عديت في ديرتهم اليوم عديت ( من مذكراتي )

عديت في ديرتـهم اليوم عـديت = وحسـيت انا بالقرب وجتني المسرات
خذاني التفكير لحظه وسجيت = وذكرت عشق ٍ فات مافيه سـجات
يازين ذيك البنت معها تهنيت= وكم مرة ٍ معها تـهـنيت ليـلات
عشقتها والعشق فيني بنى بيت= وزف العشق فرحه على القلب زفات
من شانها كم مرة يمـها جيت= ومن اجلها أضرب طوال المسافات
قطعت مشوار ٍ بعيد وتعـديت = والكيلوا عداده مشى فوق ميات
لا اقبلت حول البيت هالحين فزيت= واصبح يدق القلب ياناس دقات
مريت ملفاها وانا عجل وازريت= ما اقدر أوقـّـف عندها لو لحـظات
ربع ٍ معي قالوا وراك انت هديت= وحالك وراه انحاس هالحين بالذات
قلت اسكتوا تكفون يا ليت يا ليت = نجلس هنا ليله بإحدى المحطات
قالوا علامك قلت ياناس مليت = ودي أريح كم ساعه معـدات
قالوا تكمل دربك اللي تباطيت= قلت اسمحوا لي خايف افعل مصيبات
وقفت جنـب وبسم ربي تهـاديت= والصدر محيوس ٍ وماليه غبـنات
ثم ٍ عقبني واحد وقال لي هيـت= وركبت خلفه لكن الحال عــلات
ثم ٍ عقبنا ديرة الـشوق وانهــيت= والصدر مسمـوم ٍ على كل مافات
يا ليتني من يمهم جيت ما اقفيت=واجلس معاها واتحفى البـشارات
ياليتني وحدي أنا يوم مريت = والله لا اجلس والغي كل الوعودات
كني طفل محروم أكل البساكيت= يوم احرموني من حسينة دلالات
حزني كتمته وسط صدري وكنـْيت= ما اقدر أقول إن العشق فيه حرات
أخر كلام القلب يا ليت ما جيت= وما دخلت ديرة شبت القلب حرقـات
ربي طلبتك حقق اللي تمنيـت= واللي عجزت أذكره في كل الابيات