::|[ديوان النابغة : شاعر المستحيلات/سعود بن سليمان الحارثي ]|::

همي اللي كل مانام خال البالي =شب مابين الحاديب نارٍ حيه
لي سنة وانا على نفس ذا الموالي =الليال تمر والوضع زيه زيه
ياوجودي كل ماقيل كيف الحالي؟=وافتكرت الحال واوجزت فالرديه
لو ما ينشد الحال كان أشوالي=كان أبنسى هم قلبي واسج شويه
وياوجودي كل ما أقنب على الاقذالي=ذيبٍ أشهب ذابحين القنوص وخيه
وجد شيخٍ عاش سابق سنينه سالي=وبعد عزه فارق المال والذريه
أتوجد كل ماهبت الريح من شمالي=واتوجد كل ماغنت القمريه
وجد.. ماهو وجد صبٍ فقد له غالي!!=وجد من جروا عليه الخبول الهيه
أوقفوه بموقف القهر والاذلالي=في مجاريرالخطا ماعليه دعيه
من سببها بين حدب المحاني صالي=نار بدوٍ لافها الريح في بريه
يازمن مجبور أجر اللحن والالي=بي ثلاث أهات بيّن وجعها فيه
أه . ما اقوى طعنةٍ دمها ما سالي=طعنة النكران لا طعنة الشبريه
وأه . من كاس السموم مقرب الآجالي=فيه من سم العقارب وسم الحيه
وأه. من رفق المهابيل والانذالي=الوجيه العابسه والقلوب السيه
يازمن بلغ جرادٍ رقى في عالي=يفتكر ماضيه او يفتكر ماضيّه
الدلو دلوي وكل الحبال حبالي=وأسقي الظامي من العيلم المطويه
ومن ترعرع في ظلالي وأكل من مالي=لو يعرف الحمد والشكر حب يديه
الله أكبر كم عطيته نفيس وغالي=ماحسبت و قلت ذا لك وهذا ليه
يازمن من ماله اول فلا له تالي=والبلاده تهدم الحله المبنيه
ومثل ما الاذواق طعمين مر وحالي=الرجال أ ثنين يا عارفه ياعيه
واحدٍ كله مهابه وثقل جبالي=غير من يبدي سدوده على الطرقيه
واحدٍ في ساحة المجد صال وجالي=غير من يقطف ثمر شجرة مرويه
يازمن من شوفة الخبل طار جلالي=ماتحمل نبرة ا للهجته السوقيه
ما اتمنى الا فراقه و أعيش لحالي=لو أغارم مع هل الهند والجاويه

