::|[ ديوان جزل القصيد/الشاعر :عبدالله مرزوق المرشدي]|::

الله عليه اشلون عيـد بدونـي=وانـا بعيـدي ماتهنـا بدونـه
لا والله الا فيه خابـت ضنونـي=وانا على عهده مخيّـب ظنونـه
عيدي قضيته بين هم وغبونـي=وعيده وناسه ماشكى من غبونه
ياوجد حالي وجد من به طعونـي=كسير حـربٍ مثخنـاتٍ طعونـه
خلوه ربعـه بيـن ذلٍٍ وهونـي=تدمع عيونه كـل مـازاد هونـه
يبكي على فقد الاهل والضعونـي=يذوب حاله يوم قفـت ضعونـه
على الذي يحوي جميع الفنونـي=من كل وصفٍ زين كمّل فنونـه
الجادل اللي زاد عـوده ليونـي=ريان عوده ناعـمٍ بـه ليونـه
راع العيون اللي حورها فتونـي=اهداب رمشـه للمعنـى فتونـه
لاهز رمش العين يسحر عيوني=ماقدر اناظر في نواعس عيونـه
وان قال ياحبي تهيض شجونـي=صوته يهيض بالمولع شجونـه
من حلو صوته ضاعت ابراج فوني=ماغيـر اردد آه ياحـظ فـونـه
ماغير انا والشوق دونه ودوني=شوقي ورا شوقه وجنبه ودونـه
لو زاد بعده يوم سبـب جنونـي=وانا صراحه ميتٍ فـي جنونـه
صادق بحبـي مايفكـر يخونـي=وانا بعد مثلـه مافكـر اخونـه
ظني بمحبوبي لحبـي يصونـي=حتى ولو ماصان حبي بصونـه
يامر على روحي وكلي يمونـي=وانا عتابه بس ماقـدر امونـه
واجد كثير اللي لقربـي يبونـي=وادري بعد ياكثر منهـم يبونـه
قلبي يصيّح مالقى مـن يعونـي=قلب العنى ياليت ربـي يعونـه
بالله ياللي فـي مكانـه تجونـي=لاصار غافـل مـادرا لاتجونـه
لانه يخاف من اصل طبعه حنوني=مشاعر المجمول جـدا حنونـه
عن حال ملهوف الحشا خبروني=وعن حالتي ياليت لو تخبرونـه
قولـو بحبـه كاثـراتٍ ديونـي=قلبي بحبه غـارقٍ فـي ديونـه
مانساه لو باحلى البني خيرونـي=والمشكله لـو كـان بيخيرونـه
ياناس احبه صدقو واسمعونـي=وان ماقتنعتو ليتكـم تسمعونـه
خلوني اكتـب علكـم تفهمونـي=يمكن لطيف الروح ماتفهمونـه
شعري على حسنه يسطر لحوني=واكتب جزيل القاف وابدع لحونه
اذا قريتـوا قصتـي تعذرونـي=حتى ولـو مظلـوم ماتعذرونـه
اللي قهرني كيف عيـد بدونـي=وانـا بعيـدي ماتهنـى بدونـه

البارحه من هيـض شبيـت ضـوّي=في وسط روضٍ من سنى الضو ضوّى
بارضٍ خـلا ماطبهـا احـدٍ مهـوّي=يرتادها اللـي مـن عنـاه يتهـوّى
ماغيـر انـا والهـم فـي متـلـوّي=باقصـى معاليقـي لجـا ثـم تلـوّى
ازل كيفي وان قضـى قمـت اسـوّي=كيف النشامـا فـي دلالـي مسـوّى
قامـت هواجيسـي بفكـري تـدوّي=ياكم وكم طـاري علـى البـال دوّى
اكبر هجوسي فـوق نـاري تعـوّي=واصغرهم اللي في سما الفكر عـوّى
الهـم ينـزل والمـسـره تـطـوّي=كني اشـوف خيـام فرحـي تطـوّى
ليلى بقى ثلثـه اونـا اقـول تـوّي=اسمع ضجيـج الفكـر يقـول تـوّى
العيـن هلـت بالمـدامـع تــروّي=خلت بـذور العشـب منهـا تـروّى
على زمانٍ فـات مـن زيـن جـوّي=يوم ان فكـري صافـيٍ فيـه جـوّى
دنيا العنا مع كـل مـن جـا تخـوّي=وغلطان من للوقت صـادق وخـوّى
سـود الليالـي بالمخاطـر تشـوّي=عـزى لقلـبٍ مـن لهبهـا تشـوّى
من مـال وقتـه والنصيـب متثـوّي=لو يرفعـه بالجهـد طـاح وتثـوّى
ومن طاح حظه مانفـع بـه مقـوّي=ماينفـعـه يـاكـود بالله تـقــوّى
النفـس تنـوي والطـواري تغـوّي=وابليس من طاعه عن الدرب غـوّى
ماينفعـك لا طحـت ترديـد لــوّي=ومايرجع اللـي فـات ليـتَ ولـوّى
هـذا وانـا بالخيـر ماجـف نـوّي=يمناي فيهـا الطيـب خيّـل ونـوّى
قلته وراق البال فـي جـال ضـوّي=لين ان نور الصبح شعشـع وضـوّى

