::|[ ديوان الشاعر الكبير/ محمد الأحمد السديري - رحمه الله - ]|::

أنا من نجد يكفيني هواها = ويبري لوعتي شربي لماها
وشوفي من نبيه ومن نوده = غزال تابع قلبي هواها
غزال ضيعت عقلي وروحي = رمت قلبي وقلبي ما رماها
لها بالروح وفوادي موده = ولاشيء من احوالي خفاها
تعرف اني لها مملوك طايع = أبيع الروح في دورة رضاها
واهيم بحبها واخفي جروحي = وقلبي ما عشق زول سواها
توقد حبها باقصى فوادي = ونار الحب يحرقني لظاها
ملكني بالهوا عذب السجايا = ولااذكر ساعة قلبي نساها
نحيل الخصر وضاح الثنايا = نظيم الدر منظوم بفاها
فجعني بالهوا ورقة حمامه = إلى غنت يذكرني غناها
يذكرني وليف غاب عني = وعيني منه جاها ما كفاها
ورا دنياي عقبه لوعتني = من الفرقا تكدر لي صفاها

قالوا علامك باكيٍ قلت مطعون = شوفوا نزيف الدم مني تلالا
قالوا من اللي صوبك قلت عافون = قالوا عدوك قلت ياناس لا لا
هذا الحبيب اللي له القلب مرهون = هذا حياة الروح بدر الكمالا
ياعاذلين القلب لالا تعذلون = وحياة ربٍ فوق عرشه تعالا
إني فلا انسى واحدٍ فيه مفتون = بيني وبينه نازح البعد حالا
فتان صاب الفاب كونٍ بأثر كون = مملوح اخذ كل البها والجمالا
كنه إلى حرك قوامه على الهون = غصنٍ إلى هب الهوى فيه مالا
قلبي لقلبه لو تنحيت مرهون = غيره حرام ونور عيني حلالا

يازين قلبي راح مني يباريك = واصبح مقره بين الاضلاع خالي
بالحلم ياسيد العذارى يناجيك = وبالعلم له وسط الضمير اجتوالي
طابت لي اذكارك وطابت مواريك = وطابت عمامك يوم طاب الخوالي
ارضيتني وبعالم الحب ابرضيك = انت الحبيب اللي بديت وبدالي
لعل رب صورك لي يخليك = تشفي فوادي مابقن الليالي
انا على خافي ضميرك موليك = في منزل مايسكنه كود غالي
عينك تراعيني وعيني تراعيك = اشفق من الصايم لشوف الهلالي
نصبح مصابيحك ونمسي مماسيك = وانا ورا ضنك بعيد المدالي
انا لي ضاعت جهود الشبابيك = ارسي على صيد الوحش باحتيالي
ياشبة وضحه زينوا فوقها ديك = تموج للطياح روس المقالي

قل لي هلا وآقول صبحك بالخير = وقل مرحبا واقول ياروح روحي
يابو ثمانٍ بالمبيسم مغاتير = أغليك وانت اللي تسبب جروحي
جاوبت من فرقاك خلجٍ على ضير = وناديت بإسمك والمخاليق توحي
حيثك هواي من البنيّ الغنادير = وليا عذلني واحدٍ قلت مااوحي
أغليك ماطاوعت عذّال ومشير = وحياة من مشّى السفينة بنوحي
قلبي على لاماك يكفخ كما الطير = ماعادلت روعات قلبي فروخي
ورجلي تزيد المشي يمك بتصخير = ولا تعدت يم غيرك شبوحي
وهموم قلبي منك ورد ومصادير = اكّن عبراتي ودمعي يفوحي
وش جابني لولا إن هذي مقادير = إلا انها كِتبت بلوحك ولوحي

عفا الله عن قلب يزيد عناه=وداعي غرامه للغرام دعاه
ماطاع عذالٍ يعذله من الملا=وان سمع عذاله يزيد عناه
إلى توسع خاطره ربع ساعه=على الضيق داكوك الهموم نحاه
