::|[ ديوآن آلشآعر /عبدالله بن عون]|::

شعتني علوم الصيف وارقلت للمسناد
=ولاعاد يعذل واحـد طافـح شبلـه
آبي عبلة ضافي عليها كما السجـاد
=ديار يرود عدودها من يحـب ابلـه
ولاعاد لي من يوم سال الشفا مقعاد
=عتيبي وداري فوق ونحيتـي قبلـه
مادامه وكد لي سيل وادي قليب عناد
=انا ويش يحرمني شفا نجد والعبلـه
ابتبع هوى وضحا تحط البيد سنـاد
=لها غير زين طبوعهـا خـدة قبلـه
ليا سمعت الحادي نده ندهة الميـراد
=تقود اول الزعجول لول وتقرب لـه
ابيها ترفع فوق عن ساخن الانفـاد
=وتجي في فياح كل مصلاح يطرب له
انا في الديار الطامنه في تعب وجهاد
=على كثر مرعاها مداخيلهـا خبلـه
عساها يساقيها المطر ديرة الاجـواد
=ولابيها لون ثمامهـا ينقلـب ربلـه

شعتني قصيدة شاعر عـذ ّب القصـاد
=ماحد يستلذ السالفه ليـن تنسـب لـه
علومك يا بو نايف قراح ٍ على الأكبـاد
=لكن تجرح قلوب ٍ مع الوضـح منهبلـه
مواليف وضح ٍ كنها وضحى بن عبّـاد
=لا شافها راعي الدبـش طيـرت شبلـه
تواغض مع الريضان كنها خيام أسيـاد
=لونها بعيد ٍ بادي الرجـم تقـرب لـه
أو حمّـى مغاتيـر ٍ مقاديمهـا شـراد
=هريب السحاب اللـي تواليـه منسبلـه
قبلهـا ليـا مـن المنـاره سناهـا زاد
=قبل الاشهب المرشوش لا فضوا اصطبله
عنقا مارق ٍ نسنوسها سدوهـا منقـاد
=مع طـول خدتهـا خراطيمهـا سبلـه
شناح ٍ طفـوح شبلهـا دايـم ٍ خـدّاد
=لونها مع ذود ابن عمـي خذيـت ابلـه
لا ضاقت براعيها الوسيعه بكـل بـلاد
=يحوّم و كبده من هـل المـدن مندبلـه
لا منه نطحها عصر و لا هجد مهجـاد
=ليا شافته قامـت تـرازم ترحـب لـه
هذي تنطحه تبغى تقبّلـه جـد عمـاد
=وهذي تنهب شماغه و هذيك تلعب لـه
و الله ما يهني من حكم عاصمة بغـداد
=اللي له مزامير الفخر تضـرب الطبلـه

=جذبني صدى صوت ٍ تلاحت به الأطواد
يتعّب هواة الشعر بعـده و مـن قبلـه
صدى صوت عرّافٍ لشعـر الأدب روّاد
==منابع عيون الشعر و الكلمـه الذبلـه
تلاحوا على وضح ٍ عليها العيون حداد
=ولوف ٍ على صوت الموده تراقـب لـه
دقاق العنـوق اللـي خراطيمهـا ورّاد
=على حب راعيها شغـوف ٍ و منجبلـه
تقدم لها بن عون في وصفهـا نشّـاد
=و شعا الأكلبي و الأكلبي تلنـي حبلـه
و انا قبل صوته ماشي ٍفي الطريق حياد
=على ما تقول الناس كل ٍ علـى هبلـه
و بعد زعزع الوضحى فلا عاد لي صدّاد
=سلولي و قلبي طاري الوضح يرغب له
ابتعب واحاول لو لحقني عنا و انكـاد
=على منهج ًٍ ما كل قاف ٍ يناسـب لـه
و انا في هواها مغرم ٍ هايـم ٍ منقـاد
=لو اكثر علي اللوم فـي حبهـا الابلـه
اوقع لهـا بالعشـر واشهّـد الأشهـاد
=انه لاعب ٍ بـي حبهـا لعبـة السبلـه