شبيت نار الشعر والقاف جمّر= وسليت سيف المعرفه من جفيره
وفتحت للهاجوس خمسين معبر=وأطلقت ترفات البيوت الأسيره
وسد القصايد بالفرايد تفجر=مايجذب الا بنت شيخ وأميره
جني يجرن الخطا في تغندر=هذي ورا هذي بنفس الوتيره
طبعي بعسرات البيوت أتندر=ألعب بها لعب الهويدي بطيره
أقدر عليها مير به غيري أقدر=الشعر فنه والقوافي سميره
قريحته كأنها عين مجهر=مايقنص الا الجافل المستذيره
يامرحبا به كثر طاريه وأكثر=من ألجراد اليا أرتفع في مطيره
في واجبه رقيت عالي مشهر=وسبحت غبات البحور الغزيره
ياقاف !! بعد ضيافتك!! للورا ُدر!!=واجبك ياعيني أكمال المسيره
أركب على اللي ماشروه المعسّر=(BM) مركاب الوجيه السفيره
ماركبو له بالمقاسات شمبر=من الوكالة ماتغير سبيره
اليا أشتغل عن مايخالجك عبّر=تلحن "البُرده" على صوت سيره
واليا مشى مشيه غناج وتكسر=أقفاي ليلى وأعتراضت شهيره
واليا وقف ذكرت تاريخ هتلر=تشعر برعب ونشوه وقشعريره
في فزته طول المسافت تقصر=أحسب دقايق من" قيا" للفجيره
لامن دعس دواسته حن وأزفر=يهز كبوته تعاقب زفيره
يحق له على الجيوب يتجبر=مثل الاصيل اللي يشوق هديره
مالوم سواقه ليا صد وأغتر=ومالوم راع الجيب لو مات غِيره
قاضب دركسونه غلامٍ تحدر=من صلب شيخٍ ساد كل العشيره
من "العضاوين" ..أهل السيف الابتر=يشهد لهم موقف وسمعه وسيره
والخال" شدادي" على العاصي آخطر=من شبل ضرغامٍ يعاجل زئيره
ياذيب هذي عزوتي وأتفاخر=من غير قاصر فالنصير ونصيره
الأد" قشعر" للعدا طعمهم مُر=اليا نووا على المعادي كسيره
عدوهم لو هو تهقوى وفكر= يده قصيره لو عينه بصيره
كم واحدٍ بغى المطاليع وأجحر=سربة عيال العود حاسوا مريره
يا سايقه يم الرهاوي تبدر= والله يجنبك الوجيه الشريره
أنا أشهد إنه نسل حرٍ محرر=من الرجال أهل السيوف الشطيره
مافيه يوم من المواقف تذمر=ولا ناظرت عينه لحرمة قصيره
نمرٍ على روس النمور يتنمر=الله من صدوف الليالي يجيره!
سند على ابيات شعرٍ كما الدر= والله علام الخفا والسريره
ورديت له عقدٍ من اللو لو أندر=أبيات شعرٍ بالقراءه جديره
إن كان لأمنه قراءها تأثر=أكيد شعري يحتوي مايثيره!!
واليا أنذهل من مايشوف وتسمر=في ماقفه ..أقر عليه الأخيره
سعادة الشبل العزيز الموقر= رهاوي القاف العسير واميره
سلام مني عد ماهل وأمطر=الوبل من روس المزون المطيره
من بعدها حب العذارى مقدر=من عهد ابو زيد الهلالي وعيره
أحدٍ ورد جمه وذاقه وصدر=وأحدٍ تهقوى وأنقطع حبل بيره
اللي يسجل فيه نصرٍ مؤزر=يعيش لحظات الغرام المثيره
واللي يجي على عماه يتحمطر=يشين حظه وٍ يتفرش حصيره
لكن دور واحدٍ حظه أكبر=من حظك اللي منتهي واستعيره
وإن كان ماتيسرت لك تمصر=أن كان تبغى المنفعه والبريره
الشافعي قبلك فأهل نجد عذر=مايلحقك عارٍٍ ولا فيه عيره
وتلقى بدلها زين مظهر ومخبر=أما تجيب عهود والا شكيره
يا الله تفتح كل بابٍ مسكر=بحسناك..شقحاً للرهاوي وزيره!
اليا بدت له بالقميص المشجر=يروق جوه ويتونس نظيره
من بعدها خلك حريص وتحذر=الأدمي ترى حذيره نذيره
وبني بكر لو حلقوا راس جحدر=ماطاح في نحر الخيول المغيره
أعبر على الدنيا ومن عاش خبر=تصغر بعينك لو كانت كبيره
وخلك مع الأدنين طيب وسكر=لو ذقت كاسات الرفيق المريره
واليا أذنوا بالمسجد "الله أكبر"=أطلب من الله الرجا وأستخيره
والخير له منبر وللشر منبر=والوضع مايخفى قناة الجزيره
واللي طلبني شور يامر ويبشر=ومن لا يشاورني فلاني شويره

