحلمك ومدات جودك نهر من ضفتيـن = وشجرة الزيتـون بظلالهـا وأثمارهـا
تدري أنّي يوم أحطك على المتن اليمين = مايقلط فـي الرياجيـل كـود خيارهـا
شاعرٍ ماغاب صوته وهو بينـك وبيـن = السعوديـه وراياتـهـا و إشعـارهـا
لا اعتلى في منبر الشعر بين المنصتين = عوّدت بعض القصايد علـى شعّارهـا
والسلام وريحة المسك والعذر السميـن = وأنت من يقبل مـن الطيبيـن أعذارهـا

رجم الهوى اللي لعـن كوثـر جماهيـره = عـز الله أنّـه مايستاهـل تعـب ساقـي
أتعبتهـا فــي مراقـيـه ومشـاويـره = ذي جرتي نـازل .. وذي جرتـي راقـي
لبيه يـا (سـاره) .. ولبيـه يـا (منيـره) = في مهبل الناس مدري ويش أنا لاقـي !!
صـدر الشمالـي عليهـن فـك أزاريـره = اللـي مـن آدم وحـوّا مابعـد ضـاقـي
جن المدينـه علـى غفلـه مـن الديـره = وتورّطـن بالرومنسـيّـه والأشـواقـي
مايكتـبـنّ أسامـيـهـن بالطبـاشـيـره = بيعلمنّـك عـن الموضـه والأذواقـي !!
وجيههـن طالعـات مــن الكوافـيـره = من كثر الألوان كنْهـا (سبحـة عراقـي)
مافيـه داعــي أجاملـهـن بتكشـيـره = وأقول مشتـاق .. لـو مانيـب مشتاقـي
ماهن بكفو السهر .. والحزن .. والغيـره = ودموعي .. وشعري الموزون .. وأوراقي
(كرت أحمر) و (باب طيّاره) و (تسفيره) = في (قلعة الوادريـن) و (بألـف طقّاقـي)
الهنـدي و وايتـه !! والعـود وبعـيـره = هـذا مـدوّر ذهيـب !! وذاك سـوّاقـي
لو ما أنصفتنـي سنيـن العمـر الآخيـره = ماطبّقت عينـي أحداقـي علـى أحداقـي
قفلت سيـرة علاقـات .. وبـدت سيـره = اللـي عليهـا الكـلام وهقـوة الهـاقـي
أبرك ضيوف الهوى !! وأغلـى مساييـره = ريحانـةٍ تقطـف اللهفـه مـن أعماقـي
ماهيب من قوم : (ابـو دقّـه وتسكيـره) = من قـوم : (لاحاسبـت ماتاخـذ الباقـي)
لهـا علـى الزيـن تهليـلـه وتكبـيـره = أنعم مـن الـورده اللـي فـأوّل الساقـي
مهيـب أميـره لكنْهـا جنـب الآمـيـره = ذات الحسب والنسب والمستـوى الراقـي
من (أغنياء الريـاض) ومـن (هواميـره) = شركات أبوهـا بضايعهـا فالأسواقـي !!
يومي لهـا الغصـن وتغنّـي عصافيـره = والأمـر ينـقـاد لرضـاهـا وينسـاقـي
غيـداءٍ سهـم عينهـا مـن قـوّ تأثيـره = مخسرٍ سـوق الأسهـم عنـد الإغلاقـي
البـدي والهيكـل اللـي ماتبـي غـيـره = (أصطب) و (أستبنتين) و (قير علاقي) !!
مازيّـن أخـلاقـي الـطـب بعقاقـيـره = لـولا عقاقيرهـا مـازانـت أخـلاقـي
من قبلهـا الحـظ مـن جفـره لدحديـره = ليـن أوعـزت للزمـان وحـرر وثاقـي
وأعتضت عن قوم : (ابو دقّه وتسكيـره) = باللي : (ليـا حاسبـت ماتاخـذ الباقـي)

يالله ذراك وحجاك وسترك الضافـي = من معظلات السنين اللـى تصادفنـي
العمر راح اكثره والصاحب الوافـي = هبت رياحه بمـا لا تشتهـي سفنـي
اللى لعينـه مالـدت عينـي خلافـي = قـدام قـدام لـو راسـي يخالفنـي
اوفى له من الوفا واصفى من الصافي = اقرب مايليه في عمـري مناصفنـي
شهرة قصيدي لاخليّت منـه تنعافـي = حتـى لـو الليـل والبيـدا تعرفنـي
الله يجبر عزا سنافي علـى سنافـي = عزالله انـه قصـى حالـي وكلفنـي
كانه رفيقي ولايـدري عـن الخافـي = لـو كـان بعيونـه الثنتيـن شايفنـي