مبداي بإسم اللي فرج عن هل الغار
=اعوذ بـه والـوذ بـه واستخيـره
قدام تدريـج المعانـي بالاشعـار
=عن لا يجي عندي من الامر حيـره
حتى تجيني طوع من غير عسـار
=وتنقاد لي قـود الجمـل بالمريـره
وعلقتها في رأس دواس الاخطـار
=عبدالعزيز اللـي فعولـه شهيـره
يوم إن بركان الفتن بالوطـن ثـار
=مافيه شبرٍ مـا اشتعلبـه سعيـره
ولا للجنايز بيـن الاشـرار قبـار
=ولا به عشيره تتفق مـع عشيـره
حناشلٍ تاقـف علـى كـل معبـار
=وتحـول الطرقـي وتأخـذ بعيـره
من شرق فاجاها على هجن ومهار
=هجـنٍ هجاهيـجٍ وخيـلٍ مغيـره
فوق الجياد وفـوق نسـاع الازوار
=داس الخطر واطلق حصار الاسيره
جاها صلاة الفجر والطير ما طـار
=بكل ابلـجٍ بيديـه دلمـاً قصيـره
جوها مع الاسحار وخذوا لها الثار
=وعقب العري لبست ثياب الستيـره
ويوم احتضنها المؤمن العادل البار
=قامت لاخو نوره تغطـرف منيـره
حشيمةٍ مـا تقبـل الـذل والعـار
=وبه من بعض خطّابهـا مستجيـره
وغدا لها عن كـل حجيّـر حجـار
=وسعى لها بالنصـر والله نصيـره
واستامنت بحماه عـن كـل غـدار
=وعن الشلل عالج عضاها الضريره
احدٍ الى جـا الـدار للـدار دمـار
=واحدٍ الى جاء الدار شـاد تعميـره
والفيصلي للملكـة شـاد الاعمـار
=حلحيل مـا سـوا سوايـاه غيـره
صميدعٍ جاها وهـي تلتهـب نـار
=وارسى قواعدها بعـزم وبصيـره
وعلى يد المنصور توحيدها صـار
=وظفى عليها الامن في كـل ديـره
شيخٍ على السنه نهج نهج الابـرار
=وعلـى مخالفهـا يجـر الجريـره
عسى عضاه محرماتٍ علـى النـار
=يوم ارتحل عنها ذخر لـه ذخيـره
وذخيرته رؤوس الميامين الاخيـار
=علـى مسـار يكملـون المسيـره
وكل حكم له دور من خمسـة ادوار
=وكلٍ عدل فـي دوره اللـي يديـره
واليوم واحـاتٍ مظاليـل وأنهـار
=بفضل الولي ثم بالجهـود المنيـره
الدوله اللي تحتـرم جيـرة الجـار
=يوم بعض الجيران يأكـل قصيـره
ما ساد الاستعمار فيهـا ولا جـار
=ولا عاش فيها من بـذوره بذيـره
حره واهلها من على اولهم احـرار
=في ظل شذرات السيوف الشطيـره
يوم ارتحل مسقى العدا كأس الامرار
=فهد عسى الله من عذابـه يجيـره
راح وبقت معنـا حسانيـه تذكـار
=وخلد لنا في قمـة المجـد سيـره
كم مر في عهده من احـداثٍ كبـار
=وصارت كبايرهـا بعينـه صغيـره
اثقل على العدوان من ضلع سنجار
=ولشعبه احلا مـن برايـد غديـره
واكمل مساره طيب الصيت والكـار
=كشاف خصـات البيـوت الفقيـره
عبدالله اللي عاهد النافـع الضـار
=الخيـر مـن يمـه لفانـا بشيـره
العدل نهجه والتواضع لـه شعـار
=ونباه يجبـر لـه عظـامٍ كسيـره
على الفقارى مثل هتـاف الامطـار
=وضافٍ على اوطان المحاويج خيره
وعنده لخصـات المقليـن منظـار
=وجـزلات مداتـه عليهـم كثيـره
فأول بيانٍ لـه بنشـرات الاخبـار
=قال البيان اللـي غمرنـا عبيـره
يقول مدونـي بالانصـاح والشـار
=ومن الدعاء الصادق عطوني بريره
وحنا بنفحـات التهجـد بالاسحـار
=نطلب لـه التوفيـق فيمـا يديـره
وعضوده اللي فالمواجيب حضـار
=سواعده عنـد إشتعـال الذخيـره
الساعد الايمن ليا صار مـا صـار
=سلطان زيـزوم الدفـاع ووزيـره
سلطان ابو خالد له الـرأي ينـدار
=ولي عهـدٍ لـه وأخـوه وشويـره
فالنايبـات مجهـزٍ كـل مـغـوار
=النائـب الاول نـزيـه السـريـره
يقود جيـشٍ للوطـن درع وستـار
=يصد به عنـا الخطـوب الخطيـره
ونيابةٍ عني وعـن كـل مـن زار
=حفل الرياض وبإسم سلمان اميـره
قدمت لي معـذار ماهـو بمقـدار
=والاّ حقوقك يابـو متعـب كبيـره
وصلوا على سيد البشر سر وجهار
=ما طـوح الصقـار ملـوح طيـره

