يالله إنك تــرد عبدالله لحضـن أمه !!!

ما انساك لو تسبح بالأنهار هالطير = ولو طارت الأسماك وأقفى بحرها
ولو أعلنو إسلام شارون وبلير = والا نست بنت الحمايل أثرها
غالي ولك بالقلب حبٍّ وتقدير = مكانتك بالقلب محـدٍ خبرها
أبكي بليلـي والنهار بتفاكير = وآخذ من الأحزان واشرب كدرها
وانشد عن الاخبار سرب العصافير = يا كود الاقي طيف يلمح شجرها
يفز قلبي عند ( ماما ) بتبشير = وافرح عسى ( عبدالله ) اللي ذكرها
ويغم قلبي وأحس فيه تكسير = لا شفت لي أمٍّ تراعي زهرها
وأنا وجِنيني أخلفتنا المسايير = عِـدة ليالي أو تكمِّل شهرها
من عقب ماهوبالحضن كنّه أمير = أقفت به الدنيا وحفـَّت خطرها
عزِّي لقلبٍٍ ذاق هم المشاوير = من بعد فرقى دنيتي مع قمرها
يارب يا اللي حكمتك بالتقادير = ترحم حياتي من سعاير جمرها
ويالله يا اللي عالمٍ كل تقصير = تلطف بحالي يوم قلبي خسرها
وترد لي وداعتي دون تغيير = وتحيي رياضي من سحايب مطرها
ويالله ترضيني بما صار ويصير = ومصيبتي يارب اقصر سفرها
وصلاة ربي عِدّ ما خِط تقرير = على النبي داوى القلوب وعمرها