يالله الـــوذ بـنــور وجـهــك وذاتــــك=يــارازق فــروخ العصافـيـر فالـعـش
ثــبــت لـسـانــي يـاكــريــم بـثـبـاتــك=وصونه عن الزلات والكذب والفحش
تبـيـنـت لــهــل الـعـقــل مـعـجـزاتـك=رفع الكواكب وأستواءك على العرش
من صد عن شرعتك وأهمـل صلاتـك=يخـف ميـزانـه ويـرجـح بــه الـقـرش
مــن بعـدهـا ياشـعـر حـلـت طـراتــك=أنـا زهمتـك وأنـت قــل يافـتـى عــش
بـيـتٍ سمـعـتـه نـبـهـك مـــن سـبـاتـك=والجـزل لقلـوب أهـل الجـزل منعـش
قـلـبـك دلـيـلـك مايـخـالـف وصـاتــك=يالشاعـر اللـي عـجـز بيـتـه منـقـرش
حذفـت فـي وجـه الرخـوم بحصـاتـك=قـصـيـدةٍ تـقـفــل عــلــى قـافـيــة أش
وجـب علـىّ أكتـب واسـوي سـواتـك=قـافٍ يطـش أهـل هـروج القفـا طــش
أحــدٍ لـيـا مــن حــل طـاريـك شـاتـك=فأعـراض خلـق الله كـا لكلـب ينـهـش
زاد حـسـنـاتـك وأحـتـمــل سـيـئـاتــك=من الأثم يحمل ضعف مايحمل الهرش
وأحــدٍ يغيـضـه يــوم تظـهـر بـراتـك=سمّـاع للباطـل..عـن الـواقـع أطــرش
وأحـــد يتـمـنـى لـــو يـقـطـع بـتـاتــك=حـسـود ومنـافـق وشـغـلـه تـوشــوش
لـو كــان بيديـنـه سـعـى فــي وفـاتـك=وليا شاف زولـك قـال يـا مرحبـا دش
وأحـــد يتـصـيـد زلــتــك وهـفـواتــك=هذاك واجـب منـك تقلـب لـه الفـرش
جـنـب عــن الـرديـان وابـعـد مـبـاتـك=أرحل مثل ما يرحل الناس والطـرش
وأطلـب مـن المولـى ثبـات خطواتـك=الـلـي بحكـمـه سـخـر الـمـوج للـنـش
ولـيـا بلـيـت بـواهـيـه مـــن عـزاتــك=إن كان تمشـي مثـل قـول المثـل مـش
والا تـأبــط شـــر وأقــلــب عـبـاتــك=وأن كان تقـدر هـوش يامسنـدي هـش
وأخيـر مـن بعـض السوالـف سكاتـك=اصـمـت وكــب البـربـره والتـحـرش
قــــدام لايــجــرح لـسـانــك لـهـاتــك=تـتـبــع شـيـاطـيــن الاوادم وتـبــلــش
والصـاحـب الـلـي مايقـيـل عـثـراتـك=أخـيـر مـنـه أنـغـام فـريـد الاطـــرش

سلام يانسل الرجال الحلاحيل=اهل العلوم الغانمه والجميله
يابحر ياشلال يانبع ياسيل=يافارسٍ قوافي الشعر خيله
ياللي بيوتك مبهمات ومفاتيل=الشطر ثابت والمعاني ثقيله
من شوقي الشاعر الى شاعر النيل= كلٍ من الشعار قافه دليله
ياجيل في شاعر..ويا شاعر الجيل= الحرف يطربني صداه وهديله
وأبدع مع أهل الشعر قاف ومواويل=وأرافق اللي قربهم ينعي له
الطيبين..الطاهرين..المشاكيل=طب الكبود المعطشات العليله
أحبهم بالحيل بالحيل بالحيل=بالطيب حازوا كل خصلة نبيله
أختص ناصر خُص من دون تاويل=حرٍ رقى فالقمة المستحيلة
إن كنت تبغى من علومه تفاصيل=السيف تكفي لمعته عن صليله
أعمل لدمه فالمعامل تحاليل=تلقى المراجل في عروقه فصيلة
ولو للوفى والطيب وزن مكاييل=رجح على كل الموازين كيله
حلحيل حلوٍ مر جبار وحليل=طيب..وكرم..وأحساس فطنه وحيله
مثل الجمل يركي للاثقال ويشيل=يابعد ناهاته وياقو حيله
راع الدلال الصفروالبن والهيل=عسى تفداه الكفوف البخيله
أبن بدوي..ماعاش في جو تدليل=ولا أفطر على الببسي وصحن البليله
ولا حط في جيبه دهان ومناديل=أخشن من اللي مارقد طول ليله
ذيبٍ سرى والوقت مقرود وبخيل=وجر العوا فوق الرجوم الطويله
في البر يتلى الفطر الشيب والحيل=وزاده لحم صيده و خبز المليله
مع سربةٍ خيالهم يرعب الخيل=فرسان حرب..انعم بها من قبيله
ضعونهم تمشي مقافي مقابيل=في قفرة فيها يضيع الدليله
اليوم نزاله وبكره محاويل=برقٍ رعت نبته وبرقٍ تخيله
هذا الصحيح ولا نعد الاباطيل=مجدٍ كتب فالوحه المستطيله
وهليت له من نو قافي هماليل=يهل هتانه ويدرج مسيله
قافٍ سبكته غير عن كل ماقيل=أهل القصيد اعرف بعدله وميله

