::|[ ديـوآن الشآعر \ لافي حمود الغيداني الحربي.]|::

باسم ربـي ابـدا واتعـوذ مـن الشيطـان=قبل ابدا كلامـي والعـب القـاف واحوفـه
ياعـالـم مالايعـلـم الـجـن والانـسـان=يامن كل خوف اصله خطـأ ماعـدى خوفـه
فرجك ومـدد عونـك وفزعتـك يارحمـان=وحجاك وذراك من اغبر الوقـت وصدوفـه
مضى وقت مثل الصايـم الجايـع العطشـان=يدور مـن المـا لـو ملـي راحـة كفوفـه
أقبـل جبيـن الشعـر واستجـدي القيفـان=وبيت القصيـد اشـوف فضلـه ومعروفـه
انا بشان وافراح البشر والشعر فـي شـان=عن الشعر كلـه رغبـة النفـس مصروفـه
وجا مايحرك هاجـس المشفـي المرضـان=على فتـل قيـد الشعـر بيديـن مشعوفـه
يدور علـى اللـي تفحمـه راسهـا مـالان=ويعرض عن اللي تعتـرض تقـل معسوفـه
بيوت القصيد النـدر أحـذر مـن الغـزلان=قوانيصهـا يلحقـهـم رهــاق وكلـوفـه
ياطير الخيال اصعد سمـا وافـرد الجنحـان=انا شفـي اللـي غيـر عـن كـل مالوفـه
أحس اني اول مـره اقصـد وانـا طربـان=وتجينـي ذلـول الشعـر بالشعـر مردوفـه
نعم طايش وشايـش ومتنومـس ونشـوان=من اللـي بعينـي مثـل خلـق الله اشوفـه
تداعت هواجيس القريحـه علـى الولهـان=ومن الشعر لهـل الشعـر غنيـت معزوفـه
وركبنا على افضل مانتجـت دولـة اليابـان=لاندكروز.. فاكس آر ابيضٍ.. تعجب اوصوفه
مع الدرب لاوحف صبح ولا اوحف مسيّـان=تقـل مـروةٍ مـع شفـة البيـر محذوفـه
لا والله زبنـت الله عـن الظلـم والبهتـان=مثل طلقـة العبـرود مـن بطـن شاخوفـه
هو غاية طلب مـن فكـر وعقّـد الحجّـان=نـوى طرقـةٍ بأنـواع الأخطـار محفوفـه
نصينا عليـه اللـي تقلّـط لحـا الضيفـان=علـى الحشـو ودلال البغاديـد مصفـوفـه
وللعود الأزرق فـي سمـا بيوتهـم دخـان=يشابه ضبـاب اللـي ضحـا تـردم قنوفـه
بخب النقـع موقـع حفـل شمّـخ النيبـان=ومن الحربي اللي ماحضر واعلـن وقوفـه
هذا الموقف اللـي ماعنـه عذرمهمـا كـان=يجي لـه حميّـا الرجـل ويخلـي ظروفـه
لو ظروفه أكثر من صفايـح حجـر ورقـان=يجمّـع ظروفه...ثـم يبنـط بهـا الطوفـه
هنـا للتحـام الصـف ولوحدتـه عـنـوان=ومن يقدر يهـزّ الجمـع لالتحـت صفوفـه
ياخب النقـع سولـف للاجيـال والأزمـان=عن آخر حدث تاريخ حرب حضنـه جوفـه
تاريـخٍ انجـازات اهلـه نالـت استحسـان=دهاة العـرب مـن بـاب صنعـا ليالكوفـه
بروايز صفحاتـه مـن اللـول والمرجـان=ومن واحد وعشرين الذهب تكتـب حروفـه
تاريـخٍ ماضـرّي للتهـاون.. وللـخـذلان=مضـرا لتتويـجـه الأفـعـال منصـوفـه
منصوفه.. بين اللي لبسـوا هامتـه تيجـان=وخلوهـا تعانـق هامـة الجـدي وتطوفـه
تبا تقـوم ناقـة صالـح وعزهـا مانهـان=مـدام ان بنـي سالـم ومسـروح مكنوفـه
حرابـة سلاطيـن الـدول منبـع الفرسـان=يـوم ان اليـادي طلـق ماهيـب مكتوفـه
ضربنا اروع الامثال فـي نخـوة الجيـران=ودون اخويانـا نقطـع الـراس وانلـوفـه