يا ماحـلا لا ذعذعـن الهفاهيـف
=وقامت تناقرنا هبـوب الصفـاري
وهب البراد ودوّحت شوبة الصيف
=واوحيت للمقناص والطير طـاري
واللي يبي شمة هبوب الشفاشيـف
=قـام يتنبـى للبيـان الــوزاري
يدلى على حزم الجلاميد وطريـف
=خطايطـاً فيهـا عوايـن حبـاري
بعض العرب وده ولو جاه تكليـف
=يسري ويصبح يم هـاك المحـاري
الناس يقضون الاجـازات بجنيـف
=ونايف يمضّي رخصته بالصحـاري
صحراء العيون اليا غدت كلها ريف
=عند الشرك ولا عـلاوي جـداري
لامن عسّاسـه عطـاه التعاريـف
=وامسى عن اللي في حراويه داري
نادى بقرناساً اليا حيـف ماعيـف
=فيه الحم الكدري وريشـة قمـاري
وجت للملامس وفيه ماقيل ياحيـف
=مافيه عيب الا من الريـش عـاري
وتوابعاً مثـل الرمـاح المعاكيـف
=وامواس مثل مسلـلات الشبـاري
طرح الشبك من نازحات المحاذيف
=جابه حـدا العتبـان ولا المطـاري
اما ولد مطلـق ربيـع المهاجيـف
=ولا السليس دحيم ذيـب الغـداري
جابـه لشيخـاً يرتكـي للتكاليـف
=الله يجيره عن صـدوف الجـواري
شيخـاً تلحفنـا حسانيـه تلحيـف
=ماهوب عن حق الخوي بمتـواري
شيخاً هواه لاحصل له على الكيـف
=تعرض النسناس مـع كـل فـاري
ونقل الحـرار وهدهـا بالاطانيـف
=امـا ضحـى ولا وروك الظهـاري
وليا كفخ حل العصيـر الطهيريـف
=ربداً مطيرهـا الرفيـق المبـاري
اوقف وتبعهـن طويـل الاطاريـف
=حراً على بعد المطاليـب ضـاري
الصافي اللي حاز حلو التواصيـف
=لّحاق عـزّام الحبـاري اجبـاري
واليا انزعج ظاقتبهـن المحاريـف
=وتزبنن قـوع الشجـر والمـذاري
ومن عقب ماهن للعزامة مواليـف
=قاموا عليهـن يظربـون البـواري
ومضواه في بيتاً كما نايف القيـف
=في صفح نزواً عايفتهـا الـذواري
اليا شيدوه اللـي لبنيـه معاسيـف
=وحطوا مشب النار بيـن القـواري
ناراً حطبها يشتـرى بالتجازيـف
=عمـال ماتلحـق عليـه اللـواري
نـاراً يصاليهـا دلالاً مهـاديـف
=صهباً وصلوا النار فيهـن مـواري
صهباً عليها الجور مامنه تخفيـف
=زاماً لهـا ليلـي وزامـاً نهـاري
صفراً خنين بهارهن من ورى الليف
=يطرد عماس اللي من البعد سـاري
اليا درجوهن وادرجـن العجاريـف
=وكل أفلجً بفعـول طيـره يمـاري
اقفن هواجيس الظمايـر مناكيـف
=والطير عن راعيه شال الطـواري
مع ظف اخو نورة بعيد الاشاويـف
=شيخاً بوسع الخلق مالـه مجـاري
ولاني بفاخـر وتفاخـر بتزييـف
=الا..ولاالبس من ثيـاب العـواري
افخر بحكامن حموا نجـد بالسيـف
=والشعب اشادوا مستواه الحظـاري
وافخر بقرب اللي بعيداً عن الحيف
=شيخـاً بعدلـه بيننلـه شــواري
ومدحه ماهوب خراط ولاتواهيـف
=عن عرف والكاذب لعلـه نيـاري