ياوجودي وجد من نفسه جزوعـه = باقـيٍ فيهـا عـلـومٍ مانستـهـا
لابغى عن سجتـه ينسـى دموعـه = مرتـه ذيـك العلـوم وحولتـهـا
واشعلت نارٍ حطبها مـن ظلوعـه = تاكل اللـي فوقهـا واللـي تحتهـا
كل ما اذكر من خذت قلبي قطوعه = واقتفاهـا النـوم وعيونـي قفتهـا
جوخةٍ من متن ابوزيـد مخلوعـه = لو درت عنها السلاطين اسرقتهـا
ظامـرٍ سرجوفهـا كنـه بجوعـه = ماتفـرق بينـه وبـيـن ارقبتـهـا
كنهـا ظبـيٍ قبـل ظلـه يروعـه = باقـيٍ فيـه التفاتـه مـا التفتهـا
اسم ابوها (اللي يحطه تحت كوعه) = واسمها (اللي تدرسه في مدرستها)!
ماتعلى فـي الخيـال ولا فروعـه = غيرهـا .. ولا تـبـوأ منزلتـهـا
كن عمري من سبوعه لا سبوعـه = تنظمه نظم الخـرز فـي سلسلتهـا
تجمعه لاشعشـع سهيـل بطلوعـه = وتنثـره لاحتـت الارض ورقتهـا
همها اشرب دلتـه وآكـل قدوعـه = من ظوتني ليلة السبـت وسرتهـا
روّحت وفـوادي الفرقـا تلوعـه = ماحسدت الا البسيطه فـي سعتهـا
القناعـه كنـز للنفـس القنـوعـه = مابقى الا روحي وروحي خذتهـا
ليتها مرواح من يرجـى رجوعـه = كان ماغمضت عيني مـن جهتهـا
والضياع اللي طبوعي من طبوعـه = ابركـات الله علـيّـه وابركتـهـا
ضاع عمري من سبوعه لا سبوعه = مابقى الا ليلـة السبـت وسرتهـا

الغالي اللي يبي مني دمـوع اعتـذار = ماقال لي عن دوافعهـا والا اسبابهـا
ان كان وده بموتي مـت ذاك النهـار = والادموع الرجال اغلى مـن ارقابهـا
غبن الهزيمه يـروح بلـذة الانتصـار = الا الهزيمـه بـذل احبـاب لحبابهـا
لاوقفت سكتك وسنين عمـرك قطـار = اول ماتبـدا مـن الطعنـات تبدابـهـا
الجاره اللي تعاملها بحسـن الجـوار = لاشدو البدو واطنابـك علـى اطنابهـا
وانا كذا لاسدلت نفسي علـيّ الستـار = في وجه ليل يسوق الشمـس لغيابهـا
اعدد اسماي لجل ان مرها الانكسـار = يضيع فيهـا ولااخطاهـا ولا صابهـا
والاترا اسمي حقيقي واسمي المستعار = مامنه ثاني بأسامـي النـاس والقابهـا
لو ان للقلب غير الذكريـات اختيـار = اللـي توقفبـه الخطـوه علـى بابهـا
ماكان خلاني اعرف قيمـة الانتظـار = والخوف من قول وداهـا ولا جابهـا
اكبر على الحزن لايجرح وقار الوقار = واقرا تعابير مـن حولـي ولا القابهـا
الا احتقار النفوس وما اصعب الاحتقار = من عين تنبت سهوم البغض باهدابهـا
ياليت ربـي ليامـد البشـر بالعمـار = مايعطـي العاشقيـن اعمـار تشقابهـا
يخصهم عن سواهم بالعمـار القصـار = مايمـدي الحـزن يمكنهـا وينتابـهـا

علّم عيونك لاتطـوّل فـي الكـلام ولاتقـول = من قبل أعرفك مابعد شفت النجـوم .. القايلـه
خلك ترد العلـم عنّـي قبـل سالفتـك تطـول = رد الـرواه اللـي يـردون الكـلام لقايـلـه
ضيّعتني ضيّعك ربّي فـي مضيّعـة العقـول = من يوم أخايلها .. وأنـا ماكـل بـرق أخايلـه
وأن ضيّعتني ضحكةٍ بشفاك .. يادين الرسـول = غديت ملحٍ ذاب فصّه فـي الشعـاب السايلـه
وحلمت بأنّك عرش في قلبي على كف محمول = وفسرتها !! أن العرش هو حبّك وأنا اللي شايله
وليا نشدت الناس قالـوا : يامغفّـل يامهبـول = حلمك بعيد ولـو تمـد إيديـك منتـب طايلـه
يارجل وجهك بالرضا والمسك والنور مغسول = من حيث لاتعلم عمـل فيـك الزمـن عمايلـه
مامات من ظلم الغرام إلاّ الحياوي والخجـول = تحدّهم سو الطوالـع فـي الحظـوظ المايلـه
غاياتهم تحبس وتبقى فـي خواطرهـم تجـول = مثل الذي يمشي على ستايـل مهـوب ستايلـه
مدري ملكتك ماملكتك !! والتباهي والفضـول = يقول مالا تنتظر ياجـاي لـك !! ياجـاي لـه
خل الحسود يموت في ثوبه يقـول أو مايقـول = لاواهني اللي يحـط أسمـك بكـرت العايلـه

انا غريب(ن) بعد رحت بلا وطـن = سافرت عني والوطن سافر معـك
واخطيت يوم اني تجاهلتك خطـن = مايغفـره قلبـك نهـار اودعــك
سطيت وفراقك سطا واللي سطـن = جرحينك اللي قطرن مـن مدمعـك
يوم النعومه من حرير ومن قطـن = تلبسك مـن سبابتـك لا مفرعـك
ماقلت ميدك ب(القصيميـه) عطـن = من كسرة السكر على راس اصبعك
وان غرك التلميح يالقلـب الفطـن = لديت عنك البـال كنـي ماسمعـك
ومكون الانسان من ظهـر وبطـن = انه تعلّـى بـك تعالـى ورفعـك
لاعدّن عيونـك بصـدري وقلطـن = ماقلتلك من باقي ضلوعـي دعـك
وان جمعن عمري وعدن وغلطـن = هن يعرفني كيف اجوعك واشبعـك
مايعرفن اني غريب بلا وطـن؟!! = سافرت عني والوطن سافر معـك