فدينا الخوي بـارواح ستـه مـن الشبّـان=غير اللي بشـذرة مرهـف الحـد منسوفـه
بالاد الحلال ان كان ماهـي علـى البرهـان=بالاسماع مسموعـه... وبالعيـن مشيوفـه
غير اللون الابيض للخوي مانعـرف الـوان=ماتصبح بنا هقـوات الاصحـاب مكسوفـه
ونسـوي لاسوينـا المعاريـف بالمـجـان=مخلوفـه...والا انـشالله ماهـي مخلـوفـه
كذا طبعنا ...مـن الله خلقنـا وحتـى الان=مواقيفنـا بالخـيـر والـشـر معـروفـه
ولامنا عطينـا ظهورنـا.. قصدنـا حقـران=ماننظر خلاف.. ونترك الضعـف لضعوفـه
ولامنـا عطينـا نحورنا...نشبـه الطوفـان=نعـز الصديـق ولحيـة الخصـم منتوفـه
بحالة رضانا...نجـزا الاحسـان بالاحسـان=وبحالـة غضبنـا مانخلـي لنـا حسـوفـه
يعني ..نزعل الراضي..ونرضيك يالزعـلان=بيـومٍ معازيبـه تـبـرّا مــن ضيـوفـه
لنا في سنام المجد..مجـد وحمـا واوطـان=وعلى غاربه نرقى...مانرقـى مـع ردوفـه
بكـل اختصار...اقولهـا بالفـم الملـيـان=اخذهـا علـى ماقالـوا النـاس مكشـوفـه
لامنا دخلنا...ندخـل مـع اوسـع البيبـان=على المجد...لين المجد يرخي لنـا اكتوفـه
وبـاق القبايـل والنعم...مابهـم نقـصـان=على الله تعالى أدخل عـن الظلم...وحتوفـه

مايبرد واهـج الشـوق وشعـور الهيـام=غير سرداً تطوي البعد بالسرعـه طـوي
بديها من خلف ماهوب مثلـه مـن امـام=مستوي في حال .. وبحال ماهو مستـوي
خشمها عبرود طلقه .. وموخرهـا بهـام=رافعـه راعيـه بـأشـارة ٍ ماتنـغـوي
لابدو دعاء السفر .. واعلنو ربط الحـزام=ورشادات الامن لـو ترتطـم والا تهـوي
واستلمها واحد ٍ خبرتـه عشريـن عـام=كبتـن ٍ بالله وبكتابـه إيمـانـه قــوي
مسلم ٍ عنـده خبـر بالحـلال وبالحـرام=جابله ربي على الديـن وسلوكـه سـوي
وصعدت مثل اشقر ٍ فوق جول الصيد حـام=لمراوحهـا مـع الجـو لجـه وحـدوي
مثل مايدوي صدى صوت رعـاد الغمـام=صوتها صداه عبـر الفضـا يـدوي دوي
صنعة اللي ماعرفـوا لاصـلاة ولاصيـام=شعب ٍ أكثرهم ماهو عارف ٍ منهـو ذوي
بالنهـار لياتعلـت كبـر فـرخ الحمـام=دونهـا الاف المسافـات تزويـهـا زوي
وان تغطلس بينك وبيـن رؤيتهـا الظـلام=كن في روس اجنحتها مشاهيـب بـدوي
دوبهم دكو عـن دلالـه الربـع الحشـام=تحتها من وقدة السمـر جمـر ٍ مجثـوي
دايم وربعه علـى جلسـة ٍ عنـده حيـام=ابلـج ٍ ليـن جنابـه لربعـه وحـمـوي
مالي الا هي .. لياجـا للاشـواق أحتـدام=وقامت الذكرى على القلب تكوينـي كـوي
لي شهر وشوي عيني محاربهـا المنـام=ودي احضـر جـوازي وادورلـي خـوي
بينـي وبينـه مسافـات وحـدود ونظـام=واحد ٍ فرقـاه شاويتـن فـوادي شـوي
بس ابـا ازوره مثـل مايـزارون الكـرام=لين عيني مـن قبالـه وشوفـه ترتـوي
لو بغيت اصبر .. واكابر .. واقول اني تمام=ذيب حبه بيـن جـرد المحاديـب يعـوي