ياهل الطيور اللي تصيد الثلاثـي
=تحطيمكم لاكبر عدد مثل الاظغاث
لو تجمعـون ذكورهـم والاناثـي
=اكبر عدد ماحطمه غيـر عبّـاث
النادر اللي فـي الهـدد مايثاثـي
=لا فرّعه راعيـه ماهـوب لثـاث
عباث في زرق الغلب يوم عاثـي
=كنه عديماً له على الهوش حثـاث
ادلى بربداً فـي غلبهـن بغاثـي
=للريش من كفه على الروض بثّاث
وألّحق ثمانية العشـر بالمعاثـي
=واضحى له التفضيل بالفعل ميراث
عذناه بالرحمن مشفـي الغلاثـي
=عن كل شيطاناً للأسبـاب نفـاث
طير الكريم اللي جنابـه دماثـي
=من حل فيه اسقاه ديماً وهثهـاث
مهـب لحلوحـاً حشـاطً حثاثـي
=اخير مايثمر بحرمـل وجثجـاث
شيخاً بصكات السنيـن العباثـي
=أحيا قديم امجاد قومـاً بالأجـداث
عسايّ ما استعرض عليه الميراثي
=آمين..ياحـيً للأمـوات بـعّـاث
اليا قيل منهو قلت مدري واعاثي
=نايف ملاذ اللي له الوقت غثّـاث
المستغيث اليا التجـا واستغاثـي
=عنده يغاث وخير اساميه غيّـاث