الحلو مشيه علـى حبـه=يازين شكله و هو ماشـي
لاقبل تقـول انـه مشبـه=كنه من الأرض متحاشـي
خصـره وردفـه تلاعبـه=ما بين ثابـت ورعاشـي
جافل على طـول متنبـه=يحتاط من هرجة الواشـي
يفقد لبيـب العقـل لبـه=ويضيع فكـره وينداشـي
ماهـي نحيفـه ولا دبـه=ريانـةٍ عودهـا نـاشـي
جبينهـا كنـه اللمـبـه=وخديدها كنـه الشاشـي
جمالهـا واصـلٍ تـبـه=تصرف من الزين بالكاشي
تقـول بالحسـن منصبـه=لاشفتها هيضـت جاشـي
الموت كان الغطـاء ذبـه=تلامـع بـروق وفلاشـي
كله فتـن ربـي و ربـه=وش لون للحين ما انّاشي؟
لو امدحـه كنـي اسبـه=والخافي اعظم من الفاشي
هي سبة الجرح هي طبـه=هي جمرة الشوق لاطاشي
من شافهـا كنـه مسبـه=مخطور يبغالـه نعاشـي
خطرٍ على السوق لاطبـه=منه المزاييـن تنحاشـي
لاقبل يجـر الخطـا كبـه=لا تلتفت فيه يـا ناشـي
وان كان تقدر بعـد هبـه=عساه ينصـاب برباشـي
قل يا ولـي المهـا خبـه=ان كان تبغـاه يعتاشـي
ان كـان تغليـه وتحبـه=خله على طـول بفراشـي
تـراه للمشكلـه سـبـه=لاتتركه يرمش ارماشـي
من عقبه السوق ما طبـه=ياكود لحظه وانا ماشـي

عن مدار الحب حتى لـو ورعـت=انجذب لاشفـت نقـاض الجديـل
والله لتبطيـن وانــا مارجـعـت=وينتهي حبك علـى جـرفٍ مهيـل
دوري غيري يجيك اليـا امتنعـت=وقابليني كـان جبتـي لـي بديـل
اعتبرتك غصـن يابـس وانخلعـت=عقب ماظنيـت فـي ظلـك مقيـل
اعتبرني نجـم فـي جـوك لمعـت=لاعتذرت وقلت انـا عابـر سبيـل
اعتذر لوكان فـي قـدرك وضعـت=ماقدر اتعب في هـواك بلاحصيـل
بس اببقى طول عمري ماستطعـت=اذكر البسمـات والوجـه الجميـل
اسمحيلـي عـاد اكـرر مابدعـت=ماقدر امشي في طريـقٍٍ مستحيـل

عاد عيدك يامقـر الزيـن كلـه=عاد عيدك بالمسـره والفـروح
ياسمو الحسـن يـاورده وفلـه=ياعيون الحور يالصوت البحوح
يانعيـم العـود يادقـه وجلـه=ياهوى المشتاق ياطب الجـروح
ياجنون الشوق ياشوق المولـه=ياغرامٍ فـي خفوقـي مايـروح
يادواي ومخرجي من كل علـه=ياسهوم الموت يالطرف الذبوح
ياغرام صاب قلبي فـي محلـه=فج صدري مابغيت اشكي وانوح
ياعذاب لو يطـول بـي ماملـه=خاضعٍ له بالهوا مخلص نصوح
يالوصوف النـادره يالمستجلـه=في قصيدالشاعر اللي لك يبـوح
جيت اعايد واعتذر عن كل زله=اطلق عنان الرضا خلك سمـوح
كل عام بخير وانتـي مسفهلـه=ياوصوف الزين في عال السفوح

