ديوان الشاعـر / فهد المساعد

يبه وانا بعد اثنعش عـام حسيـت = اني قـدرت اقـول شـيٍ كتمتـه
ابطى قصيدي ماانكتب فيك وابطيت = اجر صوتي وارجع اجر صمتـه
ماودي اكتب بيت واندم على بيـت = ماهوب شعر الشعر كاني زهمتـه
الشعر كانه ماانحنى ليّّ .. ماجيت = ان ماعـزم مرثيتـك ماعزمـتـه
ان ماكتبته باازرق الدمع وابكيـت = كل الجـروح المبطيـه مارحمتـه
يبه وانا من بعدك ابـو التناهيـت = مامـر طعـمٍ للحـزن مانهمـتـه
يبه ( يبه ) كلمه وانا كل مااوحيت = كلمة ( يبه ) صديت والوقت لمته
يبه ( يبه ) كلمه وانا كـم تمنيـت = اهدم بها وابني بها اللـي هدمتـه
يبه وانا لاضقت رحت وتهجيـت = ركون بيـتٍ ضـم حلـمٍ حلمتـه
يومك تعلمنـي الامـن تحاكيـت = درس الحياه اللي كبرت وفهمتـه
هنـاك كانـت دلتـك لاتقهويـت = وهناك كان يساق طيـبٍ حشمتـه
وهناك ايه اذكرني هنـاك خليـت = طفلٍ مـلا بالدمـع دربٍ رسمتـه
هناك جاني علمـك انـك توفيـت = وهناك خاويت الشقـا واحتزمتـه
واليوم قلت اليوم يومـي ومديـت = كف القصيد وطاح شعر ونظمتـه
لكن بعد صمت اثنعش عام حسيت = اني عجزت اقول شـيٍ كتمتـه !!

لعنبو بعض القصايد كان مافيهـا حـلا = ما تـروح الا و تتـرك للحنايـا جلجلـه
تبتدي مثل المزون اللـي تسولـف للكـلا = و لا خذت قامت ترزّم مثل شهـبٌ منزلـه
فوق صدر الشاعر اللي عن طواريقه جـلا = لين شاف اخت القصايد بالقصايـد مقبلـه
يا هلا ب اخت القصايد كثر شوقي يا هـلا = اقلطي بين الحنايا وافهقـي جمـر الولـه
كل ضلعٍ من ضلوعي حافـظٍ درس الـولا = مثل حفظك للعفاف و للشرف يـا مذهلـه
سولفي كذا السوالـف تنسمـع و الا فـلا = وان بغيتيني اسولـف .. اسألينـي اسئلـه
اسأليني وابتديهـا .. بالنهـار اللـي تـلا = ليلة ان الجرح يقرا في الضلوع البسملـه
واسأليني عن زماني كم شرب فـيّ وكـلا = انتهي من مشكله والقـى وراهـا مشكلـه
المشاكل بهذلتني فـي غيابـك ... والبـلا = ما لقيت اللي احط السـر عنـده وازهلـه
كل مااسمع - كيف حالك - ينقبض جفني على = دمعةٍ تبغى تقول الحـال دمـع و مهزلـه
وابلع العبره واقول : بخير والهـم انجـلا = و آخر الهرج آتلعثم فيـه وانقـض أولـه
ليه غبتي .. ليه غبتي وانتي اللي ما مـلا = عيني الا همس صوتك في زمـان البلبلـه
ياااااه شفتي وين راح البال بالشعـر وسـلا ؟!! = قمت اعااتب فيك وانتي ف الضلوع مـدلـله
لـنّي ماصدّقـت نرجـع للقصايـد والغـلا = بعد ذاك اليوم يوم اجنبت وانتـي مشملـه
اييييه ماصدّقـت لكـن ياعسانـي مـا خـلا = اقلطي بين الحنايـا وافهقـي جمـر الولـه