هواجيس قلبي ذاه رايح وهـذا جـاي
=وروداً صديـر ووردهـن مايناسبـلـه
واضوي له الافكار مـن كـل رايً راي
=مع الفجر الاول ذيـب عرقـان يقنبلـه
يجر العوى حتى يجاوب عـواه عـواي
=الى جر صوته في القضيبه يبى العبلـه
مداهل غزالن مابعـد حـازه الرمـاي
=عسى المزن لاجا فوقهـا ينتثـر وبلـه
كما قيطعاً شفي وطالت علـي خطـاي
=على شف ناساً منهـم الكبـد مندبلـه
اداوم مع السرّاح واضوي مع الضـواي
=وادير الروابع والرجـا طاويـاً حبلـه
لو اني شرحت الوضع محدأ نظر دعواي
=وشكوىً لغير العارفة ويـش تحسبلـه
وبشكي على شهماً يقدر ثمن شكـواي
=ابو نايف اللي دايـم الطيـب ينسبلـه
ابن عون عبدالله لعلـه ينـال رضـاي
=على حسب ظني ماتجي قومتـه خبلـه
اذا خاب فيه الظن ماأملت في رجـواي
=ترى مابقى لـي مثـل مافاتنـي قبلـه
ابي انخا واناديله ان كانه ماسمع لنداي
=ولاصـار مايسمـع منـاداي ابندبلـه
على متن جيباً لامشى يطرب المشّـاي
=مديله جديد ومن نظـر فيـه يرغبلـه
اليا سرّحه قرمً علـى غايتـي ومنـاي
=مع اول صـلاة الجمـع قـدام تاجبلـه
على بيت عبدالله يوقف وهو منصـاي
=ابونايف اللـي مـن يجيلـه يرحبلـه
يسلم عليه ويفهمه عن مـدى معنـاي
=سلاماً صحيح بخط الاعـراب يعربلـه
معانيـه بالترفيـع والنقـل والاعفـاي
=هذا اللي نريده يابـو نايـف ونطربلـه
انا بنتظر منك الفرج في رجـا مـولاي
=تنظّـر شفوقـاً لسمـاء رافعـاً شبلـه

تناجيت مع ليل الشقى وانتحى مسـراي
=اطالع شعـاع النـور وازريـت اقربلـه
يبى الما وعيا لايطـول الطويـل رشـاي
=وهريس المضامي كود يسقـى ويجذبلـه
خطايطاً لفتني من سعد كـدرت ممشـاي
=مواريدهـا مـن يمـة الغـرب والقبلـة
مواريدها مـن واحـداً شافقـاً مـا داي
=عسى الله يجازي بالنشب مـن تسببلـه
شكالي وانا قلبي صخيفـاً مـع الشكـاي
=وقصاني عسـى الله بالشبـب مايشببلـه
شكالي من الفرقـى وبـادرت بمواسـاي
=؟؟؟؟؟؟ واحـل المشكـلـة واتطببـلـه
لو ان الفرج والحل ماهوب فـي مخبـاي
=ابعطيـه تعـب حـق العنـوة وبتعبلـه
ابمشي مع الماشي وبعدي مـع العـداي
=وعسى قومتـي تثمـر لاجيـت ابطلبلـه
وبركض مع الرجلي وبشعب مع المطـاي
=وذلولاً لغيـر العانيـة ويـش تشعبلـه
وتقبلت موضوعه ومديـت لـه يمنـاي
=وبنصابها اللـي قاسـي العلـم يجذبلـه
وبطلب له الرخصة والاعفاء والاستثناي
=وبقول مجروح الهـوى ويـش يعذبلـه
تشاينت عذري قبل اجرب سمين اريـاي
=وبختـار للوقـت المناسـب وارتبـلـه
وبعد ماصبحت شكواك في حوزتي وحماي
=سحبها المراسل مثـل ماتسحـب الدبلـه
وانا ماقبل الهدنه بعد ماحمـي مشـواي
=ولا ارخص لغيري لين اغدّيـه واحلبلـه
بعد مازهم رعادهـا فـي سمـا دنيـاي
=وتهامالها الـودان ليـن انبـت الربلـه
وغدى لم سالم وسط ريضانهـا نونـاي
=وشـذى وردهـا فـي كـل دارً يهربلـه
وانا في سعد ماسمع من السامي والحكاي
=ولاحط الحواجز فـي طريقـة واعرقبلـه

مايستريح البال والقلـب مارتـاح
=والروح ماترتـاح داخـل بدنهـا
يابداح أشوف العود جاء فيه لولاح
=والحال ينقص عامل الوقت منهـا
الرجل يصقل كنه السيف ابـولاح
=وماطال يمه مـن يديـنً خَبَنهـا