كان مالي في دروب الهوا شـف ومـرام=لين شفته .. واشهد انه هـواة المهتـوي
ياسـلام الله علـى السلهمـه والابتسـام=وياسلام الله على اللي مابيلـه مطـروي
كن مالله حط في منطقـة خصـره عظـام=وكن غيره ماحتوى مثل ماهـو محتـوي
لاقعـد مـاوده يقـوم .. ولياقـام قــام=تلوي اعناق البشـر قومتـه يمـه لـوي
تقل بين اعلا الجسم واسفل الجسم انقسام=شي من جسمه مرتب وشـي ٍ فوضـوي
استلمنـي فـي جبروتـه اشـر استـلام=ليـن طيّـح معنويـات راس المعـنـوي
الغرام ليابطـش فيـك ملعـون الرسـام=مايعرف هـذا قبيلـي .. وهـذاك خلـوي
يكبر الرجـال امـام المهمـات الجسـام=ويصغر الرجـال امـام الجمـال الانثـوي
مايتحمل نظرة العين .. وارخـاي اللثـام=لو باسه باس رحمة حيـاة بـن جلـوي

لعيون ساره كتبت احلى المواويل=وغنيتها فدوة(ن)لعيـون سـاره
عيونها كنهـا مهـدودة الحيـل=مايناسب لوصفها الا هالعبـاره
نعسانة(ن)دوبها ماهوب بالحيـل=تسرق من النوم لكن في شطاره
اي والله اني حسدت الكحل والميل=لمصافح اهدابهـا تاره..وتـاره
تبعث من عيونها لقلبي مراسيل=لين انها احتلت القلـب بجـداره
غدى لها قلبي اوطان ومداهيـل=الحالهـا مالهـا ضره..وجـاره
الله عطاها الجمال بدون تجميـل=من كل زين الله اعطاها اخيـاره
نهارها اجمل نهار وليلهـا ليـل=لياتفـرق سـواده عـن نهـاره
ماتحصي اوصافها كثر الاقاويـل=لكن قل الحـر تكفيـه الاشـاره
في داخلي للغلا حفـل وقناديـل=وناس(ن)تعانق بعضها في حراره
ألذ مابالهوى عنـاد المواصيـل=والركض بين الحلاوه..والمراره
كل التعب..لو منه ماجا محاصيل=لخاطر عيونها ماهـو خسـاره

بديـت بأسـم مكـون الـكـون تكـويـن=المنـفـرد والمتـحـد فــي كـيـانـه
رب الحجـر .. رب الشجـر .. والثقاليـن=مـرسـل محـمـد وامــر ٍ باتبعـانـه
اللـي عبيـده لــه صـيـام ٍ مصلـيـن=يـرجـون رحـمـة ربـهـم وامتنـانـه
وعطفه .. ولطفه .. لاغدى الخلق نصفيـن=ويشهـد علـى الانسـان حتـى بنـانـه
ياناصـر الرسـول فـي بـدر .. وحنيـن=ياجاعـل لـسـان البـشـر ترجمـانـه
انـت المعيـن ولاحـد ٍ غيـرك معـيـن=ومـن بعـد ذكـرك كـل شـي ٍ باوانـه
ياراكـب اللـي مـن حفيـزه اقـزوزيـن=تـو .. ودبـل زيـرو .. وون.. اصدرانـه
صـدّر خــلال انتخـابـات الزعيمـيـن=قـدام بـوش الابـن يكـسـب رهـانـه
قبـل استـلام البيـت الابيـض بشهريـن=و مجلـس شيوخـه .. وانظمـة برلمانـه
جي .. إم .. أس .. حروف وارموز .. تبيين=للمصنـع الـلـي صمـمـه والصيـانـه
احـدث موديـل بتكنلوجـيـا الصوالـيـن=والله عطـا الـلـي يصنعـونـه اتقـانـه
لياسـرى ماضـن مـن اللـيـل ثلثـيـن=وولـع مصابيحـه .. وولــع اسكـانـه
كـن اجماحيـاتـه شـمـوع المحبـيـن=فـي عيـد ميـلاد .. اوقـده شمعـدانـه
وكـن اشتغالـه هرجـة ٍ بيـن ثنتـيـن=يخفنهـا بـيـن الخـجـل .. واللعـانـه