لاهاض جاشي واشتعل فيه لاهوب=قامت هواجيسي توارد عليّه
منها جفن عيني عن النوم مقضوب=وباقصى خفوقي كيةٍ فوق كيه
صورتها من واقعٍ شبه مقلوب=ومفهوم يتغير على كل نيه
جرحٍ عطيب وخافقي منه معطوب=وحلمٍ كبير يمر صبح وعشيه
ليلٍ بهيم وصبح وشروق وغروب=واربع فصول وكورةٍ دايريه
برد ودفا وافراح واتراح وحروب=بين الضديد وبين ضده لضيه
مشاكلٍ مابين سالب ومسلوب=لابد تطحن في رحاها ضحيه
كرّه وفرّه بين غالب ومغلوب=كل على ماراد يرمي رميه
آهات مع حسرات والدمع مسكوب=باسباب جرح وعلةٍ داخليه
وساعة صفا فيها الوفا ماله اسلوب=ولا للامان بدايرتها قضيه
نجمات تتراقص على لحن مسحوب=وغضنٍ تهزع مع لحن سامريه
زرعٍ يموت وباذره توه حبوب= ووردٍ ذبل محتاج رد العطيه
لذه ورى لذه يجي وقت وتذوب=في غبة الاحزان تنسى الهنيه
نسيان في نسيان واوزار وذنوب=باسباب نفسٍ في هواها شقيه
بين الهوى والنفس واشواق محبوب=دارة مدارات العلوم الخفيه
مطامع ولذات شهوات وقلوب=ولاكثرو الرعيان تفنى الرعيه
تفكير في تعمير طوبٍ ورى طوب=اخذ وعطا واحلام نفسٍ رضيه
تخالف الهقوات في كل مضروب=وتقطع مسافه والنوايا مطيه
موج الظروف اشكال والموج سالوب=يسلب مفاهيم العقول الذكيه
تسابق الاقدار والغيب محجوب =وكف الليالي بالحوادث نديه
احداث مرت في حظارات وشعوب=والمقبله ليلاتها سرمديه
لحظه تمر وتالي الوقت مطلوب=تستوفي وتوفي حساني وسيه
رحله عمر تلقى لها درب ودروب= في سكةٍ بين المنى والمنيه
مفهوم يبقى كل مافات محسوب=واللي يجي في علم رب البريه
واجب تطيع الشور يالعبد وتتوب=مادام باقي بالليالي بقيه
تب للذي شانه من الخلق مهيوب=عساه يغفر مامضى من خطيه
قلته وانا ماني على القول مغصوب=اخذ من الجزله واكب الرديه
وختامها آخر بيت بالمسك مكتوب=صلوا على المختار مليون ميه

علم الدكتور باللي كـان جـاري=علمه بالضبط ويش اللـي جـرا
قله ان المرشدي صار انتحـاري=في هوى اللي صاب قلبه مـادرا
ياقصيدي علمه وش كان طـاري=خـل قيفانـه توضـح مـاطـرا
قل لبو عبدالله ان الذيب سـاري=بس ليتـه فـي مكانـه ماسـرا
خابر الدكتور بالحب استشـاري=له بشرع الحـب هيئـه وخبـرا
عاقـلٍ فاهـم ولـه عقـلٍ اداري=شيـخ مثلـه بالمكـارم ينـدرا
اشتكي من جور خـلٍ مايـداري=فـي عذابـي زاد حـده وافتـرا
حبه بقلبي مبنّـي لـه حـواري=خصها لاصغـر جروحـه تجّـرا
حط له باقصى معاليقـي كبـاري=فوقهـا لوحـات باسمـه تنقـرا
شب في جوفي مثل بركان نـاري=كن قلبـي فـوق نـاره يصهـرا
طايعٍ لي بالهوى دون اختيـاري=في هواء غيري يبيـع ولا شـرا
بس في وصله يتعب كل ضـاري=والجفـا بالحـب فعـلٍ منـكـرا
دوك وصفه كان منت بعنه داري=دام عرفك نرتجـي منـه ثمـرا
ماطلع مثلـه بلبـاس الخـزاري=ماله مع البيض بالزيـن خشـرا
كن خصره من قليل الحال عاري=فوق ردفٍ ماشكـى فقـر وعـرا
له عيونٍ في حورها الموت جاري=مثل حد السيف فـي يـد عنتـرا
نور خده برق مزنٍ فـي غـداري=والشفايـف لـون جمـر جمـرا
كاملٍ بالزين في حسنـه يمـاري=بالخلايـق مثـل حسنـه ماتـرا
زينه اصلي مايقلد بـه تجـاري=ماعترف بوجود كحـل ومسكـرا
نابي الردفين والبطـن متـواري=مدمج الساقيـن مشيـه بختـرا
كن في صدره مثل بيض القماري=يجرحه لبس الحرير مـن الطـرا
الخجل طبعه بهرجـه مايجـاري=لون خده لاهـرج صـار احمـرا
حروته في نجد يذكر بالطـواري=ساكنٍ بالعاصمـه ولـه قصـرا
جاتك الابيات من نظم ابتكـاري=هـات ماعنـدك وربـي يستـرا

