::|[ ديوان مرثيات الملك فهد بن عبد العزيز آل سعود رحمه الله ]|::

مرحوم يافهد العرب رمز الاسـلام = مرحوم ياكاسر عصى جيش صدام
يامن وفـا بالوعـد للشيـخ جابـر = وعاد الكويت وطاح صـدام ماقـام
مرحـوم ياللـي عزّهـا ماظلمهـا = بالعـدل والإحسـان دراه حكمهـا
ياخـادم البيتيـن بانـي حرمـهـا = ياللي بكته الناس وارضه والايـام
مرحوم ياحاتـم وفـارس زمانـه = يامن أعز السيـف والمـال اهانـه
ربي عطاه مـن المهابـه مكانـه = في حضرته تصير عدوانه اقـزام
مرحـوم ياللـي مايغـرّه منافـق = ولايثيره بالغضب صـوت طافـق
بالناس له نظـره وعقـلٍ وخافـق = ماهوب عجلٍ لكن ان قـام عـزّام
مرحوم ياملجـم جمـوح المعـادي = اللـي يثيـر الفتنـه بكـل نـادي
ينثر سمومه بالحضـر والبـوادي = حتى عدل راسه على الحق صمصام
مرحوم يارعـي الوفـا والحميـه = ياكاسب الطولات جـزل العطيـه
ياللـي اذا نهّـض عزومـه قويـه = دايـم وشوفاتـه بعيـده وقــدام
مرحـوم ياثالـث سهـوم المنايـا = عقبـان جـوٍ ماخلطهـم حـدايـا
تشيلـهـم هاماتـنـا والحنـايـا = عبـدالله وسلطـان دام السعـد دام

يا راحلٍ عنا ومازلت موجود = والله ما تسفي أثرك السوافي
لو ما فقدنا قبلك أعمام وجدود = قلنا جرحنا البعد يا شيخ كافي
أنا حزين الروح والطرف مسهود = لا عارفٍ سقمي ولاني متعافي
يا لله يا محيي ورق يابس العود = ويعالمٍ ما كان في النفس خافي
تجبر عزانا في فهد منهل الجود = أبو الجميع اللي له الشعب وافي
العاهل اللي له على الشاهق بنود = واللي عمر وديانها والفيافي
لا ثارت الأحداث وقف كما الطود = وتصير بأمر اللي كتبها عوافي
لو القوافي دمع واوراقي خدود = ما كان جفت في رثاه القوافي
ولو الليالي البيض ما تعقب السود = ما كان لجروح الملمات شافي
لي ديرةٍ في البذل ما تعرف حدود = دار عليها المجد راحل ولافي

الدمع لو ينزف علـى الخـد معـذور= لو ما يجـف المـوق طـول الليالـي
عليك يا ناقـل عنـا الهـم والجـور= عن يعرب الاسلام فـي كـل حالـي
حتى ولو يغرق بهـا زامـي الطـور= علـى فهـد ذرف المدامـع حلالـي
تكسرت عبرات الاحـزان بصـدور= خلق الله المسلـم جنـوب وشمالـي
فهد منـار الفضـل والعـز والنـور= رافع لواء الاسلام مـن فـوق عالـي
خادم بيوت الله على الديـن مفطـور= حقـق محـالٍ كايـدٍ مـا يحـالـي
الله يبيحـه عـد مـا تزهـر زهـور= فيـاضٍ سقاهـا مدلـهـم الخيـالـي
قبله سياسـات العـرب كلهـا بـور=واحيـا بـه الله هاشـمٍ كـان بالـي
ان جت شجاعه فابيض الوجه مسطور=له موقـفٍ مـا بيـن مـرٍ وحالـي
مرٍ على اللي يخلف الشرع ممـرور=حتـى ولـو أنـه قريـبٍ مـوالـي
له في مقامـات الغـلا دار وقصـور=وما يسكن قصور الغلا غيـر غالـي
مجد السياسة عقبـه اليـوم مخطـور=لولا الرجا قايـم بـروس الرجالـي