ويشبـه لياقـام يتمشـى علـى هـويـن=مـشـي الفـتـاه المتـرفـه بمشيـانـه
ولياعطـا مردومـة ٍ كنـهـا قـيـن =قـام يغنـج .. ويهـوس كـن اغنجانـه
شريفـة ٍ فـي حفـل نـاس ٍ شريفـيـن=ترقـص علـى يالليـل ادآنــه يـادآنـه
تهـز .. وتهـز الخصـر .. والذراعـيـن=ومـن راسهـا ماطـاحـت الاستكـانـه
وليامشـى مـن نجـد بيـن الصلاتـيـن=مايصـبـح الا فــي حــدود الكنـانـه
يصـرخ بعنـف .. لياخـذ شـوي بنزيـن=مثـل صـريـخ صغـيـر ٍ بالحضـانـه
ياسايـقـه بالله هالحـيـن هالـحـيـن=قـم دق سلفـه .. واربـط حـزام امانـه
حنـا عـلـى رد الجمـايـل مضـريـن=حاضـر بحاضـر .. والتهـاون جبـانـه
دسلـه .. وزدلـه بأشتغـال الصلنصيـن=ولايـحـرك الا بـآخــر ازعيتـمـانـه
خل الحصـى علـى حصـاه .. وحصاتيـن=يفـر مـن حـدره فـريـر (السمـانـه)
حـده علـى قصيـاه .. ياسايقـه لـيـن=تعـزف قـزوزه مثـل عـزف الكمـانـه
ويخلـي الـعـادم بـطـون الشكامـيـن=غليـون (حشـاش ٍ) بـراسـه شطـانـه
كنـه بتفكـيـره .. يـحـرر فلسطـيـن=ومستيـسـر ٍ شــارون بالخـيـزرانـه
نصه ديـار طيـور شلـوى .. الدماسيـن=وقل ويـن مطلـق .. ثـم لياقيـل عانـه
تلقـاه فـي بيـت ٍ يـذري عـن البـيـن=سلـم عليـه ومــن لقـيـت بمكـانـه
سـلام مـمـزوج ٍ بعـطـر الرياحـيـن=والا زبـاد ٍ تـو جــا مــن عمـانـه
ألـذ .. واحـلا مـن حليـب المـلاويـن=ليـاروحـن مـــن وادي ٍ ديـدحـانـه
مثـل الـزلـول الفـاخـره بالـدواويـن=ويلاعـب الغـربـي زهــر قحويـانـه
مقـدار ربـع ٍ لـوهـم بعـيـد غالـيـن=علـى خـفـوق ٍ قـدرهـم ماأستهـانـه
عيال عـود ٍ غـاب راسـه علـى الزيـن=ممنـوح مـن ربـه صــلاح البطـانـه
مطلق .. وغـازي .. والنعـم بالشقيقيـن=وأخوانـهـم .. والله علـيـه وامـانــه
ماهـو مكفيهـم لانـعـم .. ولانعمـيـن=هيـف السميـن اللـي كثيـر ٍ أدهـانـه
واهـل هـلا يامرحبـا فيـك .. وهلـيـن=وكـل ٍ حجـاجـه يعجـبـك بضحكـانـه
واهــل دلال قـنـاد غــال المثامـيـن=وافضـل نمونـه هيـلـه .. وزعفـرانـه
كنـه للضرمانـه صـعـوط المجانـيـن=ليـاذاقـه النعـسـان طــار إنعسـانـه
واقـول .. يامطلـق فــدوك الكثيـريـن=أهديتـنـي دره .. وبـاقـه .. ودانـــه
الباقـه الـلـي مــن ورود البساتـيـن=مـن كـل شـي ٍ زيـن فيـهـا إذنـانـه
منباعها مـن جـوف قلـب .. وشراييـن=وجـم ٍ تـصـدر بـالـروى عيطشـانـه
فيها عتب .. لكن علـى الـراس والعيـن=انــا مــدان ومعـتـرف بـالادانــه
إن كانـا بالـوصـل مـعـك متـرديـن=منـك السموحـه راس مــال الخـزانـه
امـا تـجـي .. والا نجـيـك متعنيـيـن=وكـل ٍ علـى اصحابـه وسيـع ٍ بطانـه
وصـلاة ربـي عــد وبــل الـوداديـن=عـلـى رســول ٍ عـزنـا باتبـعـانـه

يامكثرين الهرج لااسمـع ولااجيـب=تريحوا من فضلكـم واسمحـوا لـي
