شفت لي خكري ملزز/ابراهيم المحسن

الخكري
شفت لي خكري ملزز بين الاسواق إيتلزز= الجسم كبر الجموسه والعقل عقل الصغير
حالتن له يالمعافا لو تشوفه له تعزز= غير لبسه للذهب لابسن ثوب الحرير
إن وقف قام إيتلفت ون مشا قام إيتهزز= حاشرن روحه بثوبه به من الحرمه كثير
مرتبك خايف وقلبه لا سمع صوتن يفزز= صابغن مكياج بنت وحط له عطر يثير
مايعن حتى كلامه وكل حرمه به يخزز= يحسبه قيس الملوح او مثل سالم الزير
إيتلفز ويتتكز ويتركز ويترزز= واقفن يرمي شبك يحتري صيدن وفير
لين جت له بنت ابوها وحدتن اصله معزز= وصرخت في وجهه الكالح وقالت ياحقير
ضف وجهك واطلع الشارع وبالدخان مزز= لاتلوث جونا الصافي بدخانن خطير
لو تجي راكب شبح او اشوفك فوق لكزز= ماتساوي عندنا ملي اذانك لو شعير