::|[ ديوان آلشآعرالرائـع/ محمد عبدالمحسن البدراني]|::

هلابك هلابك يوم لك يالوفي مقدار=على ضو موضوعك بيوتي بسويها
ترى مابنا صمله على جيزة المسيار=ولالي بها شف(ن) ولاني بباغيها
انا شفي بشقرآ كحيله وبنت احرار=هنوفن شمال طويق تذكر مرابيها
لها شفتن حمرا وخد(ن) كما الجمار=هنوفن تزين كل قاعن مشت فيها
تصادفت معها يوم رادت لنا الاقدار=سقى الله يومآ فيه جينا لأراضيها
تدرج لها مع (جو ريمان) شقح بكار=على جيبن اشهب والدداسن تباريها
شعاها غلا نياقن غوالي لهن اذكار=لهن تقصر الممشى وتمشي مماشيها
وقفنا وسولفنا وكل الهروج خيار=تكفيني البسمه لياجيت احاكيها
وتال العهد فيها عقب طيحة الامطار=مع نياق ابوها يوم جينا مفاليها
عسى البرق فوق ديار غض النهد سمار=وينثر عليها المزن وبله ويرويها
على شان لاقام يتصافق بها النوار=وشيف الخزامى نابتن في مراعيها
ابى آخذك ياظافر معي يم هاكا الدار =على شان تنظر في عيونك وتوحيها
ولاشفت غروآ فوق وجهه يحط خمار=وشفت الرموش اللي على الخد يرخيها
هكا الساع انا ابنشدك عن جيزة المسيار=ولا اظن نارآ فيك شبت يطفيها

على عزف عود المغرم العاشق السهران
=ابكتب قصايد في غرامـي واباانتجهـا
لعين العنود اللي لهـا بالحشـا مسكـان
=اصب القوافي مـن خفوقـي وبرمجهـا
ليامن ذكرته هجـرس القلـب بالقيفـان
=على شانه اجـر المواويـل وازعجهـا
عسفنا قوافن صار صـدري لهاميـدان
=خيول القوافي لجـل شـرواه ابسرجهـا
غلاها كما المدفع وانا صرتلـه نيشـان
=سهومه لهـا ايامـن وفلبـي يلامجهـا
ابو شفتن حمرا وعينـن كمـا الشيهـان
=الا ليت لـو بالحلـم اجيهـا واهرجهـا
تعالا اللـذي سوالهـا جسمهـا الريـان
=هنوفـن بممشاهـا ذبحـنـا تغنجـهـا
طويلة معنق والجديلـه علـى الامتـان
=كما الليـل لازاد الهـوا فـي تموجهـا
وثمانن ورى الشفه مثل حبـة الرمـان
=سلوك الحرير تضيـق فيهـن مفالجهـا
عريضة جبين وخصرها ضامرن جيعان
=وردفـن لياقفـت يهـزك تمروجـهـا
عريبة جدود وربعهـا كلهـم شجعـان
=حرارن اعديها علـى الكبـد ترهجهـا
الاليت ابوي وليت ابو من عشقت اخوان
=وليامااحصلتلي حلف محـد ايتزوجهـا
ولاليتنـي طيـرا يشيلنـه الجنـحـان
=علشـان ادور طـب نفسـي واعالجهـا
انا الضامي اللي يا(..)لشوفكم ضميـان
=عسى الله ضيقتنا مـن البعـد يفرجهـا

لي ثمان أسنين تايب عن دروب الغرام=والعشيه شفت مهرة خفوقي وجمحت
مهرةٍ ماتنثني للعنان وللجام=تسذير من الهواء يالشقاوي وجفلت
غاليه ومحشمه عند اهلها ماتظام=تذبح العشاق برموشها لاسلهمت
ياالشقاوي شفتها يوم مرت بالمنام=ليت قلبي في سباته وعيني ماصحت
ليت ربي حقق الحلم مع بدر التمام= ويستريح الخافق اللي همومه نوخت
كان راحت يالشقاوي على الدنيا السلام=ماتهم اسنين عمري عسى مامهلت
بلغ الوافي مع الشيخ لايلحق ملام=قدمي النواح مطلق ذلوله درهمت
غر منها واطلق رسنها وقت العسام=ثم راحت عقبها لاحنين ولاارزمت
ماجداه الاالتوجد وطاويه الهيام= لين روحه سلمت للولي واستسلمت