تريحـوا لاتلحـقـون المشاهـيـب=على الردى مانـي شفـوق عجولـي
بالعقل والصبر ادب النفـس تاديـب=والا لهـا مـده تصـول وتجـولـي
خلج ترازم فـي سيـاج المحاديـب=مافيهـن اللـي بالعقـال معقـولـي
اشد وطية زور مـن شمـخ النيـب=اليا ضاع مفعو ل الحيـل والحلولـي
انـا لاقلـت ارتـب القـول ترتيـب=حتى يجـي كـي علـى فـك قولـي
اليا ارسلت لافكار القريحـه مناديـب=ترايعن مـن عقـب ماهـن جفولـي
لكن مالـي مـن وراهـا مكاسيـب=لو كان عشاق القشـر صفقـوا لـي
مامستفيـد الا العـدو والاجانـيـب=ولانـي مطيـع مقرقعيـن الطبولـي
خليتهـا تعطـي فجـوج مجاديـب=جربا تجـود فـي رسنهـا مهبولـي
والله لااجنـب دام لـي درب تجنيـب=من شرهة حشام الرفاقـه خجولـي
لـو انهـا بيـن النحـر والتلابيـب=من الحيا وجهـي مهـوب مغسولـي
طبـع لنـا نشـب عليـه ونشيـب=وطبيـعـةٍ لعـلـهـا مـاتـزولـي
على الجماعه للجماعـه مواجيـب=الا جهلـوا قـدر الرفيـق الهتولـي
ماني على ربعي قريـب محاضيـب=ادنـاة مايخلينـي اسـرج خيـولـي
ان جات من طيب شقاها على الطيب=لو انها اعوج مـن رقبـة الذلولـي
وان جات من مسكين منطق واساليب=حطيتهـا بيـن الثـرى والنعـولـي
لاحركـت شعـره ولاطلعـت شيـب=ولاضيقت صـدري ولاطـق جولـي
وان كان في صبري على ميلهم عيب=العيب تفتيـش الصـرر والحثولـي
لاقمت تذكر فـي رفيقـك عذاريـب=وتبيـن عيوبـه لذولـي وذولــي
صبرك على ربعك عـلاج وتطابيـب=يقصـر حبـال السالفـه لاتطـولـي
حتى مايلقا فـي طرفهـا مقاضيـب=كـراه خيـر وللمشاكـل ميـولـي
واليا بليـت بتايـه شـره وصعيـب=يقول انا العـراف وانـت الجهولـي
قـل الله الله ياحصـان الاطالـيـب=يالفاهـم العالـم عطيـب الفعولـي
هذا الكلام اللي مافي صحتـه ريـب=لانيـب لاحولـك ولانتـاب حـولـي
حصان وبن حصان طيـب مجاذيـب=وبالمعرفـه رجـل محلـي ودولـي
خله يروح يخطي الـدرب ويصيـب=يقول مابالنـاس عرضـي وطولـي
والفرق ماهو باللحـى والاشانيـب=الفرق بين النـاس فـرق العقولـي
كم واحد تحسن بـه الظـن ويخيـب=السـن يضحـك والفـواد معلولـي
واللي غدت به كلمة مالهـا غيـب=ماهو من اطيب ربعي اللي غود لـي
يالله عساها صيحة فـي قفـا ذيـب=وقلـع النيـا بينـي وبينـه يحولـي
الرجل مايغصب على الطيب تغصيـب=اليا صار ماهو دل ضمـن الدلولـي
ومن عادة اللي طيبه يحضر ويغيـب=لاطالـت الرفقـة زهـوق ملـولـي
واليا بلنـك غبـر الايـام بصحيـب=في مستوى طيبـه صعـود ونزولـي
اعرف ترى الدنيا دروس وتجاريـب=والكامـل الله والنـقـا للرسـولـي
لاتصير مشـذاب يقـص العراقيـب=خلـه وراع الاولــه وش يقـولـي
اخذت حكمه مـن كـلام اللواعيـب=للطيـب نـاس وللعـذارى فحولـي

أقبل يحرك خطوة الرجل برفوق=والقاع لمصافح اخطاه يتشوق
مخلوق لكنه مهو ب أي مخلوق=على بنات آدم وحوى تفوق