قلب براه مجادل الضيم والعنا=الضيم من بين الضلوع براه
دع القلب ياعذال خله بغايته=هواك مايتبع طريق هواه
دع القلب ياعاذل عذلك يضره=يزيد ياعاذل عليه شقاه
كونه الايام لين أوجعنه=وعزى لمن حر الزمان كواه
يكويه من هجر النياحامي الطنا=يضيق به مما دهاه حشاه
يحن حنات الخلوج لجنينها=والخلج مفهوم تحن ظناه
ماحزنها حزنه ولاربع مابه=وحياة من نشا السحاب بماه
على جادلٍ ما شافت العين مثلها=احيا بذكري من هويت لقاه
عشيري شرابي من مناظيم مبسمه=يجلا عن القلب الدريك ظماه
اداريه عن شىء يحسه ويغضبه=وإلى زعل يصعب على أرضاه
ان دك بي من حامى البين هاجس=وجرعت من حر الغرام طناه
تذكرت من طلابة الجود نادر=رفيع الذرا عسر الدروب مشاه
مشى بدرب المجد والنفس تدفعه=الى شــامخ عسر الدروب سناه
خالد سنام الطيلات بن فيصل=حجا من لجابه والزمان وطاه
ابشكي على فرز الوغى جاير الهو=شطون الشفاوي والشفاوي تاه
قد تاه ببحور الغرام المظلمه=دليل الخطا عن من يريد نحاه
نحاه عن حي يوده من الملا =وما فات من يومٍ يزيد غلاه
غلاه في قلبي تجدد علايمه=وتكتب على القلب الدريك اسماه
اسماه وأن عرضت مع الناس صفقت=محاني فوادى والحبيب رماه
رماه بسهوم المحاجر وجندله=قليل الفزع ظلم الحبيب دهاه
دهاه بالفرقا وقلبي له انتما=يتله ومن بين الظلوع لواه
لواه يوم انه على الحب يلتوي=ومن دينه دين الجميل اوفاه
اوفيه بالروح العزيزه ولو غلت=روح تبي روح تحب جزاه
اجزاه لو انه رماني وجادني=يمحا خطا الغالي عظيم إرضاه
إرضاه يبهج خاطري عقب ضيقته=ويرتاح قلب بالفؤاد فراه
فراه في وسط المحاني وعذبه=وان عذبه سهل عليه أدواه
دواه عنده سبايب مصايبه=واشفاه من كوثر نظيم شفاه
ارجيه لو دونه من الناس حاسد=رجاي بالله ماقطعت رجاه
ارجيه لو دونه جموع تصدني=وحبل الرجا يضفي على رشاه
وقد قيل للعراف في ماضي مضى=هذا لهذا من هذاك رواه
يمنى بلا يسرى قليلٍ حصيلها=ورجلٍ بلا ربع يخاف اعداه
ماهبلك ياباغي من النذل فزعه=رجواك من عند الجبان سفاه
رفيق الرخا ينسى مودة رفيقه=ليا ضاق به شين الزمان نحاه
عوين الدهر مايامن الجار جانبه=وليا عرض للشامتين شناه
على داره السودا تبني خيامها=عوين الدهر شين السواد غشاه
خذ يالبيب القلب مني وصيه=حميدان في ماضي الزمان لقاه
إختر من الخلان حي توده=تسبق على فعل الجميل يداه
دليل على العليا بعيد من الخطا=الطيب في دنيا الحياة مناه
ماجال في قلبه من الخوف جايل=وان كاد مرقا الطيلات رقاه
ولا ضعف النفس العزيزه الجارته=ولاهروولت للمحصنات إخطاه
يفرح به العاني ليا حده القصا=وللضيف معسول الكلام نباه
وان جاك من يمة معاديك ريبه=من قبل ماتاطا عليه وطاه
صديقك صديق له وضدك يضده=وعلى روس عدوانك تدير رحاه
هذاك حطه لك رفيق موالى=عونك ليازاد الزمان بلاه
مايفصل القالات الا رجالها=ولاكل من شيد بناه حماه
