::|[ ديوآن آلشآعر آلفآرس/شآلح بن هدلآن آلقحطآني/رحمه الله]|::

لا واخو لي عقب فرقاه باضيع
=كني بما يجري على العمر داري
اخوي يا ستر البني المفاريع
=ومطلق لسان اللي باهلها تماري
ما قط يوم شد بين الفراريع
=باكود ما بين الكمي والمشاري
ليته عصاني مرة قال ما طيع
=كوداني اصبر يوم تجري الجواري
انا اشهد انه لي سريع المنافيع
=عبد مليك لي ولاني بشاري
تشهد عليه مناتلات المصاريع
=واعده من كفه تشوف العزاري
يمناه تنثر من دماهم قراطيع
=وعوق العديم اللي بدمه يثاري
جداع سفرين الوجيه المداريع
=مخلي سروج الخيل منهم عواري
القلب ما ينسى بعيد المناويع
=ليث على صيد المشاهير ضاري

امس الضحى عديت روس الطويلات
=وهيضت في رأس الحجا ما طرا لي
وتسابقن دموع عيني غزيرات
=وصفقت بالكف اليمين الشمالي
وجريت من خافي المعاليق ونات
=والقلب من بين الصناديق جالي
واخوي ياللي يم قارة (خفا) فات
=من عاد من عقبه بيستر خمالي؟
ليته كفاني سو بقعا ولا مات
=وانا كفيته سو قبر هيالي
وليته مع الحيين راعي الجملات
=وانا فدا له من غبون الليالي
واخوي ياللي يوم الاخوان فلات
=من خلقته ما قال: ذالك وذالي!
تبكيه هجن تالي الليل عجلات
=ترقب وعدها يوم غاب الهلالي
وتبكي على شوفه بني عفيفات
=من عقب فقده حرّ من الدلالي
عوق العديم ان جا نهار المثارات
=والخيل من حسه يجيهن جفالي

ما ذكر به حي بكا حي يا ذيب
=واليوم انا ببكيك لو كنت حيا
يا ذيب يبكونك هل الفطر الشيب
=ان لا يعتهم مثل خيل المحيا
وتبكيك قطعان عليها الكواليب
=شيال حمل اللي يبون الكفيا
وتبكيك من صكت عليه المغاليب
=ان صاح باعلى الصوت يهل الحميا
ننزل بك الحزم المطرف ليا هيب
=ان رددوهن ناقلين العصيا
انا اشهد انك بيننا منقع الطيب
=والطيب... عسر مطلبه ما تهيا

ياذيب انا يابوك حالي تردى
=وانا عليك من المواجيب ياذيب
تكسب لي اللي لاقح عقب عدا
=طويلة النسنوس حرشا عراقيب
تجر ذيل مثل حبل المعدّا
=وتبرى لحيران صغار حباحيب
واشري لك اللي ركضها ما تقدا
=محدن لقى فيها عيون وعذاريب
قبا على خيل المعادي تحدا
=مثل الفهد تاثب عليهم تواثيب
انشهد انك باللوازم تسدا
=وعز الله انك خيرة الربع بالطيب
يلي على ذيب لا سرايا تعدا
=لو حال من دونه عيال معاطيب
ليث على درب المراجل مقدى
=ما فيك يا ذيب السرايا عذاريب

ياربعنا يلي على الفطر الشيب
=لا والله الا ضاع منكم وداعه
رحتوا على الطوعات مثل العياسيب
=وجيتوا وخليتوا لقلبي بضاعه
خليتوا النادر بدار الاجانيب
=وضاقت بي الافاق عقب اتساعه
تكدرن لي صافيات المشاريب
=وبالعون شفت الذل عقب الشجاعة!
يا ذيب انا بوصيك لا تاكل الذيب
=كم ليلة عشاك عقب المجاعة
كم ليلة عشاك حرش العراقيب
=وكم شيخ قوم كزته لك ذراعه
كفه بعدوانه شنيع المضاريب
=ويسقي عدوه بالوغى سم ساعه
ويضحك ليا صكت عليه المغاليب
=ويلكد على جمع العدو باندفاعه!
بيته لجيرانه يشيد على الطيب
=وللضيف يبني في طويل الرفاعه
جرحي عطيب ولا بقى لي مقاضيب
=وافخت حبل الوصل عقب انقطاعه
كني عقب فقده بحامي اللواهيب
=وكني غريب الدار مالي جماعه
من عقب ذيب الخيل عرج مهاليب
=يا أهل الرمك ما عاد فيهن طماعه