عليه لبسٍ يجمع الوسع والضوق=اموسعٍ بعضه وبعضه مضوق
مر وتعدا ما بدا منه منطوق=ألا بجيش من المفاتن مطوق
خلاني امشي واقضب الدرب واتوق=ماني بتايق عقل لكن متوق
تقول مرميٍ على الأرض من فوق=وألا من السم السقطري مذوق
يغشى علي شوي وشويٍ افوق=وقول لستيقضة والبال روق
مادام لا معوق ولا صايبه عوق=وراه يمشي مثل مشي المعوق
اللي على حاله خطر من هل السوق=مفروض يمنع مايروح يتسوق

الظّلْمْ كيف اقْبله.. والصّبْر كيف احْـرزهْ=عزالله انّي من الاثنيـن.. قلبـي جريـح
والله ..مايجـرح الرّجّـاااال و(يْنفـرزهْ)=الأ..لاقال الصّحيييح..وقيل ماهو صحيـح
كلمه بسيطه..ولكـن حجْـم مااااتفـرزه=يْخلّي الكون فيك يضيييييق لوهو فسيـح
الرّجْل قبـل تْحكـمْ عليـه فجْـأه..رزه=يبين لـكْ راااهـيٍ بالعقـل والأ شحيـح
والطّيب..واااجد مجال الطّيب مير ابـرزه=اظهاااار فعل الجميل..وترك فعل القبيـح
حطّ اصبع الطّيييب بعيون الرّدى.. واغْرزه=وش قيمتك بالحياااااه ان ماكسبت المديح
حاولت اجمّع بها فُلّ الشّعـر.. وكْـرزه=قصيدتي..وارضي الطّيب واغيض البجيح
مـن عادتـي أجتهـد بالقاف..وآطـرّزه=باجمل عبارات.. والاّ آريّحـهْ واستريـح
ان مانظمته نظم سبحـه خرزه.أخـرزه=لو قالو انّه مليح..آقول مااااهـو مليـح

الحقيقـه يـابـو فــواز وبـكـل افتـخـار=كـل فرحـه عـارمـه للـسـدود مبـوحـه
الـف مبـروك النتيجـه وحسـن الاختـيـار=وجايزة وضح ٍ من الغيـض جـات مشوحـه
جـات عقـب العـام تبغـى تـرد الاعتـبـار=ماحـلا الفاحـج علـى فخـذ كـل مـدوحـه
وسم .. وشعار اهل الارماح .. والشلف القصار=والضروب اللـي بـروس الخصـوم مجوحـه
مثل مالجيش الامريكـي بطـش فـي قندهـار=ابطشـت بـارض المزايـن تقـل متسـوحـه
كنهـا تبـا تحـب السمـا كـبـر ووقــار=مـن ثقتهـا بزينهـا بالجمـيـع مطـوحـه
مثل فاكسارات موكـب حـدا طـوال العمـار=يـوم جـت للعـرض امـام الاميـر مروحـه
استحقـت جايزتهـا جهـار مــن النـهـار=وتوجـت .. وكبـود حسـاد اهلهـا مفوحـه
واحـد ٍ قـال انهـا مغيضـه العـام استخـار=والله ان الـعـام هــذا لقبـهـا منـوحـه

وين انت ياللي كـل ماتمـر ذكـراك=توقد فتيل الشوق وتـذوب الاضـلاع
تعال..وجلس صبلـي مـن شفايـك=هيل الكلام اللـي تصبـه بالاسمـاع
مدري متى اشبع من سوالفك..وارواك=اثر الحكي بعضـه خزامـى ونعنـاع
عن كل من حولـي تاخذنـي لدنيـاك=واندم على وقتٍ قبل لاعرفـك ضـاع
تزهر حياتي في حضـورك ولامـاك=مثل المطر..تزهر من حضوره القـاع
قلت ابي اجرب قلبي احاول.. انسـاك=ورتعت قبل القلـب يـدري ويرتـاع
ساق الهوا مركب غرامـي لمرسـاك=ماعاد ينفع بـه مجاديـف وشـراع
عطني حضورك..وإقطع دروب فرقاك=لايهب للفرقا علـى القلـب ذعـذاع
مايستحق يعيش بـه كـود شـرواك=قلبٍ يضمك حـب ويضمـك اوجـاع