ولا كل من ركب الجواد عدابها=على حامي الهيجا وحر لظاه
ولاكل من نوى لدار رحل لها=يموت مالحق هواه إمناه
ولاكل من رام المراجل ينولها=ياعسر مقضبها على يمناه
ولاكل من ركب المطايا غزابها=ولاكل من رام الغريم قواه
ولاكل من يبرم عهود وفابها=يطغى على فعل الجميل رداه
ولاكل من ودع لسر يصونه=وكم واحدٍ سر الصديق أبداه
ولاكل من حصل حلالٍ صخابه=يبين بالوقت الشديد صخاه
ولاكل من جالس هل العلم عالم=وكم عالمٍ ضر العباد خطاه
ولاكل من ناله جميلٍ يرده=ولاكل من شاف الحريب نصاه
ولاكل من سل السنان صطابه=يموت وسنانه جضيع إخباه
ياناشدٍ عني وانا لي قبيله=لها المجد زايد بالرفاع بناه
وكمل مقام المجد عامر وشيده=طريق المعالي للدخيل مشاه
كونٍ جرى على واضح النقا=الاشراف جضت من عظيم بلاه
مزنٍ تزبر فـوق سلـى صواعقـه = تشظّف مـن خشـوم الجبـال حصـاه
نشا من ثنايا بـرك ترعـد مخايلـه = مـن الشـرق غيـظ بالصـدور حـداه
غيظ مخيف يطحن الغيظ والغضب=وماطال من روس الخشوم طماه
امطر على الاشراف وانهل وبله=عليهم تنثر بالغزير طماه
قوز الشريف اكبر علايم دلايله=سيله تدفق هد كل انياه
سيله عجاج الخيل والبيض والقنا=وروس النشاما بالحزوم إغشاه
تشهد على ماقلته العامريه=جضت أسبيع من عويل ابكاه
تبكي على فتخان الإيمـان غلمـه =تعشوهـم اللـي بالحـروب اعـصـاه
والضبعة العرجا تعشا بدربهم=وكم ضيفوا ذيب يجر إعواه
والطير يلقى البر من ضرب شلفهم=مضاريبهم يعي الطبيب إدواه
وش حل بالاشراف غالب وراجح=اقفو كما صيد حدته إضراه
اقفو على قب تخافق مع الوطا=تنازا بطوعات الرقاب حذاه
من ولب عطبين الهوايا آل زايد=لهم صانع السيف الصقيل حناه
حناه وارهف شذرته يوم كمله=وعطاه لمن هم بالحروب عداه
حيث أنهم يروون حده من العدا=بأيمانهم روس الفهود عشاه
إلى عدا فيهم حريب وزارهم=يعدلون بحدود السيوف صغاه
وجريس ماطاله من الظيم طايل=اسود الشرى عمن يبيه حجاه
اسود الشرا بالضيق تنجي دخيلهم=ويروون من دم الرقاب ظماه
فكوه ثم اغنوه يوم انه التجا=وجه أبن بدران يزيد ضياه
تجمل مع جريس اليماني وعزه=الزايدي يوم الدخيل عداه
يشهد العامر مامضى من فعايله=يوم إن غالب بالجموع نصاه
يبي دخيل البيت ماخاف خالقه=دخيل عطبين السهوم إرماه
واقفا ذليل يتبع السير بالسرا=وحرب عناله بالفواد شكاه
أقفا مثل ماجا وهو يشكي العمى=اقفا من الذله يحر قناه
عيب على مثله لياهد ينثني=يبدل من عقب الهدير إرغاه
وأبن صباح أذروه وبن خليفة=رمح آل زايد ظلهم بافياه
اخذ ثارهم من ضدهم يوم كادهم=رمح من العز القديم عصاه
يشهد به الهدار واللى جرابه=دخيلهم ثاره عطوه إقضاه
فكو حقوق للدخيل ابن وايل=جميلية نالوا حقوق وجاه
من ضرب من لا صددوا عن حريبهم=يصكون باجباه الخصيم جباه
دخيلهم باعلى السماكين منزله=له بين نجم الفرقدين متاه
كنه بجنات تظله غصونها=والنايف الطايل يحل رباه