قال من عدا على الرجم السماوي= قمةٍ في طول قمة منتدانا
لايغرك يالسنافي قول راوي=كان ياما كان مدري ويش كانا
نجم ثابت في سماه ونجم هاوي=وأعمق القامات ياصلها رشانا
ياموردها على العد الرهاوي= الله يجمعنا ولا يشقر عصانا
اصل زايد طيب قلي وش يساوي؟=والشعر وش ميزته عن ليل دانا؟
دارنا مرباع عن دار السناوي=وعن حيا أهل البخل يكفينا حيانا
من نصانا سيلنا يمه نحاوي=كلنا منحين لك يامن نصانا
ومن قطع في صدته روس العراوي=عن متابع خطوته تكرم لحانا
رغم حبك يا شليوح العطاوي=لو تقادح برق بيشه ما شعانا
والوجيه اللي تخفت بالغطاوي=مدري من أقرابنا والا حددانا
"نت" تجمع صفحته سبعين واوي=يدرج الموجه علينا ويحدانا
اشتبك فيه القبيلي والحساوي=وأشتكى فيه السعيد من الحزانا
يستعيرون الاسامي..والشقاوي=من عطاهم صدق أو بعض الأمانا
يدعي بالذود تياس وشواوي=ياما حثينا على دربه خطانا
ويدعي بالمعرفه غِر وعماوي=أبتلشنا بالتفلسف وابتلانا
تحسب الرجال من كثرالسناوي= وصل واشنطن ومدريد وهفانا
واشهد انه ياهل الأفكار خاوي=منكشف للعارفين أهل البيانا
وأنا ربعي يستعيبون الشكاوي=لو تشب النار فينا ماشاكانا
يعني ماهوطبعنا بحث القصاوي=مير جرتنا الدعاوي وأدعانا
وأبحث المعنى مع الحر النداوي=الحصان أبن الحصان ابن الحصانا

فزيت لك كلي بشاشه وترحيب=وسطرت لعيونك جزيل القوافي
وقفه ولحظة صمت بارض الاجانيب=ملبورن قدامي وسدني خلافي
وقفة وفا لك يابن عمي ولاريب=تستاهل التقدير باين وخافي
ساعة قريت رسالتك قلت ياطيب=أصلك عسى أيامك سرور وعوافي
اصل أنت درع الجنب الراس والجيب= أبا أعترف لوما تريد أعترافي
في وصف مثلك يعجز القاف ويشيب=ولو استمد البحر ماهوب كافي
نزهك ربي عن جميع العذاريب=كريم..قرم..صعيب..سهل..وسنافي
المجد كله قاضبه بالتلابيب=وملحفه بشت الكرامه لحافي
اثني عليك بصدق فالسر والغيب= بابيات أحد من السيوف الرهافي
ما أكتب قصيدي لجل مال ومطاليب= عزيز لو احيا حياة الكفافي
عيبٍ علىّ أبيع يامسندي عيب= شعري ولو أمشي على الشوك حافي
ولا انشر ابداعي في مجلة رعابيب =اما أنا والا فتاة الغلافي
ولوغبت عن عيني فلا والله يغيب=طاريك يانسل الرجال النظافي

البارحه عدت بي العبره على روس الهضاب=في قمةٍ هوج الرياح العاتيات تشوتها
وقفت صامت في مكاني لاسؤال ولاجواب=أدرج نظر عيني على قيعانها وخبوتها
وهبت على صدري هبوب الشوق أشد من الحراب=وتنازعتني لهفة الذكري وطاري فوتها
لين فتحت بين الضلوع الحدب للاشواق باب=ثم أستفاقت ذكريات الصب من تابوتها
وقمت أترنح كن يمشي في عروقي سم داب=ترنح البحاره اللي مال مقدِم بوتها
أهب ياطاري فراق الترف منقوش الخضاب=أدمى عيوني واستهلت وأنتثر ياقوتها
ياعَذبةُ الأحساسْ ياكل الأحاسيس العِذاب= قصايدي من نور وجهك تستمد بيوتها
أطلالتك رحمه وبعدك عن سماء حرفي عذاب= حضورك الطاغي ولا صمت الحروف وموتها
يا ملهمة كل الحضور وسيدة كل الغياب= نادت عليك القافيه..تصيح بأعلى صوتها
عودي على وعاتبيني كأن يرضيك العتاب= يا أكسجين القافيه ياروحها ياقوتها
والا جذبت الصوت بعد الصوت مع سحم الذياب=في قمةٍ هوج الرياح العاتيات تشوتها