ودعتها في غمرة الشوق مذهـول=بين الفراق وبيـن مـر الحقيقـه
ضاع الكلام وتهت مادري وش اقول=القلب يرجـف والمحاجـر غريقـه
السان حالي بالخفى قـال معقـول=لكن لقيت الصمت افضـل طريقـه
سالت مدامعها على الخـد هملـول=من حورها دمع المفـارق تريقـه
تنظر بنجلٍ حدها سيـف مسلـول=كن المنايـا فـي حورهـا طليقـه
على الخدود الناعمه جالها سيـول=وانا انصدمت وخاطري فيه ضيقـه
مافي يدي حيله ولاكنـت مسئـول=عن سبة الفرقـى طلبـت الوثيقـه
قالت انا مثلك ترى البال مشغـول=مادري علامك ليه وصلـي تعيقـه
قفت وانا قفيـت والقلـب معلـول=كن الحشا تشتب وسطـه حريقـه
نادت بعال الصوت قالت نبي حلول=قلت الامـل بيديـك يلمـع بريقـه
قصة غرام وسجلت ضـد مجهـول=محدن عرف هي حلم والا حقيقـه
قصة غرام الها مـدارات وفصـول=يوم انتهت تحطمـت فـي دقيقـه

رد الثنا بالشكر ماهوب تطنيش=كلمة وفا لا قلتها تبرد الجاش
ماقلت بدي شين والا مابديش=كلمه بدت من خاطري قلتها كاش
ياصاحبي لا صار بالفكر تشويش=يحس من كيفه ويضرب على ماش
ماكل قولٍ تسمعه تفتهم ويش=من هرجة الشعار تنصاب برباش
محدٍ بسامع لك ليا قلته له ليش=ولانته بفاهم لين تتعب وتنداش
اقر السطور وخل عنك الخرابيش=ناظر بعينك زين لاترمش رماش
لاتحرك الاشجان ياناعم الريش=ريح ضميرك من متاهات ونقاش
ماني بيمك ياعشيق المرابيش=اشوم بعيوني وفكري ليا طاش
اقلط على الواجب واكب العراميش=ولاصدت صيد اترك على دربي عراش
نفسي لها عن ماكر العز تنبيش=وعيني سما لو كنت جالس على فراش
طبعي وفا مافيه كذبٍ وتغشيش=قرمٍ شجيع وقلبي ابيض من الشاش
يشدني برق المزون المراهيش=اطرب ليا من شفت جايٍ له رعاش
ماتهت مع راع الكفوف المناقيش=حب البني ماحط في قلبي عشاش
الا التي ماعرضت للطواريش=ريمٍ هواها صار في مهجتي داش
بدرٍ ملكته في طرف نوره اعيش=وانسى النجوم اللي لها لمعة فلاش
ماودي اذكر حسنها الحين واطيش=ادري بقيفاني على وصفها عطاش
ماني مهمش مطلع القاف تهميش=اخاف مما قلت يجيك هشاش
القصد واضح ماخدش القيل تخديش=قولٍ سليم ولا بدا فيه وشواش
اترك زمان اللعب والحب والطيش=لاتصير خبلٍ من ورا الناس تعتاش
مافيه باللفات نقطه وتفتيش=دربك خضر ليتك مع الدرب تنحاش