ياهل الجيوب الساريـة دوروا لـي
=خطاً يوقف بي علـى بيـت سطـام
ماوالله استانـس اذا ضـاق جولـي
=الا اليا جالـه علـى النـار همهـام
اليا قام نجره يزعج الصوت حولـي
=واحيا السمر بألحاق الابرام الابـرام
لـو هـو يذكرنـي قديـم الفعولـي
=اللي غدت مثل الهـذاري والاحـلام
فعول الرجال اللي تشيـل الحمولـي
=نطّاحت الكايد مفاريـس الاخصـام
وليا ذكرت افعـال هـاك الزحولـي
=ربعاً تقافت دونهـم جـرد الاعـوام
اخـذ شـوي مغيبـن فـي ذهولـي
=يعرض لي الماضي كما عرض الافلام
بأطياف ذكرى في خيالـي تجولـي
=تطوفبي بيـن الحقايـق والاوهـام
دنيـاً تـزول وماعليهـا يـزولـي
=الباقي الله وأفضـل الخلـق مـادام
ياحيـف ياتفريقـهـا للشمـولـي
=تنشر بيارقهـا علـى كـل مقـدام
وتاطا كبار الجـاه وطـي النعولـي
=لين القضا فيهـم غرسنابـه السـام
هـذي منازلهـم خلـيـاً تهـولـي
=ترثالهـا فـي هـاك الايـام الايـام
بلاقعـاً شهـبً خلـيـاً محـولـي
=تبنيبهـا هـوج الدواليـب الاسـوام
عقب الجهام وعقب هـاك النزولـي
=تقـول محـدن حـل فيهـا ولاقـام
طرفي بدمعه يـوم اجيهـا همولـي
=تقـرب محاظيبـي ولانـي بـمـلام
اذكر طربها قبـل عشريـن حولـي
=قـدام تزلـف هـاك الايـام قـدام
ولو صرت من غارات سلمى زعولي
=اللي علـي العقـل تنفيـذ الاحكـام
واعـزي الخاطـر بربعـاً بقولـي
=هم نور عيني في غطاليس الاظـلام
لـولا الاسـود معقبيـن الشبولـي
عندي تغلّق مصدر الانـس بلحـام
لاجيتهم عقب البطـى يسّـروا لـي
==توسيع بال وضيـع الهـم الاكـرام

هلا باللي نعش روحي بصوتـه
=وهو شوفه غذا روحي وقوتـه
تفرقنـا واحسبـنـه نسـانـي
=وصدت بي وقوتي عن وقوتـه
وبعـد ماكـان مندثـراً هوانـا
=زهم واحيا غرامي عقب موتـه
وهذي عادة(ن) في كـل وافـي
=فرص حبل المواصـل ماتفوتـه
وانا قبله عن العشـق متراجـع
=مهب عياف خوف(ن) من شموته
وهو صار السبب في رجعتي له
=نده قلبي وجاوب لـه صموتـه
لاجل عينيك يامشعـل غرامـي
=رهين الحـب ومعمـر بيوتـه
مادامك رافعاً صـرح الصداقـه
=فـانا حق(ن) علي ادعم ثبوتـه
واعمـر لـك مقاصيـر بقلبـي
=واغطيهـا بعـش العنكبـوتـه

يعيش اللي بعد طول سكوتـه
=عبر فوق المحيـط بجيلبوتـه
جمع ماسـه ومرجانـه ودره
=وغير ماحصلـه غيـر حوتـه
ومن حاول يجاري صيد فكـره
=يبي يحفي على دربه سبوتـه
جزا الله خير من هيج غرامـه
=بدعوى العشق طرش له كروته
وخـلاه يتغـزل فـي جزالـه
=وياصف لوعته باوراق نوتـه
بيوت(ن) ذوقها لسامع احلـى
=من السكر ومن تمـر النبوتـه
ونظم الصعب منها عنده اسهل
=نخزه للقلم من جيـب كوتـه
نبي ياخو سعد نسمـع ونقـرا
=غدرايق(ن) من العام مغموتـه
محيط الشعر ينقص لاهجرتـه
=ولو زرته غمر موجه خبوتـه