::|[ ديوان /عبدالله العليوي/رحمه الله ]|::

منـك انهتينـا يـا مخيـب رجانـا
=الصبر طـال وعذبتنـا المشاويـر
في موت حبـك يجبـر الله عزانـا
=بيـدك رميتـه لا تقـول المقاديـر
لـولاك حنـا ماتـبـدل غـلانـا
=كـل الوفـا منـا ولا منـك تقديـر
قلنا سحابـه صيـف تعبـر سمانـا
=وتزول ماله في سما الحـب تأثيـر
غدرك على نسيـان حبـك حدانـا
=هذي سواتـك مـا تفيـد المعاذيـر
عفنـاك واللـي عالـم فـي خفانـا
=البعد عنك ارحم وقلبك مـع الغيـر
تبيعنـا واليـوم تبـكـي هـوانـا
=لايا عديم القلب فرقـاك لـي خيـر

ياللي نسيت الحـب مثلـك نسينـاه
=جرحي يهون و لا مذلـة خضوعـي
قصرك بقلبي طـاح ونهـد مبنـاه
=لاتنتظـر منـي لحبـك رجوعـي
من عافنا ننسـى غرامـه وذكـراه
=لا واحسايف فـي غيابـك دموعـي
الغدر فـي نظراتـك اليـوم شفنـاه
=اليـوم نظراتـك لقلبـي تروعـي
مليت حب ضاع عمـري برجـواه
=وهديت من زود الغرابيـل روعـي
يا من قطع حبل الرجـاوي بيمنـاه
=من دمعتك اشعلت طافـي شموعـي

شفتك مع اللي صار عقبي حبيبـك
=واحتارت العبره بعينـي وصديـت
مدري هي الصدفه لدربـي تجيبـك
=مدري انا اللي في دروبك تحريـت
ملكتنـي واقفيـت ربـي حسيبـك
=ما تعرف الرحمـه بقلـب توليـت
يا قلب جرحك سبته مـن طبيبـك
=يا قلب ليتك بالوفاء ما تمـا ديـت
من حبنـا كـل السعـاده نصيبـك
=يا فاقـد الاحسـاس عنـي تخليـت
وش فايده لا قلـت عنـي حبيبـك
=وانت بحياتك يـوم ماظـن حبيـت

مابي حياتي لا خلت منـك تنعـاف
=وش الليالي لاخلـت مـن قمرهـا
جرحتني واليوم مـا عـاد تنشـاف
=عينـي تمنـى شوفتـك يانظرهـا
ياصاحبي قلبي على جـال ميهـاف
=الـروح يالغالـي تزايـد خطرهـا
ماترحم اللي للشقا صـار ميـلاف
=لك فرحـة الدنيـا وحنـا كدرهـا
تبكي عليك الدار يازين الاوصـاف
=ليـت النهايـه مـا تبيـن خبرهـا
ايام قربك يالغضي مابـي خـلاف
=راحـت ليالـي حبنـا ياقمـرهـا

لولا غيابك ياهوى النفس ما ضـاق
=صدري ولا بانت بنظراتي الشـوق
لي قلب مثلك واسهر الليل واشتـاق
=غيرك فـلا والله تمنيـت مخلـوق
بيني وبينك خطوة الرجـل تنعـاق
=حسبي على اللي صار من بيننا عوق
اجرح وقلبي لك على الطول منساق
=رمشك ملكني وساقني للهوى سـوق
كمّل جمالك والي العـرش بأخـلاق
=حتى الجروح اللي تجي منك له ذوق
كيف انتهت ذيك المشاوير با فـراق
=العام الاول كا نت احلامنـا فـوق

خـلاص لاترجـع ترانـا سلينـا
=ما كنت اصدق يوم انـي ابنسـاك
فـي بعدكـم يامـا عليكـم بكينـا
=واليوم ما تطري على البال طرياك
وانا ادري انك رغم صـدك تبينـا
=لاشك ناس ضدنا تقصـر اخطـاك
خـل الـذي غيـر حنانـك علينـا
=يعطيك من قلبه ربع مـا عطينـاك
وشعـاد لا صـار السـلام بيدينـا
=قلبي وقلبـك بينهـا درات افـلاك
ودعت مـا ضـي حبنـا وانتهينـا
=وقلب نسيتـه يـوم لابـد ينسـاك
من سكرة الحب الصناعي صحينـا
=حتى المجالس عفتها خوف ذكـراك
حـب جديـد غيـر حبـك لقينـا
=حديتنـي جعـل الليالـي تـحـداك

انا تقبلت العـزاء بـك مـن العـام
=كن العزاءفي مـوت حبـك تهانـي
ياما سهرت الليل لا غبت مـا انـام
=ترقد وانا ازرع في رجاك الامانـي
واثر السعاده في رجاء حبك اوهـام
=لاطاب جرح صابني منـك ثانـي
جارت على قلبي شقا ذيـك الايـام
=اشكيك للـي فـي غـلاك ابتلانـي
سهرت على عيـون ماظـن تنـلام
=ذاك امس والا اليوم ماجاء كفانـي
افـرح بطيشـك والغرابيـل قـدام
=ياطاك من وقتك مثل مـا وطانـي

ماجيت حب لك ولا نيـب راجيـك
=ماجيت يمك في رجاء مـد يمنـاك
جيتك مثل غيري بنفسـك اعزيـك
=مالك وجود اليـوم مـت ودفنـاك
شربت منك المر واكتـم واداريـك
=حتى عدوي مـا يسـوي سوايـاك
الشاهد الله ما خبر جبـت طاريـك
=وان جالك الطاري بخيـر ذكرنـاك
عين بكت لك ما تلـد النظـر فيـك
=غصب ٍ علينا من سوايـاك عفنـاك
عواذلي قامـت تبيعـك وتشريـك
=ارجوك تبعد عيدنـا يـوم فرقـاك

طبعك تحب بكـل جـرح التمـادي
=توي دريت امسح دمـوع التماسيـح
اول جروحك زارني قلـت عـادي
=سحابة هلـت وزلـت مـع الريـح
تذلني بالحـب ويـن انـت غـادي
=عند المذله نرفـع الـراس ونشيـح
ليت الزمن بينـي وبينـك حيـادي
=حتى الزمن وياك والله مـا اطيـح
يمـوت حـب ولاتمـوت المبـادي
=ابختنق في عبرتي بس مـا اصيـح
مع اللبـن حنـا شربنـا العنـادي
=ياليت تبعد كـان ترتـاح وتريـح