يابوعلي اركب الجكس آر//ابراهيم المحسن

يابو علي اركب الجكس آر

يابو علي اركب الجكس آر= قوه إنتصيد على السيفي

خل القصيم إتجه لديار= اهل البحر والمجاديفي

نبي من اللي يجن احدار= هن مرخصات المصاريفي

يازين تنكيسهن إطيار= إيلا عرضن لك مصافيفي

وقل لبو محمد عزيز الجار= مدهال كل المعاريفي

امراحنا بايمن المشجار= اللي يسار المشاريفي

إيلا وصلته إفشب النار= وحط الدلال المهاديفي

يلفيك ربعن من الاخيار= يجون من دون توصيفي

ناخذ ونعطي من الاخبار= معهم نشيل التكاليفي

وهات القميري مع الصفار= يـِشْون على النار للضيفي

مع شاهين لا شربته حار= خادر على غاية الكيفي

ونثريتن قدرها لا فار= يوخذ من الدهن تخفيفي

مع القمر نطفي الانوار= حتى تزين السواليفي

وابريل كله لنصف ايَّار= مع القميري مواليفي

واتلاهن اللي يجن اكبار= وطيارهن به تغاريفي

كلش ولا قعدتن بالدار= والناس صيدن وتنتيفي

يابو علي اركب الجكس آر= قوه إنتصيد على السيفي