::|[ ديوان الشاعـــر / شبيب العتيبي ]|::

يالله دخيك من الضيقه وموجعهـا = لاضاق فيك الفضا بالقلب مقساهـا
من يشتري ضيقتي لاجيت بايعهـا = لعـل قلبـي يسامحنـي وينساهـا
هي لازمتني وأنا عجزان لاأقنعها = وشلون تبعد وعني تبعد خطاهـا
ترسم خيالي وتجبرني وأطاوعهـا = وترسم مساحات حزني ماتعداهـا
أهيم في بحرها وأبحر وأشرعهـا = وأرسي على ساحل الضيقه وميناها
والعبرة اللي تطيح أحاول أرفعهـا = لاترتسم ذنب فيه وأجلـس أقراهـا
وشلون مدام قلبي صـار يتبعهـا = تقفي وتقبل معه ويصيـر بيداهـا
ماكنه الا بروحي صار يزرعهـا = ويرجي ثمرها مع الايـام يجناهـا
وأصبح خصيمي يصورها ويطبعها = ويبثها في عروقـي ليـن يملاهـا
حتى إني ادمنتها وأصبحت موقعها = وأصبحت أدور عليهـا وأتباطاهـا
مدام اهي وافيه بالقلـب أبأجمعهـا = ياأوفى من الناس والأنفاس وأسماهـا

يا مضيع دينـك علـى شـان دنيـا = دنيـاك ماتسوالهـا جنـاح بعـوض
لادايمـه صحـه والاعمـار فنـيـا = واخذ الحذر منها ترى شي مفروض
لاتغـرك الدنيـا ولوجـت تغنـيـا = لاهي ديار الخلد ولاتشبـه الـروض
هي مزرعه والـزرع يقفيـه جنيـا = يهني من زرعه رضى الرب محظوظ
أحدٍ شرب والحوض مشروب هنيـا = وأحدٍ منع دونه والابهـام معضـوض
واللـي زرعهـا بالامانـي وبنـيـا = خسر الحصاد بوقفة الحشر معروض
اهنـاك النـدم ماينفعـك لوتمنـيـا = وكبر الخسارة ما تلاقيلهـا عـوض
هي المـرض بالقلـب يتنـاه تنيـا = حتى تسيطر فيه والحالـك تغـوض
ياجعلـهـا بيديـنـنـا ماتحـنـيـا = ويجعلهـا فقلوبنـا مالهـا نــوض
ياجعـلٍ فـي حبهـا مــا تعنـيـا = وياجعـلٍ بالاخـره فيـك معيـوض

الحزن دمعه والليالي مقابيل = والخافي أعظم والليالي سريعه
يا مانكف الدمع وأغرق مناديل = وياما تحملنا مصايب فضيعه
ولاكننا عشنا وصرنا رياجيل = وصارت ضروف الوقت عند طبيعه
يابوي عشت (اب) وقت فيه التهاويل = لكنني يابوي ماأرضى الهزيعه
عيالك ترى يابوي ركابة الخيل = اللي حموها في الليال المريعه
وأبشرك صارو نجومٍ مشاهيل =في ضل اخوهم والمنازل رفيعه
هذي ثمان السنين جمله وتفصيل =عجزت لا أنسى صورتك والفجيعه
ماهمني سفلة هل القال والقيل = سقط المتاااااااع اللي مبين ضريعه
تضحك خبول الناس شبه المساطيل = العقل مابه والمنازل وضيعه
يحرم عليهم مدنا للفناجيل =لين يعرف الرجال من هو تبيعه

كنت انتظر جيتك وأبطيت وش فيـك = ماهيب عـادة ليـه تبطـي عليـه
على رصيف المدرسه كنت اناديـك = ويرجع صدى صوتي من الحزن ليه
ماجيتنـي بأجيك بالدمـع وأسقـيـك = ياقبـر ابويه ضـم هالحـزن فيـه
يبكيك باب المدرسه كيف مابكيـك = ويبكيك مصروفي ورعشـة يديـه
وتبكي بعد بسمة خفوقـي بطاريـك = وتبكيك روحٍ فـي ماهيـب حيـه
بأقول لا زعلان ترجـع بأراضيـك = إرجـع ولابأكـون ذيـك الشقـيـه
بأحب راسك وأحتظن ضمة إيديـك = لاكن لاعاد تغيـب عنـي شويـه
بأذكرك بالمدرسـه يـوم اصحيـك = يومك تقول النـور وجهـك سميـه
يبه علامك ليه مـا كانـي اوحيـك = يـبـه عليه ردقلـبـي وضـيـه
بأجلس بجنب القبر يابوي وأرجيـك = وأراجع دروسـي وقبـرك اهنيـه
يابوي حتى العيد بيمـوت ضاميـك = يابوي بعد إسبوع عيـد الضحيـه