يالله يامنـزل تـبـارك والأحــزاب = والكهف والاسراء والزخرف وهـود
يالغافـر الرحمـن يـارب الأربـاب = ما غيـرك بهالكـون خالـق ومعبـود
ياللي جعلت لكل أجل عنـدك كتـاب = ياجامـع الثقليـن فـي يـوم موعـود
أجبر عزانا فـي ابونـا الـذي غـاب = فهد مليك قلوبنـا فـي ثـرى العـود
أستغفـرك يـارب لا زلـت مرتـاب = وأقـول علّـه غايـب أيـام ويعـود
قدّرت ياربـي ومـن اّمـن انصـاب = وهول المصيبة كل مالـه بنـا يـزود
أقفل علينـا الحـزن بـابٍ ورا بـاب = وللصبـر والسلـوان درب ومسـدود
راح الحبيب وقطّـع قلـوب أحبـاب = راح الذي به حالنـا سهـود ومهـود
راح الذّي قـد ضـم داره بالأهـداب = وقطف لها من كـل خيـرات عنقـود
راح الذّي ياما عتق واخضـع رقـاب = راح الذّي ظلّه علـى النـاس ممـدود
راح العظيم العبقـري تـاج الألبـاب = راح الشجاع الصادق الشامخ الطـود
راح الذي مجده بقى وذكـره انسـاب = عطر زكـي سرمـدي دوم موجـود
راح الذي يشهد له اعـداء وأصحـاب = بالعـزم والاقـدام والعقـل والجـود
راح الذي لامن غضب ..الكفر تـاب = ولا من رضى حتى الجدب ينبت ورود
راح الـذي غيثـه عميـم وصـبّـاب = لا من عطى أغنى وخـلاك محسـود
كلٍ بحبّـه قـد لقـى غيـر أسبـاب = مـا للسجايـا فيـه آفـاق وحــدود
يارب إجزه عـد مـا أنفـق وجـاب = من خير للإسلام عـن كـل مجهـود
وعداد ما وزّع من المصحـف كتـاب = وعداد ما بيتك حـوى ركّـع سجـود
يارب إجـزه جنتـك دونمـا حسـاب = وانجه من الأهوال في يـوم مشهـود

أعزِّي الأمة واعزِّي الملايين = من قبل اعزِّي مقلتي في نظرها
إمامنا شيخ الرجال الميامين = أبو الجزيرة برها مع بحرها
باني بيوت الله وخدام للدين = معزةٍ خذها بأجمل صورها
رفع بلاده في جميع الميادين = وضم شعبه بدوها مع حضرها
ليِّن مع الليِّن وشينٍ على الشَّيْن = ولا شاف له شوكه بحزمه كسرها
فهد فهدنا كل ما قام به زين = فهد سعدنا في يسرها وعسرها
يا الله مكانه في جنان وبساتين = جنان خلدٍ يغتسل من نهرها

لو الحـزن بحرٍ تلاطـم نحاياه= مده وجـزره فـاق مـد المحيطات
قالو على فهد العـروبه صفا ماه = أمطـر سحاب الحـزن همٍ وعبرات
الهم واهج شمس الاحزان تصلاه = ومدامـع عـيون الخـلايق غزيرات
ولو البـكا قـد رجـّع اللي فقدناه = هـلت مـدامـعـنا على كل الاوقات
نبـكي على راسٍ عـزيزٍ دفـنّاه = وعليه حطـو باللـحـد سبـع لبنات
من يـوم ودّع يـوم الاثنين دنياه = ودمـوعـنا تذرف على الخد زافات
أخلص بحكـمه في محـبة رعاياه = وحبـوه حـبٍ صـادقٍ بالقـناعات
ولو شفت كل الناس بالشـعر ترثاه = بقلوبـهم فهـد العـرب حي ما مات
صان العهود وصان بالـدين مبداه = وناضل جموع أهل البدع والشعارات
على هـدى رب الخـلايق وتقواه = وسـّع بيوت الله لخـمس الصـلوات
داعي سـلامٍ روح الاسـلام معناه = شـيـّد مساجـد بالديـار البعيـدات
أعزي الشعـب السعـودي بفرقاه = وأعـزي آل سـعـود فرد وجماعات
واشـباله اللي قـاضبينٍ سـجاياه = أعـزي اخـواني من القـلب بالـذات
والله يـونس وحـشته عنـد مولاه = حكـمـه شـمل شعبه بفضل ومبرات

