يا جدتي تكفين لا تتركيني

كل البياض أعشقه وأهوى طواريه =إلا سرير(ن) للمرض والونيني
أنا الألم يا ناس بالحيل ما أبيه =يفتح مواجعٍ ماضية من سنيني
شفت الألم في عينها وصرت أرجيه=تكفى طلبتك خلها وأحتويني
ما بيدي شي(ن) أقدر إني أسويه=غير الدعاء من قلب دايم حزيني
غاب الفرح والحزن تهت بأراضيه=ما غير أدوّر وين فرحي وويني
يا عين كفي الدمع بالله كفيه=ماعاد باقي دمع في وسط عيني
زاد الألم في جدتي يوم أنا فيه=نادت جواهر من عناي الحقيني
بعيونها لوم وعتب مع مشاريه =يا جدتي لبيه بس آمريني
عن عينها دمعي أحاول أخبيّه=ضميت يدها وسط راحة يديني
‎رجيتها بنظرة يتيم(ن) تساويه=دمعة طفل ما عاش لحظة حنيني
لا ترحلين وقربك بعمري أشريه=يا جدتي تكفين لا تتركيني

اقتباس   المشاركة الأصلية كتبت بواسطة جمبـــــازي** اجبرتنا يا دوب نسجل دخول صح لسان الشاعرة جواهر ويسلم لنا هالتم يا ابو نواف ويعطيك العافيه