تعلوا لعرش المجد من قو عزمهم=مصابيح ظلنات تريح رجاه
مراجيم عدوان مرابيع ملتجى=ليا جف من وبل المزون ثراه
إلى قطبت عسر السنين وجذبت=ولاعاد يذكر بالرياض كماه
يهوشون بوجيه تكاشف من النقا=والضيف مايقصر عليه إقراه
ياناشد عني وأنا لي قبيله=قصر الندا زادو عليه إبناه
اشادوا فعول بالفضايل وسلمهم=للجار كل باللسان حكاه
بني زايد ادوا جارهم من جداره=ولا أحدٍ من اسباب الإله وداه
لهم وادي سهل الدروب ودونه=نار ينزح عن احماه سناه
سناه مصقول الحديد الصافي=وعزم القلوب الصاطيات لظاه
عذروبهم للضيف ترخص نفوسهم=والجار مضمون السلام إغطاه
وجه الندا يندا كمت ماطر الحيا=يبين عند الموجبات نداه
تعييي على الشيمات حفاظة الشيم=ووجيه الندا لازم يبش حياه
قصيرهم يارد على العد قبلهم=ولاشكا يوم الورود ظماه
إن زادت إسنينه تجدد معزته=وكلٍ خطا جاره عليه رفاه
وان ذبح خير عند وجهه=وكسب الفضيله بالحيلة إمناه
على الطيب شبان وشيب تزاحموا=والطيب يتعب للرجال مداه
دواسر كنيوا على دوسر الفحل=واسمٍ على فعل يبين إقداه
من الهضب للافلاج مكدين ضدهم=وحريبهم مر المذاق عشاه
وادي العقيق مطهرينن جنابه=ولا ديس بين العالمين إحماه
من عصر ابن بدران هذي ديارهم=والدار محدٍ للخصيم عطاه
راسين مثل جبال هضب آل زايد=وهم ليا شان الزمان إحماه
حموه يوم إن القنا يقرع القنا=ولمثلهم رب العباد بناه
من الفرعة العليا إلى الخرج حدهم =بـه الجـار مـا كِّـدر عليـه صـفـاه
الدار ما تصلح لمن لايصونها=الدار عوره والرجال إرداه
دارٍ خذوها بالمراهيف عنوه=وهم نورها الصاطع ينير ضياه
بني عقيل أخلو مغاني ديارهم=بعد دمهم بأرض العقيق سقاه
من غلمة ما باعوا العز والشرف=يوم الردي فعل الجميل نساه
تشهد مشاريف اليمامه بفعلهم=فعل تعد العالمين ثناه
هرج بفعل يشبه الماس بالذهب=وهرج بلافعل يقال سفاه
نعد قول ماتكذب مثايله=راويه أصدق من طيور قطاه
نعد مجد الطيبين و فعلهم=واذكار فعل الطيبين طراه
فعلٍ على فعلٍ تحاكا بـه العـرب =مجـدٍ يـكـذب مــن يـعـد ثـنـاه
من رام فعل الغانمين وشانهم=السيف يروى من عداه شباه
من رام فعل الغانمين وسلمهم=الجار عن الخصم العظيم وقاه
من رام فعل الطيبين وقدرهم=يبذل لياضاق الزمان قضاه
ان كف همال الحيا وامحل الوطا=وشحشح عن الطفل الرضيع غذاه
يكرم لياضاقت على الناس وامحوا=ويصبر ليامن الزمان وطاه
النذل مايقدر على طيب الثنا=والليل مايشبه صدوق ضحاه
يجود الفتى بالجود من زايد الحيا=يخاف من العايبات قضاه
قولوا لطلاب الثنا يتبع النقا=ولايلحق العرض النزيه شناه
ومن سار بدروب الردى زاره الخنا=ويلبس من اسلاب السواد كساه
ابعد عن الانذال وترك ديارهم=يفكك من الوجه الخبيث نياه
الاجواد آيات الندى في وجيهها=والانذال شرى ما يذاق جناه
الاجواد ما تنوي بك البوق والردى=والانذال عيب ما يعد غياه
