سمعت لي كلمـة مـدري وش اقصاهـا=حـزت بنفسـي وأنـا مانيـب هارجهـا
لـو كـل كلـمـة إليا جتـنـا طردنـاهـا=بعنـا الثميـنـة بسـعـر مايخارجـهـا
لـو مـرت السمـع ماكنـا سمعنـاهـا=ونقفـل الـراس عنـهـا لا يبرمجـهـا
ومـن يـم هــذا لـهـذا مانقلنـاهـا=والنـاس واجـد وتلقـى مـن يروجهـا
مـن جابهـا بيـن خـلـق الله وداهــا=لو بـه مراجـل تـرى نفسـه يسمجهـا
ومن عامل الناس فـي سابـق خطاياهـا=يقعـد بـدارن خــلا مــاداج دايجـهـا
فـي كنـة تشـوي الجربـوع رمضاهـا=وتابس غصون الشجر من حـر واهجهـا
والناس بالحق حكم الشيخ مـا أرضاهـا=ماتقنـع النـاس لـو انــك تحججـهـا
ياللـي تبـا الطيبـة خذهـا وعطنـاهـا=وخـل الطريـفـة طـريـة لا تثلجـهـا
وأقضب طريـق الأوادم وامـش ممشاهـا=أتبـع دروب العـرب وأدرج مدارجـهـا
وأرسـم لنفسـك حــدود ولا تعـداهـا=من حط نفسه بـدرب الضيـق يحرجهـا
وان كـان نفسـك هواهـا قـام ينحاهـا=حط الأعنـة بـروس الخيـل وأسرجهـا
وفـكـر بمنكافـهـا قــدام مغـزاهـا=واضـرب حساباتهـا وتشـوف ناتجهـا
وكـل بعضـده يمـوح الدلـو برشاهـا=وتلقى كبـود الضوامـي مـن يبرهجهـا
وان كان تـوك علـى صـدرك تهجاهـا=حنـا ترانـا نـدرس فــي مناهجـهـا
مـن يـم مصباحهـا نبعـد معشـاهـا=إلـى قعـد راعـي الضـلـع يدرجـهـا
لو هي صعيبـة إلـى انعاجـت عدلناهـا=واللـي تجـي مستقيمـة مـا نعروجهـا
نهتـم فـي وزنهـا وابــرام معنـاهـا=ومـن الكرستـال واللـولـو نتوجـهـا
مثـل الجواهـر ليـا مـنـا نضمنـاهـا=وسلوكها مـن جديـد الـزري ننسجهـا
مخايـل ترتـدم والـصـدر منشـاهـا=لا دك بالـبـال داكـــوك يهيـجـهـا
وليا أمطرت ضاقت الوديـان فـي ماهـا=تاخذ إلـى الحـول مـا يبسـت مدالجهـا
وان صدت الناس عنـا مـا أعترضناهـا=مـا تقفـي النـاس عـنـا ونتولجـهـا
وإن جاتنـا الطيبـة بالطـيـب زدنـاهـا=الطيبـة بالعسـل والسـمـن نمزجـهـا
وان جاتنـا الثانيـة نصـبـر ونرفـاهـا=يمكـن إليا فـاق راعيهـا يعالجـهـا
وان عادهـا عـودة مـاعـاد ينسـاهـا=من حربة فـي صميـم الصـدر نولجهـا
مسمومـة يبلـش الدكـتـور بـدواهـا=مايقنـع الخبـل ليـن أنــه يلامجـهـا

عسى الخيال اللي بروقه لها ضـوح=يرخـي هماليـل الغشيـن القراحـي
على قرى ساحوق من فوق وطلـوح=و ريكات وذريـرة وهـاك المشاحـي
لو كان مالي فـي مراعيـه مصلـوح=لا نيـب لامـوده ولا نـي متـاحـي
متريحٍ مـن بيـن جـدران وسطـوح=مبطي مـن الثنتيـن خـالٍ مراحـي
لي صاحبٍ مملوح مع نزل مسـروح=يلعب بقلبـي لعبـة مضيـم ضاحـي
وجدي عليها وجد من جاه ساموح=بنحـور قـومٍ يشهـرون السلاحـي
عنده ثـلاث أذواد ماهـن بشرشـوح=خلفاتهـن تسعيـن غيـر اللقـاحـي
إلى صعـق جنـه عرازيـل وطفـوح=تركي على راس الغزال اللواحـي
وجاهن عقيـدٍ زاحهـن كلهـن زوح=وربعـه وراه يجمعـون الطيـاحـي
و تخالفوا عند الطفـوح أم طلطـوح=أم الخراطيـم الـطّـوال الشنـاحـي