لليال الماضيه شدني عذب الكلام=المشاعر مرهفه والضماير هجرست
والقوافي جالها وسط صدري إحتدام=والقريحه بالبحور الغزيرات إسبحت
الغلا بقلوبنا قد بنينا له خيام=والذيابه في خفوق الهواويه عوت
شفت قيفانن لها جرني سلك الغرام=وإذكرت عيني ديار الحبايب ودمعت
وإذكرت من مشيها مثل مشيآ للحمام=في مطار القاهره يوم قدامي مشت
من بنات المملكه حيها وحي اللثام=والعباه اللي على جسمها الباقي ضفت
اجمعتنا الطايره بالسما فوق الغمام=وبرض جده حولت بالمدرج ونزلت
الجدايل خلفها مثل ديجور الظلام=ضافيات وللردوف النوابي حولت
خصرها ملهوف ماتقل تاكل للطعام=والخدود ابروق مزنن تعاقب لابرقت
العيون مكحله والخشم سلة حسام=والنهود بصدرها تو زمت واستوت
قلت اببدا هرجتي بالتحيه السلام=((والجمل ماضرها كان قالوا مالقحت))
وجيتها وضح النقا والفشق ملي الحزام= خابرن يمناي تعطب عدوي لارمت
مير شفت ان البلد سايده حكم النظام=والخلايق كلها تحت هالحكم اخضعت
ولا بغيت انزل الراس وارضى بالحرام=بالدروب العوج ماظن رجلي قد مشت
ثم قصبت رشاي من بعد ماركب المقام=واللهايب ولعت في ضلوعي ماطفت
ياوجودي وجد من طاح في يوم الزحام=يوم شلفا الخصم فجت ضلوعه وطلعت
طاح ماحوله سند لاخوال ولا عمام=وإلتفت لنياقه اللي بها القوم اشلعت
يعتزي من قو باسه ووده بالمقام=وكل ماشد العضود إنحنت به وارتخت
مابغيت اكشف خوافن بصدري للأنام=مير قيفان العتيبي بجاشي ولعت
شاعرآ متربعآ دوم في عال السنام=من حرارآ للجبال الطويلات اشهرت
يالحشيم اقبل تحية محمد بالختام=شاعرآ جارا بيوتن لبابه مانصت
والهوا مابه سلامات ملعون الرسام=كم زحولن قبلنا من سبايبه إشتكت

يابو محمد ليتنـا مـن ورى طريـف = بدارآ سمـاه غيـوم وارضـه عذيـه
البـرق يبـرق والسحايـب مراديـف = ساعـه رشـاش وساعتيـن بـرديـه
والثلج جامد فـوق روس المشاريـف = من الشمس متكسـر شويـه شويـه
نسمة هواهـا تقـل فريـون تكييـف = وحمـر الـورود اليانعـات محنـيـه
مبعدك ربي عن هل الغـش والزيـف = ماتشوف حولـك غيـر جـال الثنيـه
اللـي ترحـب كـل ماجالهـا ضيـف = مـدري غـلا ولا النـوايـا خفـيـه
معها نبا نخطف من الحكـي تخطيـف = قلوبنـا خضـرآ ولاهــي صـريـه
يهزنـي شـوف النهـود المواقيـف = مثـل الزبيـدي بالفيـاض الخلـيـه
ومبيسمن فوقه مثـل سلـة السيـف = وعلـى ردوفـه مثـل ذيـل العبيـه
ونا ادري ان الوضع ماهو على الكيف = برامـكـو ومكلبـشـاتـن يـديــه
اوجيهنا متشلهبه من هـوا الصيـف = ومقابليـن الغـاز صبـح وعشـيـه
احدآ نصى بيروت وحدآ على جنيـف = وحنا علـى الريدنـق روحـه وجيـه