ضيف الله اشرب ما شربنا مرارهْ = اصبر وكنّك شالــحٍ يوم حَزّنْ
راح الفديع اللي علينا خســـاره = واخذ قضاه عبيد حامي ثقلهنْ
يمنى رَمَتْ به ما تجيها الجباره = اللي رمت بعبيد في معتلجهنْ
من نسل ابوي وضاري للشطاره = يصيب رمحه يوم الارماح يخطِن
وعبيد خِللّي طايحٍ بالمغـــاره = عليه عكفان المخالب يحومن
وعادتنا بالصيد ناخذ خياره = ثلاثة الجذعان غصبن بلا مَنّ
يا قاطع الحسنى ترى العلم شاره = لابد دورات الليالي يدورنْ
حريبِنا كنّه رقيد الخـــباره = خطرٍ عليه اليا توقظ من الجن
ماني بقصادٍ بليا نمــــارَه = أجدع نطيحي بالسهل وإن تلاقن
من حل دار الناس حلوا دياره = لابدّ ما تســكن دياره ويغبَنْ
ومن شق ستر الناس شقوا ستاره = ومن ضحك بالثرمان يضحك بلا سنْ
وان كان ضيف الله يعسف مهاره = فمهارنا من عصر نوح يطيعــن
تِدنَا لِصِبيانٍ ســُواةِ النمــاره = شهبٍ لماضين الفَعَايل يـعَـنّنْ

أنا لِيَا كثرت لَشَاوير مـا شِيْرْ = وحلفت ماتي بارزٍ ما دعاني
وانا صديقه في ليالي المعـاسير = والا الـرخا كل يِسِد بمكــانِـي
وشُوري لِيا هَجّت تُوالي المظاهير = شلفـــَا عليها رايب الدمّ قــَاني
شلفاً معــوّدها لجدع المشاهير = يوم السّبايا كنّها الدّيدَحــــاني
ماني بخبلٍ ما يعرف المعابير = قدني على قطع الفرَج مِـرجعاني
إن سندُوا حدرت يم الـجُوافير = وان حـدّروا سنّدت لــمريغاني
ناخذ بخيران المريبخ مسايير = ما دبّر المولى على العبد كـاني

يا سابقي كثرت علوم العرب فيكْ = عٌلوم الملوك من أولٍ ثم تـاليْ
لا نيب بايع و لا نـي بِمهـــديك = وانا اللي اسـتاهـــــل كلّ غَالي
وانتي من الثلث المحرم ولا اعطيك = وانتي بها الدنيا شريدة حلالي
ياما حَلَى خطوى الـقلاعَة تباريك = افرح بها الدنيا الصديق المواليْ
وياما حَلَى زين الندى في مواطيك = في عَثْعَثٍ توّه من الوسم سالي
ويا ما حلى شمشولٍ من البدو يتليْكْ = بقفر به الجازي تربّى الغَزَالي
الخير كــله نـابتٍ في نواصـيـكْ = وادله ليا راعيت زولك قبالي
بِالضيق لـِوجيه المـداريع نثنيك = وعَجله وريّـضه خلاف التوالي
حـقك علّي من الـبّر أبـــّديك = وَعَلى بدنك الجوخَ أحطّه جلالي
أبيه عن برد المـشاتي يــدفّـيك = وبالقيظ احطك في نعيم الظلالي
يا نافدا اللّي حصلك من مجانيك = جابك عقاب الخيل ذيب العيالي
جابك صبي الجُود من كف راعيك = في ساعة تذهل عقول الرجالي
يا سـابقي نبي نبعـــد مشاحيك = والبعد سلم مكرمين السّباليْ
يم الجنوب وديرِتِهِ نِنتِحي فِيك = لربعٍ من الأوناس قفرٍ وخاليْ

ذيب عوى وانا على صوته اجيب = ومن ونتي جضت ضواري سباعـهْ
عز الله اني جـاهل ما أعلم الغيب = والغيب يعلم به حفـيظ الوداعـــــهْ
يالله يا رزاق عكف الـمخــــاليب = يا محصيٍ خلقهْ ببحره وقـاعـــــهْ
تفرِجْ لمن صابه جروحٍ معاطيبْ = وقلبه من اللوعات غادٍ وِلاَعِــــــهْ
إن ضاق صدري لِذْتْ فُوق المصَالِيب = مانيب من يشمت فعايل ذراعِــــهْ
صار السّبب منّي على مَنقعَ الطيب = ونجمي طمن بالقاع عقب ارتفاعهْ
ياطول ما هجّيـتِـهن مع لواهيب = ولانِي بَداري كسرها من ضلاعِهْ
وياطول ما نوّختها تصرخ الـنّيب = وزن البيوت اللّي كِـبارٍ ربَاعـهْ
واضوي عليهم كنهم علي معازيبْ = إليا رَمَى زين الـوَسـايد قناعـــهْ
أبا انذر اللّي من ربوعي يبا الطيب = لاياخذ الا من بيوت الشجـاعـــهْ
يجي وَلدهـا مــــذرّي كنّهَ الذيبْ = عزّ لبُوه وكُل مـا قال طـاعـــــهْ
وبنت الردى ياتي ولدها كما الهيب = غبنٍ لبُوه , وفاشلَـهْ بِالجِماعـــــهْ
ياكبر زُوله عند بيت الـمعـايب = متحَـرّيٍ متى يقــــدّم مـتاعِـــــهْ