و أن صد قام الغيض يسقيه ذرنـوح=وإليا بغى يفتكهـا ، مـن يناحـي ؟
وجاهم بدون شعور مع راس جـردوح=و رموه عطبيـن المرامـي وطاحـي
كد كنت عن روس المراقيب منصـوح=نصيحـةٍ مـا كلـلـت بالنجـاحـي
قام الحمام ينـوح فـي قمـة الـدوح=غنـى وأنـا نايـم وفزيـت صاحـي
أخذت لـي غطـه وصحانـي النـوح=وقعدت ألاحـي ليـن لاح الصباحـي
و عديت من روس المراقيب لحلـوح=لحلوح مـن روس المراقيـب فاحـي
مدملجٍ ممسـوح جنبـه تقـل لـوح=مثل الزجاج تمـوج عنـه الرياحـي
عديت به سالـم وحولـت مجـروح=وأنا أحسب أنه سلوتـي و انشراحـي
حولت في جرحيـن مغلـق ومفتـوح=وطعون شلفٍ مـن جميـع النواحـي
وشميت لي ريحٍ خطيرٍ علـى الـروح=ريحـان والريحـان سـمٍ ذحـاحـي
لاكـان كاننـي تشافيـت مسـمـوح=وإن مت جعلك مـن ذنوبـي مباحـي
إلا أن حبك تقضيـة وقـت ومـزوح=قلها على المكشوف وأطلق سراحـي
ما يشبع الجيعان من ريحـة الفـوح=ولا يزي الضميان شـوف الضحاحـي
لا زم تبين لي عن الحـب منضـوح=ما بالخفـى خيـر البيـاح البياحـي
أما أنتظر وإلا أنسحـب عنـك وأروح=وأنته تروح وجعـل دربـك سماحـي
و راسك من الشرهات بالسمن ممسوح=واللي طونّـه بيـض الأيـام راحـي

تعبـت واتعبـت فكـري فـي تفاكـيـره=اللـي لهـا داع واللـي مالهـا داعــي
اللـي لهـا فـي جليـل الملـك تذكيـره=في تالـي الليـل يـوم النـاس هجاعـي
من ضاع له شي لـو كثـرت تحاسيـره=كد قيل مايحيـي الميـت بكـاء الناعـي
يامـل قلـب ٍ تقـل فـي داخلـه نيـره=مافيـه عـرقٍ متيـن وغـض ماماعـي
امسـى مثـل وادي ٍ خضـراء نواويـره=واصبـح مثـل واديٍ مافيـه مربـاعـي
حطيتنـي يازمـان الغـدر فـي حيـره=ضيعتنـي بيـن مدخالـي ومطـلاعـي
الهـم دقيـت فـي كـبـدي مسامـيـره=سـم الافاعـي تجرعـنـي تجـراعـي
الغـيـب لـغـز ولا يعـلـم بتفسـيـره=ياكود مـن ترقـد العالـم وهـو واعـي
الملـك بيـديـن راع المـلـك تدبـيـره=مايملكـه لاملـك دولــه ولا راعــي
ربي وانا ارجيه ماارجـي واحـدٍ غيـره=هو الذي فـي يـده تحسيـن الاوضاعـي
يالعبد لـو طـرت مالـك عـن مقاديـره=اليـا نـوى شـي مالـه عنـه مناعـي
لو تشلـق الثـوب مـن ذيلـه لازاريـره=والا تقطـع مـن الفـرحـة تقطـاعـي
الوقـت لابـد لـه ضحكـة وتكشـيـره=متـعـرضٍ للتقـلـب والتـزعـزاعـي
اسري مع الليل مـن ديـرة الـى ديـره=والليا اصبح الصبح ضعت وضاع مرماعي
ألعـب بشعـر النبـط وأوزن معايـيـره=وزن الذهـب بيـن متسـوق وبيـاعـي
والصعب ماهو عليـه صعـب تصخيـره=الليـا بغيتـه يطيـع يصيـر مطواعـي
واليوم كثـروا علـى الساحـه مغاويـره=كلٍ ركـب لـه جـواد وجـاك فزاعـي
مافيـه عـدٍ يعرفـون العـرب بـيـره=الا بجنبـه ثمانـيـن الــف نبـاعـي
وكـل لحالـه تصفـق لـه جماهـيـره=ياكثر صفق الكفـوف وطـق الاصباعـي
لو يابـس السـدر ماعاشـت عصافيـره=تصرعـت قبـل مايابـس تصـراعـي
كـلٍ يقيَـم وقــدرة مـثـل تقـديـره=الحـج لله واجــر الـحـج للسـاعـي