فزيت فزة قريص الداب وانيابه=الصل الاسود بساقه دافقن سمه
من مجلسه فز مير انهارت اعصابه=من عقب ماساق سم الداب في دمه
وقفت مذهول اشوف العلم واسبابه=والدمعه اللي مسحها حزام في كمه
دموع عينه على الشاشات سكابه=والعبره ليا هرج تغشاه وتخمه
يبكي على نادرآ قفتبه ركابه=اخوه...ماهو ولد خاله ولاعمه
الحزن خيم علي وشرع ابوابه=وشلون...(وحزام اخو ويهمني همه)
كن النداوي ينوش العين مخلابه=لاشفته وشفت ابوه الهرج مايتمه
الله يجبر عزاكم فيه يااقرابه=ويجبر عزى مطير باللي صان للذمه
موتت شرف موتته يوم القدر صابه=لومات يبقى اسمه يرفرف على القمه
والله يفني هل التكفير واذنابه=اللي يجون بخفى والناس ملتمه
اللي للاسلام واهل الدين حرابه=افكارهم بالجهل والخبث منسمه
فتح لهم خبثهم للنار بوابه=وصاروا على ارض الجزيره فتنة الامه
وحنا لهم كان نار الحرب شبابه=تخسين ياشلتن للفسق ملتمه
والله لو المواجه ينفتح بابه=مامنهم اللي يعود سالمآ لمه
لكن علة بطن مالناس تدرابه=الا ليافجر اللي بنارها تعمه

ياسلام الله سلامن كثر رش الغمـام=من مزونن يقتفي وبلها ظرب بردي
من يجي ويحط في كف يمناه الخطام=قبل يسبق جيته واحدآ عرفـه ردي

مرحبا ترحيبةٍ تاصلك وقت الدوام=تاصلك مخصوص مني ولاضاع جهدي
استلمت اخطامها وحتميها فالمقام= شفتلي واحد مع الحزم جايك وإعدي

البقابك ياحـزام القبيلـه بالزحـام=البقا واردهـا ياهلابـك يابعـدي
النجوم تبين ياصاحبي وقت الظلام=وانت مثلك خابره مايطوفه مقصدي

ماعلاكم زود ياذيب عالين المقـام=ياشبابه لابتي ياشبابـه مسنـدي
قلتها وقولها دام مايفهـم حـرام=ماتجي لوجاك ياذيب يطرخ وهبدي

لاتضيع زهبة البندق اللي بالحزام=قبل ترقى الضلع وتشوف جره للجدي
مقصدي دارآ بها شفت من داس النظام=شعبها مابين طيب وجاهل واجودي

انت ويش اتقول ياذيب وش هاذا الكلام
=من يدي من بعدشوفه على الناظر مدي
يامحمد ديـرةٍ كاثـره فيهـا الهـوام
=جيت اقوم شيخها راح يمشي وإحـدي

البلا سكانها من خوال ومن عمام
=والبناخي قمت اشوفه بجده يقتـدي
ياشبيب الهمس يزعج خفيفين المنام
=كيف والبندق فهقها علينا المعتدي

يامحمد روحو قل على الدنيا السلام
=مافهمنا رطنهم راح صمٍ مع بـدي
لو تدير الدائرة مايصحيه العسـام
=ولوتصعق فيه معاد دون الاحمدي

ياشبيب ان جيتهم خص هاذاك الغلام=بلغه من بعد ذنبه يذكيله فدي
الصقور اشوفها عودت مثل الحمام=خيرة الله عن حسامن قضبته في يدي

يامحمد كان خشم الولد جاه العرام
=حيلة الله وكبرا ولوماهوب ولـدي
باقٍ ياخوك ماشفت وش سوا النعام
=يوم لاح البرق والسيل جايله ودي

كل رجلآ مكسب الطيب له شف ومرام=مانلومه لو مع الدرب الايسر يحتدي
الجمل لايسرحه صاحبه لرضن وخام=لوخيال الوسم يبرق عليه ويرعدي

