ياموتري يوم اجيبك بالدنانيري//ابراهيم المحسن

ياموتري

ياموتري يوم اجيبك بالدنانيري= ماهمني سعر صرف الين والليره

ياموتري ماشريتك للغناديري= وإلا اتدوَّج بوسط السوق والديره

مابيك بالتايد تغسل ولا الفيري= ولا ينعمل فيك تظليله وتغبيره

ابيك يوم انتوي بعض المشاويري= اللي به العارف يضيِّع تدابيره

تاطا إدروبن تجنبها الصقاقيري= يبعد عنه كل صقارن يبي طيره

وترقى جبالن يهابه حايم الطيري= تحته مزونن بروقه تشعل النيره

تنزل قعور النفود بكل تدبيري= تطلع بحملك وعزمك مافتر قيره

آطا بك الكايده ماني مثل غيري= ولا شي ياقف بوجهك يالله الخيره

شاصن يصخر عفاش الارض تصخيري= مع النبا والوطا مايختلف سيره

يسهي مع القاع وإلا بالعثاميري= كثر البطانيج ماترخي مساميره

يمشي على النيه ويدري بتفكيري= كل الاوامر تنفذ في حذافيره

مكمل الوصف في كل التقاريري= ينقل بدرجه من اليابان تقريره

المدح يستاهله وآسف لتقصيري= هو الذي يستحق المدح ماغيره