وكـل يحاسـب علـى مبلـغ فواتـيـره=والخـام باليـاردة والكيـل بالصـاعـي
لـو البضايـع تبـاع بـدون تسعـيـره=مايمـرح الفقـر فـي مخبـاة طماعـي

اليا رزقنا الله نبي نشتري جيب = آخر موديل .. اللي تحنه عن اللمس
مافيه لاطقه .. ولافيه تهريب = وصوته مثل صوت المناجاة والهمس
لكن متى مايسره عالم الغيب = وإلا السفر ماعاد نطريه بالجمس
خفنا وخوفنا وشفنا به الريب = عقب الطريق اللي عطيناه قبل أمس
ولولا مديله راح مابه عذاريب = بَوش ولونه كد تغير من الشمس
والوقت بَيد ناطحين المواجيب = اللي يغمسون اللحى بالدسم غمس
مروية علط السيوف المحاديب = من مقدم السلة إلى مقبض الخمس
ماباقي إلا ذكرهم مع هل الطيب = باقي وهم بالمجتمع مالهم رمس
باموالهم ماورثوا عقبهم صيب = قضوا وهم حيين بالطبخ والحمس

ياسعود عسى داركـم عمهـا السيـل=عقب البروق اللـي تكاشـف جهتهـا
عطنـي جميـع اخبارهـا بالتفاصيـل=عسـى الرجـوع التالـيـة سيلتـهـا
لعلهـا دايــم تـصـب الهماليـل=علـى الفـروع جبالهـا واوديتـهـا
دار ربـو فيهـا الرجـال المشاكيـل=من ماضي الايـام مـا احـد شمتهـا
حمايـة الخايـف وصبابـة الهـيـل=وعوق السمين الللـي تمـوح ذنبتهـا
لو كان ما رجي من وراها محاصيـل=مير الرجـال تحـب مـن سامعتهـا
وفي ضفهـم راع العيـون المكاحيـل=اللـي يـذوب القلـب مـن سلهمتهـا
إلى اقبلت قـام يتكفكـف دجـا الليـل=كـل الـديـار المظلـمـة نورتـهـا
وإلى ادبرت غطت جسدها المجاديـل=بيـن الخلايـق لـو تعـرى كستهـا
أن كفتـه مثـل الغصـون المحاميـل=وان فلـتـه قــام يتثـنـى تحتـهـا
كنه سبيب اللـي ليـا ماحـت الذيـل=راسـه تعـدى راسـهـا وارقبتـهـا
صفرا وهي بعذارها سمعـت الخيـل=اشد من ضـرب الدفـوف أرجفتهـا
وقامت تشيل بنفسهـا بالسمـاء شيـل=وصاح النذيـر وسبـق الخيـل جتهـا
خيالهـا دايـم علـى خصمـه الميـل=إلـى فـرق رجليـه عـن معرقتهـا
شيـخ مضريهـا لنـطـح المقابـيـل=صـوب الخـلا بعنانـهـا ماعفتـهـا
تفرح بـه اللـي ماروراهـا رياجيـل=وصكت عليهـا خيـل قـوم وخذتهـا
عن كبدها يجلـى الصـدا والبهاذيـل=إلى لفت فيـه الصـدف مـن بختهـا
نادى لهـا يـام الحلـق والخلاخيـل=ويـن اتجـاه القـوم يـوم اقتفتهـا
وقامـت بذرعـان زهتهـا المفاتـيـل=تنعـت وراهـم ليـن وكـد نعتـهـا
وقامت تزغـرد بالغنـاء والمواويـل=وجاه الدهاش وشاش مـن غطرفتهـا
وأومى بهم مثـل الهـوى بالمخاييـل=وضاقت بهم جـرد السهـال وسعتهـا
من راح ماعود ومن طـاح مـا شيـل=وقطم الحذا راجـت عليهـا غبرتهـا
فيما مضى واوردتها ضـرب تمثيـل=لوكـان دورات الزمـن كـد محتهـا
دنيا تفـرق شمـل جيـل بعـد جيـل=قدامـنـا كــم عـاالـم فرقـتـهـا
دارت بنـا الايـام مثـل المحاحـيـل=عنهـا نحـت فيـه وعنـي نحتـهـا
نحت ولاجتنـي خطـوط ومراسيـل=وإلـى كتـبـت رسـالـة ماقرتـهـا
لاكـن قـرار الحـب مافيـه تعديـل=لو عشت بالدنيـا إلـى آخـر سنتهـا