الشعر يشرب من حلى موية النيل = وانته سبب شعره مسوي بلايا
يكتب بيوت الشعر من دون تحليل = ويرجع ويمسحها وتصبح ضحايا
القاف ياقف بالرموش المضاليل = تقول محكومٍ بسيف المنايا
ولاسلهمت عينه جيوش المشاكيل = تذبح وباقي للمعارك بقايا
واليا ابتسم تشبه مزون المخاييل = أعيش في جوه ويصبح سمايا
نوه حقوق ومقتفيها هماليل = تضحك ورود الأرض مثل الصبايا
الها جمالٍ يكفي اليوم هالجيل = لو انها تهدي وتعطي عطايا
تشبه طلوع الصبح واقفاية الليل = والها غلا وجدان بين الحنايا
فيها بيوت الشعر تاقف على حيل = من خوف لاتنقص جميل الحلايا
الها عبير الورد والكاد والهيل = وفيها يضيع الي يدور مزايا
الها فضا قلبي ديار ومداهيل = والهانظر عيني وكل انتمايا
وفيها رزانة شيخ صامل وحلحيل = وفيها إندفاع الي يقود السرايا
يامتعبه بالرجل والجيش والخيل = طرقه طويله وين بأقصى الدنيا
إليا مشى خطوه انا بسبقه ميل = لابد اجاري خطوته لا النهايا
صار التحدي فوق شرب الفناجيل = يما تجي والا تعود ورايا
أتعبت روحي والقضيه تهاويل = كانت حلم واصبح يسولف معايا
وان طال حلمي صار فلم وتماثيل = لو أشربه ماعاد يروي ضمايا

الشعر خص ونص .والنقض والفتل= والشعر هيض وغيض.غر القواافي
اليا إنبنا بيت القصايد مشى بتل = تحالي على ممشاه حد الرهاافي
والشعر ياذيبان ماينختل ختل = ينحت على صم الصفا بإحترافي
اما تتارا ونطلق رتل مع رتل = وضفا على كل القصيد العفافي
والذوق مشتل ورد يازارع الشتل = ازرع حروف المفردة ذوق واافي
شاعر اليا من قال ودك.بعد يتل = وشاعر اليامن قال بنقول كافي
وبعض الهواجس ينتله شاعره نتل = نتل المضارب يوم شال المصافي
وبعض القصايد ميته بيتها هتل = لوك بترفعها تجيك السوافي
والشعر يحيي بس برضه سبب قتل = يصبح سبب لاحرفوه الضعااافي

يا ثلاثٍ وصفهن وصف العفـاري = روحـاً يـم الخيـام وشفتهنـه
وسط الاجسام ونحال الخصـاري = كاملاتن كلهـن فـي وصفهنـه
يجبـرن العيـن للـده اجبـاري = لـو مـاودك تعايـن يمهـنـه
عايشات في ديرهـن فالبـراري = لبسهن ثوب الحياء مـا نزلنـه
مايجن بالفول من عند البخاري = والضحى سوق الذهب ماسيرنـه
سيرن غب المطر فوق الخبـاري = وكل حاجر فيـه نصـه ياصلنـه
في ذرى الي دونهنـه بالسـواري = وا هجاد الي يقـف فـي دربهنـه
في ذرى الشجعان مدمين الشباري = صايني اعراضهم عن كل ضنـه

تبي الحقيقـه ؟ وش تبـي بالحقيقـه !! = تبي الحقيقه .. صرت عندي ولاشي
كنت الامل .. في كل دقـة دقيقـه = وأصبحت ميت بس في قلبي الحي
يعني بدون مجامله : فـي حريقـه = حتى ولو اني تضايقت انا شوي
الكل منـا فيـه مليـون ضيقـه = لاناشدن عنك ولا تقول وش في
خل الجروح النازفـات الغميقـه = تبقى مع الأيام ذكرى كما هـي
لو كان بعدك بالحقيقـه ماأطيقـه = لكن بأصبر وأعتبر ماحصل شي
وقلبي لامنه جـاك رده طريقـه = خله يذوق النار ويجـرب الكـي
ممكن طلب تشهد على الخليقـه = لاجيت راجعلك انا طالبك عـي
كان السراب اغراك لمعة بريقـه = هذه سراب اللال لاتحسبـه مـي
محـدٍ روى منـه ولابـل ريقـه = مثل الذي في جرته يطلب الفـي
هذه مجرد حلـم بـس الحقيقـه ..: = إنك حياة الروح في وقتي السـي
شفت النجوم اللامعـات المويقـه ؟!! = انته هناك ودونك العالم اضمـي
شفت البحور الهايجات الغريقـه؟!! = انته عليها تزود ياحاتـم الطـي
شفت الصباح وبسمةٍ لـه رقيقـه؟!! = هذاك وجهك لاإبتسم يشبه الضي
شفت السحاب وروعته وتحليقـه؟!! = هذه غلاك بخافقي لاارتـوى ري
يعنـي ملكت....عنـدك وثيقـه = عنوانها..... ومـن تحتهـا اسمـي

والله اني لاسلمت ولاعشقة الذله = أمر ربي ياحبيبي وأنت راضي بي
ان جيت أزعل خاطـرك وأعلـه = انا اللي يصير بي شي ماتدري بـي
تقول دمعـي كـل يـوم آهلـه = ليش في بحر الهـواء ترمي بـي
المشكله باقي ماشربنـا الدلـه = وأنت حضرتك كل يوم اتغيبـي
هات علمني وش حصل من زله = الظاهر انك ناويـه تعـذيبـي
قالت ضروري علـم لازم حلـه = لايقبـل التأخيـر والتكذيـبـي
النـت لا تدشـه ولا تدخـلـه = اوقفل مواضيعه علـى ترتيبـي
قلت السموحه عهدك علي بحله = روحي ولابد ياصلـك تعقيبـي