سميتها طربتي سميتها دانه

سلبتِ عقلي وصرت اليوم فتّانه=أفديكِ بالروح لبّى الطيب والهِمّه
ذبحتِ قلبي واشوفك حيل طربانه=والشوق يابنت صوّب ضامري ابسهمه
تسقيكِ يامنوة الارواح هتّانه=تحيّي رياض الوفا وتقشع الغمّه
كتبت شعري وغنّى الطير بالحانه=أبدرّةٍ تعتلي في نايف القمّه
أسرجت خيل القصيد وجاب ميدانه=ميدان اصايل بها الشجعان ملتمّه
حبيبتي قصرها مفتوح بيبانه=مدهال عشقي وفيها تجلو العتمه
غريبةٍ والهوى لاثار بركانه=تطفي لهايب ضميرٍ يشتكي همّه
اجي ونفسي من الاشواق ولهانه=وتفتح الباب تهدي الورد والبسمه
لاضاق صدري وقلبي زادت احزانه=في حضنها أرتمي وارتاح في ضمّه
حبيبتي بارضها زهره وريحانه=يطيب كيفي بعد في قطفه وشمّه
سمّيتها طربتي سميتها دانه=سميتها مهجتي وسمّيتها عمّه
تدرون من هي هوى قلبي ووجدانه=معشوقتي ((خيمتي)) هي صاحبة هِمّه