هاض الضمير وقلت من عر ض ماقيل=واخير مـن سـرد العلـوم اثمرتهـا
اختـرت ماتصصلـح عليـه التعاليـل=عند الرجـال اللـي تصـوغ أمثلتهـا
بعض الرجال يقابـل الكيـل بالكيـل=وبعـض الرجـال تحدهـا معرفتهـا
والنـاس بالللـي ماتعرفـه جهاهيـل=ويبيـن غـيـب قلوبـهـا بالسنتـهـا
وتعـرف فصيلـة دمهـا بالتحالـيـل=وتبـيـن جنسياتـهـا مــن لغتـهـا

يا وجودي وجد مجروح الفـوادي=من هنوف ثوبها يجـرح نهدهـا
شافهـا بالملعبـة يـوم العيـادي=طشت الشيلة و ماحت في جعدهـا
كنهـا بالملعبـة صفـرا تـرادي=بالحبـال اللـي ملـواتٍ عقدهـا
سمعت أصوات العزاوي والهنادي=من عياطير السطر يطفر زبدهـا
تحتري شيـخٍ يقـود ولا يقـادي=منكفٍ بطماعـةٍ لحقـوا طردهـا
لحقوا الفرسان بظهـور الجيـادي=وكل راعي مهرةٍ ركـب ولكدهـا
لابةٍ تقلط علـى جمـع المعـادي=مير ربي عاقها وأطفـى سعدهـا
خيلهم يم الخـلا عقـب الطـرادي=ما تبقي مـا يبقـى مـن جهدهـا
روحت مثل النعام امـع الحمـادي=يوم سمعت صوت خيالٍ رهدهـا
بنت شيخٍ مـا ينافـس بالشـدادي=كلمتـه كـل القبيلـة تعتمـدهـا
ما تلد بعينها في شخـص عـادي=ولا يسود الغابة إلا حكـم أسدهـا
أتفق معها علـى غيـر الفسـادي=ايتزوجهـا وياخـذهـا بيـدهـا
فوق خبرا جمعـت كـل البـوادي=كل من علم بهـا شـد ووردهـا
سيلتها يـوم هـل قـران حـادي=مزنةٍ كبر القطاة أصغـر بردهـا
وكل مدة قيضهم والوضع هـادي=وأن حصل له فرصة جدد عهدهـا
لين قام الحـر ينقـص والبـرادي=يتزايد والمـزون أوحـم رعدهـا
ناحرت لديارهـا قطـم التـوادي=أورحت ريح الحيـا يمـت بلدهـا
وأرسلوا عساس للعلـم الوكـادي=ثم جاهم فـي علـومٍ مـا بعدهـا
ما بعدها غير صوت اللي ينـادي=وكل راعي خيمـةٍ شلـع وتدهـا
وقربوا حمر الونيتـات الجـدادي=والبيوت السود طاروا في عمدهـا
أستخفـوا تقـل قافيهـم هجـادي=كل ما جو مصغرٍ شالـوا ولدهـا
مالهم يم الغنـم شـف ومـرادي=مـا شقـوا بنعيمهـا ولا نجدهـا
روحت قطعانهم مثـل الجـرادي=تتعب الحساب ما يحصي عددهـا
والهوى معروف شيٍ لا إيـرادي=والنتيجة موسفة ما أحـدٍ حمدهـا
يتسرب مع حـلاه مـن المبـادي=سم حية والفـراق أمـر وأدهـى
لو صبر راع الهوى صبر المهادي=الجروح تبيـن لـو أنـه جحدهـا
أنطلق مع دربهـم حاديـه حـادي=وكل ما جاء نزلةٍ مـر ونشدهـا
لين بـاد ولا لقـى علـمٍ وكـادي=باهت الأخبار عنهم مـا وجدهـا
كنت غادي وأحسب المدّل غـادي=والنتيجة تنكشف لو طـال أمدهـا
كنت أغني مـع مغنـي يابـلادي=وأحسب أن اسمي مسجل في سندها
لين عرضت للمسـاوم والمـزادي=عكس ما جاء في كتاب اللي مهدها

الله يباشر خبة النقع بالسيل=من المزون اللي حقوق ٍ هللها
عسى عليها كل ليلة هماليل=عقب المحل . . لين يتشابك نفلها
ياما أذبح فيها من الحشو والحيل=بمخيمات ٍ تكرم الضيف أهلها
وياماسطع فيها شعاع القناديل=عنها غياهيب الظلام يعزلها
عشرين ليله كن مالله خلق ليل=أضواء ونيران ٍ تشاعل كتلها