صعب لامنّك فشلـت .. وصعـب لامنـك لقيـت = إن من يكره نجاحـك .. يـدري إنـك مانجحـت
أمس ضقت .. ورحت أقلّب ذكرياتي .. وأنتهيـت = عند صورة طفل صوته مثل صوتـي لاانجرحـت
وش مثـل لا والله إلا هـذا أنـا يـوم ابتـديـت = أنطق حـروف ٍ تلعثـم فـي لسانـي لا أنمدحـت
هذا انـا يـوم الحيـاه فنظرتـي عشريـن بيـت = ومسجدين .. ومدرسه من طين كم فيها اصطبحـت
هذا أنا وأصبحت اتمتم : " هذا انا " حتى بغيـت.... = أختنق .. بس القدر عيّا على موتي .. وطحـت
وصاح صوت الطفل فيني : " أنت من وين ارتميت" = قلت أنا المستقبل اللي فيـه كـم همـت وطمحـت
أمس كنت أبيك تكبـر .. بـس والله لـو دريـت = أني اللي عشت لأجلـه مـتّ عنـدك وأسترحـت
لو دريت إن الزمان يجرّ رجلـي .. مـا عديـت = ولو دريت إن البحور بـلا موانـي .. ماسبحـت
كان دربك لي طويـل .. وكـل ماشفتـك هويـت = قلت لك : كبوة جواد .. وما كبيـت إلا وجمحـت
ليـه تسمعنـي وتمشـي ؟! آه ليتـك مـا مشيـت = و آه ليتك مـن كثـر عثـرات الأيـام أنتصحـت
ضاعت احلامي .. وظلّ الحزن فيني .. وأهتديـت = للطريق اللي يودينـي علـى دمعـي .. ورحـت
يالحزن .. ليتك مثـل دمعـي وتنـزل لا رقيـت = بس أعرفك .. لو مسحت الدمع تبقى ما انمسحت !
كان حلمي .. في وجود إنسـان يبكـي لا بكيـت = وصار حلمي .. في وجود إنسان يفرح لا فرحـت
كنت أشوف الناس مثلي كل مـا جعـت وضميـت = مادريت إن الأوادم نـاس فـوق .. ونـاس تحـت
آه يـاأول ذكرياتـي خذنـي فحضنـك نسـيـت = لأسألك عن وجه ابوي اللي معـه يامـا سرحـت
خذني فحضنك أبغفـى .. يـاه مبطـي ماغفيـت = وإن لمحت دموع عيني .. سـو نفسـك مالمحـت
خذني فحضنك .. وبعثر في جروحي وإن قضيـت = هزّ لي كتفي .. وقل لي : عيب تبكي لو سمحـت
إضحك .. وعلّم زماني من أنا .. ومن وين جيـت = طقّ باب الحزن .. واصرخ فـيّ لامنـي فتحـت
و ضمّني يمّك .. وكمّل ضحكتـك لامـن بكيـت = ودي أذكر كيف كانت ضحكتـي لامـن فرحـت !

ياصاحبي جيتك أشكي لك من أحوالـي = جيت .. وما دامك رفيقي ليه اطولها؟!
العلم ومافيـه يـا أول وآخـر أمالـي = عندي رساله ولا أدري كيف أوصلهـا
للي سبتنـي وانـا مـن قبلهـا سالـي = أبيـك توقـف معـي وتـروح تسألهـا
وش فيها تفتـح علـي أبـواب عذالـي = وتحمّـل النفـس حاجـه مـا تحمّلهـا
وش فيها رغم الوفـا تتركنـي لحالـي = وأنا لجفاها تركـت الدنيـا ب أكملهـا
إن كان هذا زعـل .. علمّهـا يالغالـي = ماكان قصـدي ورب البيـت ازعلهـا
علمّها واللـي يخلـي قلبـك الخالـي = عن ضيقتي .. وين وصلت من تجاهلها
علمّها كم لـي وانـا ماشلـت جوالـي = كلـه علشـان مـا أقلّـب رسايلـهـا
وعلمها وشلون لا مـرت علـى بالـي = أروح وأضـم صورتـهـا واقبّلـهـا
وعلمها كيف أنشغل عن كثرة أشغالـي = وأسرح وأغمـض عيونـي واتخيلهـا
علمها عني .. وعن همي .. وغربالـي = علمها عن كـل حاجـه فـي تجهلهـا
وإن شفتها دنّقت .. تبكي علـى حالـي = إنسى الكلام .. وتذّكّـر كلمـه و قلهـا
قل : شاعرك يعتذر .. ويعاهدك تالي .. = إنـه يرتـب حساباتـه مـن أولـهـا
ويقول : حتى القصيد اللي على بالـي = والله مـا عـاد أكتبـه كانـه يزعلهـا