للهجـس قـاف و للقـوافـي مـلافـي =و تلفـي قوافينـا صليبيـن الاشــوار
و الشور شور اهـل القلـوب النظافـي = عصمان الاريا اهل المواجيـب و الكـار
مـا تعطـي الـراي العقـول الضعافـي = و لا النفوس اللي عـن الطيـب قصّـار
و لا يبخـص القـالات كـود السنافـي = مثـل شرواكـم يـا طويليـن الاعمـار
يا اولاد ابوي الحـال مـا بـه خلافـي = و بخير كـان إنـي عتيـقٍ مـن النـار
مـار البـلا نومـي غـدا بـه تجافـي = و ليا بغـى جفنـي لذيـذ الكـرى طـار
عقـب التلفـت بالـدهـر و الجفـافـي = لقيـت روضٍ بـه بخـتـري و نــوّار
فرحـت بـه و اللـي علـم بالخوافـي = و جيت بـلا عانـي حيثـه للابتـي دار
و من عقب مـا شيـدت فيـه الرفافـي = و قمت اتعـازم مـع صواريـم سنجـار
لمحت انـا ام جنيـب تطحـس خلافـي = و انـا جـزوع و ذي عـادات الاحـرار
وش رايكـم يـا مصخريـن القـوافـي = ياهـل السمـوت معبـرة كـل معبـار
أشـد عنهـا فـي وسـيـع الفيـافـي = و لا اهبدها و عد ما صايرٍ صار

يامرحبـا حييـت مـن قلـب صـافـي = بعـداد برقـن لاح وعــداد الامـطـار
يـوم القوافـي جـن غنـيـت قـافـي = مـادام لـي بالشعـر مـارد ومصـدار
شبري مع اهل العـرف ماهـو بهافـي = والهجـن لاجنـا سرجنالـهـا مـهـار
مـا مشـي بدربـن للعقيـده منـافـي = دربي ترى مـن درب وافيـن الاشبـار
ولله درك يــازمــان الـنـصـافـي = يومـن للقيـفـان والشـعـر شـعـار
وياشوق من تجلـى الثمـان الرهافـي = نشرات الاجوا عقـب نشـرات الاخبـار
مـادام وضـع عنـاد وعبيـد خـافـي = مانـي بسيـف لـروس الاجـواد بتـار
وليـاذرت فـوق الخطـوط السـوافـي = عنهـا نحيـد يميـن مانمشـي يسـار
الضلـع الاسمـر بالدجـا مايشـافـي = ولا الضحـى ماظـن يخفـى للانـظـار
انتـه حشـيـم وبالمواجـيـب تـافـي = وتميـز المصلـوح وتمـيـز الـضـار
لـولا الوجـع ماشـيـدن المشـافـي = ولا صـار للاوجـاع باخـص وبيطـار
ولايامـن اللـي يمشـي القـاع حافـي = يلمس حدى الرجلين شوكـه ومسمـار
ون كان شفـت مـع البـوارق شعافـي = تنشي من قريـب وتـردم علـى الـدار
لاتلتفـت لـهـل العـقـول الخفـافـي = احشـم جنابـك وتـرك الـداب بالغـار
الرجل له بشتن علـى اعضـاه ضافـي = يذريـه ويظلـه عـن اللاهـب الحـار
ومـادام ياكحيـلان للـشـق رافــي =لاتطـول حبـال الرشـا كانهـا اقصـار
كـل الـدعـاوي يارفيـقـي عـوافـي = دام الكرامـه سالمـه يابـن الاخـيـار
وقبـل تحيـاتـي ومـاجـاك كـافـي = يامعرب الجدين يامكـرم الجـار