كل القبيلة دون شرح وتفاصيل=ماغاب غايبها بكامل خصلها
تكاتفوا بالمهرجان الرياجيل=كل ٍ حضر وأقصى جهوده بذلها
وسدم طريق اللي يدور مداخيل=وكل القبايل في نجاحه ذهلها
وحرب ٍ هل الامجاد جيل ٍ بعد جيل=لهم فعول ٍ غيرهم مافعلها
موثقه من دون إضافه وتعديل=ومن لايسند حجته ماعدلها
فعل الوسيدي صدق ماهو بتمثيل=دون الخوي روحه تسبب بأجلها
والقبع خاله قص يمناه تنكيل=وستة نفوس بحد سيفه قتلها
وحجرف ذلوله يوم جوه الهواشيل=قام ونحرها للضيوف ونجلها
والليا تعلم ضمر الجيش والخيل=كم قطنة ٍ ماخلوا إلا حللها
وفعولهم ماهي ماغير المصاويل=حتى العجم خاضوا معارك دولها
واليوم توه قام حظ الوبابيل=كل ٍ عرض ذوده عقب ماسملها
في عدها المطلوب غير المخاليل=خمسين متن وكل ذود بفحلها
كله بسبة ثالث الجدي وسهيل=أبن دليم اللي بجهده صقلها
عبدالله اللي ذلل الصعب تذليل=يوم أوثقت به لابته ماخذلها
شق الطريق وطنش القول والقيل=تمره العوجا وتمشي قبلها
من كل جانب كلل الجهد تكليل=لين الأمور اللي يبيها وصلها

إن كان تنشد عن علومي وأنا صبي= ابتذكرها واعلمك عنها
لو هي بصفحات ٍ طواها الزمن طي= جرة مطر جاها عجاج ودفنها
ألعب طواريق الهوى مع هل الغي= اثقل المعنى واخفف لحنها
والشعر يبقى في قلوب العرب حي= ولا كل من سوى القصيدة تكنها
وأنا حداها حدي الاصعاب بعصي= واقودها قود الاديب برسنها
والحب مردوده على صاحبه سي= كم ضحكة ونَات قلبي ثمنها
أذكر سنة تسعه وتسعين هجري= الف وثلاثمية بداية زمنها
زلت بي الاقدام للشمس من فيَ= اقدار والاقدار تومر وتنهى ّّ
غافل وجتني من كوت خافقي كي= كية عطب لولا طبيب مكنها
أبعدت مضربها عن الصدر بيدي= ولدَت على كبدي برمح طعنها
وعرفت ماتخفيه في صدرها لي= من واقع النظرات مني ومنها
نظرت فيها مثل نظراتها في= وعجزت اقاومها وصديت عنها
كل النساء ظلماء وهي بينهن ضي= غطت شعاع الشمس أشعة بدنها
من الذهب تلبس خلاخيل وحلي= سود محاجرها وحمر وجنها
مدري تسمى من ومنين ومن أي= وش هي قبيلتها وموقع سكنها
راحت وانا مااعرف من اخبارها شي= الا رموز الموتر اللي حضنها
مدينة من بين ابو ظبي ودبي= لعلها كاننها هي وطنها
تمطر عليها السحب هذي ورى ذي= وديم الليا قفى تراها ودنها

يامل عيـن لهـا يوميـن زعلانـه=ومن الزعل نومها ماهـي أباغيتـه
من كلمة يوم جتنـي مالهـا خانـه=مدري لها قصد وإلا بـس تفويتـه
ياليت بعض الاوادم يقطـع لسانـه=الخبل يزعجك مير إن جاك وإن جيته
الخبل لاتنشده لو هو عـن اخوانـه=لاتنشد الخبـل ثـم تـدق ساقيتـه
واللي ورى التايهه يغويه شيطانـه=ويجنب اللازمه لو جـات ناصيتـه
لأدناة حاجة يجيك يشيـل محجانـه=أشجع من الكلب عند أطناب راعيته
خله لعـل الكـوارث بيـن حجانـه=ويطيح في واحـد ويفـش عافيتـه
من غرب ماهومن اصحابه وجيرانه=والااقرب الناس طابختـه وشاويتـه
وضعيف النفس لو تعطيـه رمانـه=حطك مثـل واحـد يحييـه ويميتـه