الاجواد فعل الخير لذة نفوسهم=والانذال ملزوم يشاف خناه
الاجواد جنات تعاقب أنهورها=والانذال صلدا من صخور صفاه
الاجواد تاصف لك طريق يدلك=والانذال لعسرات الدروب إقداه
الاجواد مثل الورد عطر روايحه=والانذال زقومٍ يطير سفاه
الاجواد فيهم باب يسر ومعزه=والانذال عسرٍ ما عليه شفاه
الاجواد زلة جارهم يدمحونها=والانذال تجزا الاقربين جناه
الاجواد مثل النهر حلو شرابه=والانذال صباخٍ ملاح ماه
الاجواد تبذل فضلها دون عرضها=والانذال دنسين العروض عراه
الاجواد مثل الريف سعد سعوده=والانذال قحط الزمهرير شتاه
الاجواد تامن شرهم وانت عندهم=والانذال شر مايطيب بلاه
الاجواد مثل الصبح تمشي بنوره=والانذال ليلٍ مظلمٍ ممساه
الاجواد حبات الندى يبذرونها=والانذال تبذر بالرخيص رياه
الاجواد فعول الخير ما يجحدونها=والانذال حزم مايطيب حفاه
الاجواد ماتلحق عزيز مذمه=والانذال تنطق بالصديق زراه
الاجواد عز الجار والضيف سلمهم=والانذال بعيون العزيز قذاه
من طاوع النفس الذليله على الردى=يرخص ويظهر للرجال خفاه
من طاوع النفس الذليله على الردى=نسى الجار والضيف العزيز جفاه
من طاوع النفس الذليله على الردى=تقصر عن العز الرفيع إخطاه
يموت طلاب التماني على الشقا=سراب دو والظلال غطاه
يموت طلاب التماني بحسرته=وكثر التماني ماتعيد صباه
يموت طلاب التماني ومثله=من يرجي الحنظل يزين نماه
يموت طلاب التمانـي ومكسبـه =كمـا صايـحٍ صوتـه يـرد صــداه
أبا التماني لاتمنى وخلها=ترى التماني والحلوم أشباه
يقولها لك من هوى القلب عذبه=وداعي غرامه للغرام دعاه

يا مرحبـاً ياللي البعد ناديـت = ومية هلا مني والاخرى قفتها
جاوبت باسماك العزيزه ولبيت = وروحي لروحك يالهوا رايمتها
انا الذي لك بالمودة تلاجيت = روح تبي روح وهي مالكتها
وتفتحن ازهار قلبي وهليت = وعيني تراعي عشقة عاشقتها
للقلب ياوضاح الانياب تليت = وردون ثوبي عبرتي غرقتها
بسفك الدموع وبالتجلد تلهيت = فاخت وعبرات بصدري حدتها
إلى بكت عيني ذكرتك وونيت = ودنياي من فرقاك ضاقت سعتها
وان غبت يامظنون عيني وصديت = قلت الفراق وغيبتك مغضبتها
اكره إلى قفيت وافرح إلى جيت = وعندك خبر نفس تعرف اشفقتها
ياما لشوفك ياحبيبي تعنيت = وكم خطوة للقاك رجلي خطتها
ان شفت غيرك صدت النفس واغضيت = وناس تبي لاماي غيره عصتها
حبك بقلبي هزني واستخفيت = وجنات عطفك فرحتي غاديتها
انا على ذكراك عشت وتغذيت = وهواجسي فرحاتنا مانستها
اقسمت لك باللي فرض حجة البيت = انا العهود اسنيننا ماخلفتها
ليتك يابو تركي بعينك تحليت = شقر القرون الناعمة ناقضتها
روحي معه تقعد إلى غبت وابطيت = وروحه على ماتشتهي عاسرتها

يقول من عدا على راس عالي = رجم طويل يدهله كل قرناس
في راس مرجوم عسير المنالي = تلعب به الارياح مع كل نسناس
في مهمة قفر من الناس خالي = يشتاق له من حس بالقلب هوجاس