جا يشـوف الحـال كيفـه بعـد ماهـزه حنينـه = وقبل يسألني سألتـه : كيـف حالـك يالحبيـب ؟
قال : انا كنـي غريـب ضيـع دروب المدينـه = قلت : انا كنـي مدينـة تنتظـر رجعـة غريـب
قال : اجل وش فيك تكره سيرة الحـب وسنينـه = قلت : أجل وش لون ما اكره سيرته دامك تغيـب
انت لا من غبت حتى مرايتـك صـارت حزينـه = كيف ما تبغاني أحزن وانت لي حظ ونصيـب !؟
الهدايـا و الرسـايـل و المكاتـيـب الثميـنـه = والليالي و القمر و الريـح و الكـون الرحيـب
كل ما تبعد .. تجيـب الشعـر ليـه مـن يدينـه = و تقعد جروحـي تـودي فالطواريـق و تجيـب
يا بعـد كـل القصيـد و نـزوة حـداه و انينـه = لا ذكرتك لاح بيت .. و طاح ورد .. و فاح طيب
و ان نسيتك ما نساني صوتك المبحـوح لينـه.... = ياخذ لجرحي بثاره مـن خطايـاك و يطيـب
و بعد هذا جـاي ترمـي ذنبـك بوجـه المدينـه = مـا دريـت ان المدينـه كلهـا شمعـة غريـب

قبل اسافر كنت جالـس فـي زمـان الأنتظـار = ارتشف هم المكـان .. و كـل همـي حاجتيـن
كنت خايف من يباس .. و كنت خايف من خضار = كنت اخاف انك تجين و كنت خايف مـا تجيـن
لين شفتـك مـن ورا بيبـان صـالات المطـار = مقبله من كثر شوقك .. كنت اشوفـك تركضيـن
مرةٍٍ ركضـك يميـن و نظـرة عيونـك يسـار = و مرةٍٍ ركضك يسـار و نظـرة عيونـك يميـن
تايهة .. ما كنـك الا ضحكـةٍ وسـط انكسـار = ساكتـه .. ماكنـك الا دمعـةٍ فيـهـا حنـيـن
خايفة .. وجلة .. حزينة .. يعني كنتي بأختصار = تشرحين لكل جاهل معنـى كلمـة ( عاشقيـن )
بعدهـا جيتـك ولـدّت عينـك و دار الحـوار = من كفوفـي دمعتيـن و مـن كفوفـك دمعتيـن
كنت اصد و كنتي انتـي ثايـره مثـل الشـرار = ماعلى لتغة لسانك غير كلمة ( وين ؟ ويـن ؟ )
واذكر اني رحت قبل ابـدي لـك ايّـة اعتـذار = رحت حتى قبل اطيّـب خاطـرك فـي كلمتيـن
لكن انتي عارفتني زيـن واللـي صـار صـار = سامحينـي واذكرينـي قـدّ ماانتـي تقـدريـن
اذكريني لاانتهـت للشمـس رحلـه مـع نهـار = واذكرينـي لاصحـى للصبـح ورد الياسمـيـن
واذكريني لا لمحتـي فـي ليالـي البـرد نـار = واذكريني لا سمعتي للمطـر صـوت ٍ حزيـن
اذكرينـي واذكرينـي واذكرينـي .. بأختصـار..= اذكري فهد المساعـد قـدّ ماانتـي تقدريـن !

مرّني طيفك .. وطيفـك صاحبـي مـدري عـدوّي = جايبٍ صوتك .. وصوتك سكـة الذكـرى الحزينـة
قال أنا جوّي تكـدّر .. قلـت : ماهـو كثـر جـوّي = قال فرقانـا غبينـة .. قلـت : وأكثـر مـن غبينـة
قال : أنا ب أموت من غيبتك قل لي ويـش أسـوّي؟ = قلت : أنا أبغى الموت في غيبتك .. قل لي بس وينه؟!
قبل ترحل .. كنـت أقـول بيسـرح أيـام ويضـوّي = مثـل ماعودنـي اليـا اشتقـت لـه جابـه حنيـنـه
بـس هالمـرة ثمـان شهـور وضلوعـي تــدوّي = كل يوم أشتاق لـك .. يلعـن أبـو الشـوق وسنينـه
كـل ماعشمـت قلبـي .. قـال ياضلوعـي تقـوّي = ورحـت أنـا ويـاه نرقـب رجعـة اللـي فاقدينـه
نوب أقـول اليـا رجـع بكـون فـي قمـة هـدوّي = ونـوب أقـول الا أبزعـل وأتلـى مابينـي وبينـه
كل يوم أجلس على جـال البحـر وأقـول تـوّي ....= لاسألني : مافقدت الحلـم فـي لمسـة يدينـه ؟!
مادريـت أن البحـر ماقـال لأمواجـه تــروّي ! = و مادريت أن الغـرق هـو حجّـة غيـاب السفينـة
مادريت .. أو مابغيت أدري .. ولاأدري وش بسـوّي = لو رجعت .. وشفت طيفك فـي الممـرات الحزينـة
وين ابنسى وانت طيفـك صاحبـي مـدري عـدوي = مارضى يترك لغيـره شبـر واحـد فـي المدينـة!