سمعت لي كلمةٍ عوجـا لهـا مـده = كلمة جفـولٍ حذفهـا دون ياسمهـا
لكن طيـري علـى (لاشي)ماهـده = ولاني على الدبك أشب النار واشعمها
أبى اتغاضى وأقول الهرجـه مصـده = لو كان كلمة هل الوجهين نفهمهـا
ياهيه ياللـي لفيـت بعلـم قـم وده = للي لحانـا عـن أمثالـه نكرمهـا
قله ترى الخيـل لاراحـت لهـا رده = أقضبلها البيـرق وخلـك بمقدمهـا
لاتصير مثل أرنـبٍ للقشـع منحـده = لاشافت طيور شلوى يحوم حايمهـا
على النقا سلم أبوي وجـدي وجـده = ماأمشي على جرة العالم واهاجمهـا
ون كان مافيـك لاصملـة ولاشـده = الناس ماهي عبيـدٍ وأنـت حاكمهـا
لاجتهم العـوج كـلٍ سيفـه يحـده = وشلفًاً لقص العصب والعضم ولمهـا
الجرف مثلك يجيـه السيـل ويهـده = زبرة ترابٍ يشيـل المـاء معالمهـا
وطويق مانته ترى يالاجـودي قـده = لاتطب فـي غبـةٍ مانتـه بعايمهـا

لا ياقليل العرف لاتقرب النار=وانته جنوبك يالضعيف صخيفه
لوكان عندك سيفآ ابلج وبتار=ماظن تسطي فيه يمنن ضعيفه
ياذا الكديش اللي له اخبار واذكار=في سكة اصحاب العقول الخفيفه
مانت المعزب يوم حليت بالدار=حتى نقول فلان قصر بضيفه
عليك قد حطوا هل العرف رادار=لاتحسب ان العين عنكم كفيفه
مالك ببنك الطيب درهم ودينار=ولو تحتزم بسلاح مامنك خيفه
ياللي عن اعدود الروى حبالك قصار=حشرت نفسك بالثياب القضيفه
البوم مايذكر قنص فيه صقار=ولو صف ريشه ماينومس رفيفه
له حومتن تقصر عن صقور سنجار=اللي مواكرها بروس المنيفه
للخيل خيالآ صميدع ومغوار=إتنومس فعوله ليا سل سيفه
وإن اعتلاها واحدآ هافي اشبار=ماذاق من مركاضها الا الكليفه
لا كاسبن كسبن ولا ضادآ اخطار=مايحتزمبه للأمور العنيفه
تعرف هل الوقفات لاصار ماصار=ولا الرخا كلآ فراشه قطيفه
واللي غزا في بندقن مالها عيار=النصر ماهو بالنهايه حليفه
ليا ارتكاله بالبلاجيك بيطار=خلا دموعه من ندبها ذريفه
وعن الصحيح ان كان طاشن الانظار=ماينفع القراي ما بالصحيفه
الطايره مايقودها غير طيار=ليا اقلعت مايطشها بالحتيفه
خبير بااجهزة التحكم لياطار=وكلآ حسب عرفه يحط بوظيفه
يارجم ياللي لك معزه ومقدار=بقلوب راعين الطبوع الشريفه
عسى المزون اللي بها البرق سمار=اللي رعدها غادينله وحيفه
تنثر على ترابك غزيرات الامطار=وتقش عشبن يابسن تقل ليفه
عشبن مهشم كاسي اوراقه غبار=محدن رعاه وكل نفسن تعيفه
وعقب المحل تنبت بختري ونوار=واللي رحل يعلن لدارك نكيفه
دنيآ بها شفنا غريبين الاطوار=قامت تداحم بالمتون النحيفه
ولا انت ياكحيلان يامكرم الجار=ياوافي الاشبار ياريف ضيفه
يكرم جنابك يالوفي يابن الاحرار=عن واحدآ حطوه عقبك خليفه
اللي ركب ريمه علي أمس واغار=عندي له سيوفآ حدادن رهيفه
لاشك من ربعن حشيمين واخيار=ليته يفارقني ويذلف بكيفه
ماودي المدفع ينوشه ليا ثار=ولا ودي تطبح عليه القذيفه
لكن حداني ثم غنيت الاشعار=من عقب فنجال الدلال النظيفه