مرات تصدق علوم ليت ماتصدق = واشين جميع العلوم الموت والفرقى
لامات ابوك الذي بمحبته يفرق = تشوف حتى السماء سوداء وهي زرقاء
الليله الدمع لحروف الحبريسبق = واورقنا من دموع عيوننا غرقى
سحاب حزن مزونه للصدر تحرق = يامر هالمزن والرعاد والبرقا
ياثوبي اغرق بدمع من غلاه اغرق = راح الذي من خلقه الله وهويرقى
راح اللي عداه من قوله فهد تشرق = محرق قلوب الأعادي كلها حرقى
له صورة بالبياض تزود ماتعبق =حتى وهو فالقبرفي هيبته فرقا
رما عنان الفرس والسيف والبندق = وودع عروس الديار الشيخه الطرقى
الي ربت بين كفينه وهو يفتق = صدر الدجاء لين شاف شموسها شرقى
والله هو اللي يميت ويحي ويخلق = والعين تدمع نهار الموت والفرقى

عابس وجه الجزيرة .. عابس وجـه الوطـن = والقوافي لو تبـي توصـف وجعنـا ماتطيـق
راح تاج الدار وإستولى علـى الكـل الحـزن = وتاهت خطانا من العبـرات وإحتـار الطريـق
غاب أبو فيصل .. و .. فيصل غاب وإعتلّ البدن = من عذاباتي وحزني والأسى ياكيـف أفيـق؟
انتهى حرفـي ولا أدري وش أسطـر يازمـن = الرحيل أدمى الخفوق وزاد ضيق الصدر ضيـق
عاهـل تبكيـك عيـنٍ دمعهـا حـرّق وجـن = من رحلت وكل شـئ يشهـد بـإرث عريـق
بأرضنا تشهد رمال وبالسمـاء تشهـد مـزن = وبالملا تشهد نفوس وبالغـلا يشهـد صديـق
كنت كف الجود تعطي بذا الوجود بـدون مـنّ = وكنت من يضوي شموع السلم ، ويلم الحريـق
سيرتك تاريخ عـز وكنـز أبـد مالـه ثمـن = زاخـر بالمكرمـات وبالمعانـي والرحـيـق
الـوداع .. ولا وداع ولا يـواريـه الكـفـن = مجدك اللـي شادتـه يمنـاك يالحـر الطليـق
يرحمه ربي عـدد مامـر ليـل ومـا سكـن = العظيم اللـي ضـوا أرواحنـا نـور وبريـق
وياعساه بجنة الفردوس فـي روضـة عـدن = في ظـلال العـرش دوم والنعـم بالله رفيـق

الحب له وقفه وللحزن وقفات = والذكر والإيمان دايم يصده
واللي فقدناه امس بدموع وآهات = شده وربي يذكر بكل شده
راح الزعيم وغابت الشمس بسكات = والحزن الأسود واصل كل حده
اللي رفع بالمجد والعز رايات = ليت الدموع اللي بكينا ترده
تبكي عليه المرجله والمروات = بينه وبين الطيب عشق وموده
فالضيق له وقفه وكلمه وفزعات = وفالعز كف الخير دايم يمده
شيخ المراجل والفعل والمهمات = الطيب له عاده والأمجاد قده
لا قال كلمه يختصر له مسافات = فعله ترى التاريخ يتعب يعده
وبعض المواقف فوق كل العبارات = مهما نقول القول ينباح سده
فهد غيابه ما يوصّف بكلمات = شده وربي يذكر بكل شده