مـا كـل ضحكـه تهـزّ القلـب يشبعهـا = ومـا كـل دمعـه تمـرّ العـيـن تبكيـهـا
من شاف ضحكة زمانـي قـال : "بايعهـا" = ما يـدري انـي فقيـرٍ مـا اقـدر اشريهـا
يـا اللـي نثرتـي سنيـنٍ كنـت اجمّعهـا = تكفيـن هـذي حـصـاد العـمـر لمّيـهـا
كـم كنـت اهـدّد بـك الدنيـا والوّعـهـا = كـل مـا اذكرتني..واذكّـرهـا وانسّيـهـا
بيدينـك اللـي احـس وكــن اصابعـهـا = تقول : "بـدري علـى الضيقـه وطاريهـا"
بعيونـك اللـي اناديـهـا وانــا معـهـا = اللّـه يـاكـم زعلـتـي يــوم اناديـهـا
كنتـي تحسبينـي اسـرح عـن مدامعـهـا = وانـا مـا غيـر اتهجّـى رحلتـي فيـهـا
اي واللّـه اذكـر عيونـك يـوم اطالعـهـا = اقــرا بـهـا انـشـودةٍ كـنّـا نغنيـهـا
كانـت تـروح وتهـجّ الـبـال واتبعـهـا = تاخـذ عيونـي مـن الـحـزن وتودّيـهـا
لايـام كنـت ارمـي بدنيـاي واجدعـهـا = أيـام مـا كنـت اكحّلهـا.. ولا اعميـهـا
طفـلٍ سلاحـه دموعـه يـوم يزرعـهـا = مـن فـوق خـدّه وكـفّ ابـوه يرضيهـا
اكبـر همومـه مــن دروسٍ يراجعـهـا = واقصـى طموحـه متـى ينجـح ويرميهـا
طفـلٍ وكـل امنيـاتـه كــان مطمعـهـا = يكبـر وتكبـر هنـوفٍ كــان يرجيـهـا
كبَرْت..ولا كبْرَت.. وضعت..وخفت اضيّعها = خلّيـت همّـي رضاهـا يــوم اداريـهـا
كـل مـا طعنّـي زمانـي رحـت ادلّعهـا = يوم الزمـن مـا تـرك لـي غيـر اياديهـا
ما كنت افكّـر تجـي فـي يـوم واسمعهـا = تقلـب حياتـي مـن اعـلاهـا لواطيـهـا
حتـى اقبلـت تبكـي الدمعـه وتردعـهـا = ثـم قالت..وكـن موتـي بيـن اشافيـهـا:
"جيتـك أحلّـف عيونـك قـبـل اودّعـهـا = مـا اشـوف دمعـة عتبهـا ليـن اخلّيهـا"
تبغـى تــروح وتخليـنـي واطاوعـهـا = تبغاني اسكـت واقـول : "اللّـه يهْديهـا!!"
يــا أول احــلام روحٍ كــان دافعـهـا = انـك سنـدهـا وحاضـرهـا وماضيـهـا
يا سنينـي اللـي قضيـت العمـر اجمّعهـا = يـا ذكريـاتـي مــن اولـهـا لتاليـهـا
لا تتركيـنـي اعـيـش العـمـر بايعـهـا = ضحكة زماني بدونـك مـا اقـدر اشريهـا

يصوّت حبيبي وقبـل أقـول ياعونـك = شكى جروحه ورحت أشكي له طعوني
يقول مقدر أعيش اليـوم مـن دونـك = وأقول حتى ولو ماعشت مـن دونـي
يمكن أنا اكون أعز إنسان ف عيونـك = بس انت والله كل النـاس ف عيونـي
لا صرت ربعي وداري فيّـة جفونـك = وش دخّل الناس خل النـاس يجفونـي
يكفيني إن انت لا من قلـت وشلونـك = تطيب كل الجـروح ويختلـف لونـي
وإن كان منتب مصدقني علـى هونـك = تعال وطالـع دروبـي ويـن ودونـي
أصبحت أجامل عداي اللـي يحبونـك = وأكره مشاهد عـداك اللـي يحبونـي
ومن كثر ما احب واكره عنك واصونك = أصبحت دفتر مشاعر وأنت مضمونـي
إن غبت عني شعـرت بلـذة طعونـك = وإن شفت زولك شعرت بقيمه عيونـي