قعدت في راسه وحيد لحالي = براس الطويل ملابقه تقل حراس
متذكر في مرقبي وش غدالي = وضعقت بالكفين ياس على ياس
اخذت اعد ايامها والليالي = دنيا تقلب ما عرفنا لها قياس
كم فرقت ما بين غالي وغالي = لوشفت منها ربح ترجع للافلاس
يقطعك دنيا ما لها اول وتالي = لو اضحكت للغبن تقرع بالاجراس
المستريح اللي من العقل خالي = ما هو بلجات الهواجيس عطاس
ماهوب مثلي مشكلاته جلالي = ازريت اسجلهن بحبر وقرطاس
حملي ثقيل وشايلة باحتمالي = واصبر على مر الليالي والاتعاس
وارسي كما ترسي رواس الجبالي = ولا يشتكي ضلع عليه القدم داس
يابجاد شب النار وادن الدلالي = واحمس لنا يابجاد ما يقعد الراس
ودقه بنجر ياظريف العيالي = يجذب لنا ربع على اكوار جلاس
وزله الى منه رقد كل سالي = وخله يفوح وقنن الهيل بقياس
وصبه ومده ياكريم السبالي = يبعد همومي يوم اشمه بالانفاس
فنجال يغدي ما تصور ببالي = وروابع تضرب بها اخماس واسداس
لاخاب ظني بالرفيق الموالي = مالي مشاريه على نايد الناس
لعل قصر ما يجيله ظلالي = ينهد من عال مبانيه للساس
لاصار ما هو مدهل للرجالي = وملجا لمن هو يشكي الضيم والباس
بحسناك يامنشي حقوق الخيالي = ياخالق اجناس ويامغني اجناس
تجعل مقره دارس العهد بالي = صحصاح دوِّ دارس مابه اوناس
البوم في تالي هدامه يلالي = جزاك ياقصر الخنا وكر الادناس
متى تربع دارنا والمغالي = وتخضر فياض عقب ما هيب يباس
نشوف فيها الديدحان متوالي = مثل الرعاف بخصر مدقوق الالعاس
ونثير على البيدا سوات الزوالي = يشرق حماره شرقة الصبغ بالكاس
وتكبر دفوف معبسات الشمارلي = ويبني عليهن الشحم مثل الاطعاس

حيــــاتي كلها صــــبر وجــــــلاده = وغيري عايــشٍ عيشة سعـاده
انا للي عاشــــق بالغي مغــرم = غريـــــقٍ في هوا راع القـــلاده
بعــــــيدٍ عنه بديـــــارٍ بعــيده = ولحد جــــاب لي مـنه الافــــاده
يجيبــــنه حلـوم الليـــــــــل عندي = وحــــط الخــد للغالي وســــاده
والى مني صحيـــت وقمت اراعي = ولين الليـــــل يفجـعني ســواده
تصــــــور لي عزيـــز مانســــيته = حبيـــب ماسلى قلبـــــي وداده
عــــــذولي لا تلمــــني بالمـــوده = لاجــــريح هائم في حب غــاده
تهـــل الدمــع عينــي من عنــاها = وسفك الدمع للعشـــــاق عــاده
نشدت اهل المـوده وارشــــدوني = يقـــــولون الهوا صعــب جهـاده
أقوله مصخرٍ من روح روحــي = حيــــاتي كلها صبر وجـــلاده

آه من دمع ٍ على خدي سفح = من فراق اللي على غيري شحيح
من فراقه بالحشا قلبي لفح = ساكن ٍ وسط الحشا حبه صحيح
من ربا صنعا إلى غربي رفح = ما سكن وسط الحشا غيره مليح
ان تعمدت الخطا عنده صفح = خابر ٍ قلبي من اسبابه جريح
في غباب الحب انا قلبي طفح = هايم ٍ ببحورها ما يستريح
ريح خلّي مع هوى الغربي نفح = من جنان الخلد ريحه فيه ريح