::|[ ديوان الشاعـــر/ فهد المفرج ]|::

صباح الاثنين كل الناس مذعوره = علم لفى كدر القاصي مع الداني
قالوا وطنكم توفى اللي حمى سوره = العاهل اليعربي يالقايد الباني
موكدين الخبر بالصوت والصورة = والله فلاأدري عقب ذا العلم وش جاني
هلت دموع العيون وقلت معذوره = حاولت أكف العباير مير ماأمداني
نبكي وكل العرب يبكون اخو نوره = يبكون عز الديار ونور الأوطاني
من عاليات الحجاز لرأس تنوره = ومن صوب حد اليمن لحدود عماني
وتبكيه مكه وبيت الله وحضوره = والكعبة اللي كساها بأغلى الأثماني
ويبكيه مسجد رسول الله وجسوره = له بصمةٍ باقية مع طول الأزماني
والأسرة المالكة والشعب وقصوره = يبكون فرقا ملكهم سر واعلاني
جونا ملوك الدول من كل معموره = من جاه علم ابوفيصل جاء لنا عالي
كلٍ يعزي نوادر نجد وصقوره = في شيخنا اللي توفى ذرب الأيماني
محدٍ لعب دور في الدنيا مثل دوره = أنا أشهد انه فريد النوع وحداني
له فزعةٍ مع كويت الخير مشهوره = وله وقفةٍ يحترمها كل لبناني
مواقف الفهد تحسب له ومشكوره = ومساهمات الفهد في كل ميداني
شيخٍ مدون له التاريخ في سطوره = سيرة بطل للشرف والمجد عنواني
زعيمنا معجزة .. لاوالله اسطوره = لو جيت أعدد فعوله يعجز لساني
قالوا توفى فهدنا واختفى نوره = قلنا ليا غاب نجمٍ يطلع الثاني
يبقى فهد في قلوب الشعب وجذوره = تروي بغيث الكرامة كل ضمياني
والحمدلله راضين بمقدوره = وحنا عوضنا بعبدالله وسلطاني
وأخوان عبدالله اللي شورهم شوره = نحبهم كلهم من دون نقصاني
وعسى السحايب بنو الخير ممطوره = تمطر على قبرٍ شيخٍ شد الأضعاني
تسقي ثرى العود وتديم على قبوره = آمين ياربنا خلاق الأكواني

الله يعز البلد في ظل عبدالله = سادس ملوك الوطن شيخ السعوديه
قالوا توفى فهدنا قلت لاوالله = مامات شيخٍ له اخوانٍ شقرديه
اليوم في عهد ابومتعب تحت ظله = يمشي على سيرة أسلافه بجديه
يقول شعبي مثل عيني وأبفطن له = لله درك ملك ياطيب النيه
مجبول فيك التواضع وأصبح جبله = تحظى بتقدير من شعبك وشعبيه
زعيمنا يرتكي للحمل ويشله = زعيمنا للعدو مافيه ماويه
زعيمنا جعل رب البيت يمهل له = ريف الرمل واليتامى والجلاويه
ماهو غريب السياسة فيك مندله = من روس حكام ورجال سياسيه
أهل المواجيب وأهل السيف والدله = وأهل الشجاعة ليا من كبرت الهيه
أهلك خيالة التوحيد والمله = حرابة الشرك بآياتٍ سماويه
يوم القبور عبدوها والفتن عله = جدك عدلها عقب ماهيب ملويه
وابوك عبدالعزيز الدين شرعٍ له = ماجابن البيض لامثله ولازيه
لاحل طاريه يرتد الحكي كله = ماعاد للسالفة روحه ولاجيه
معزي اللي يعقد الحبل ويحله = معشي الذيب زيزوم الرياديه
يالله عسى الجنه الخضراء مقرٍ له = آمين ياربنا ياغافر السيه
ماشفت حاكم حكيم مثل عبدالله = ولاشفت شعبٍ مثل شعب السعوديه

مضى عامٍ على البيعة ومازلنا على المعهود = على المعهود من عهد الولاء والسمع والطاعة
الا ياعيال ابوتركي ترانا مانسينا العود = وحنا للذمم وعهودنا مناب بياعه
توارثنا محبتكم من الجدان ورث جدود = وحنا مانبي الا أنتم محبة قلب وولاعة
غلاكم من غلا عبدالعزيز ابو الكرم والجود = جمعنا عقب فرقتنا وربعنا بمرباعه
جته بالسيف الأحدب والتعب والجهد والمجهود = الين أضفى عليها سترة التوحيد وشراعه
وعقبه واصل المشوار راعي المكرمات سعود = سعود سعود راعي الجود عون العود وذراعه
وجاء للحكم فيصلنا وفيصل موقفه مشهود = شهيد الدار يبكونه رجال الدين وأتباعه
ومن بعده حكم خالد وخالد له بقاء وخلود = وفي عهده شملنا الخير بأشكاله وبأنواعه
وحكمها بعد ابو بندر فهد والفهد نسل فهود = عليه الشعب يبكي من شهر ستة لذا الساعة
وحنا اليوم في حكم الإمام العادل المحمود = قوي الباس ابومتعب قرين الخير من باعه
حبيب الشعب ابومتعب وحنا له سند وجنود = زعيمٍ حافظٍ دينه وشعبه حسن أوضاعه
نحبه حب مايوصف نحبه حب دون حدود = نحب اخوان عبدالله ليوث الدار وسباعه
الا ياكثر ماقلنا وقلنا نطلب المعبود = ألا يالله طول عمر ابومتعب على الطاعة

ياريوف ياعلك بحالي تروفين = لاقل شوفي وانحنت بي عصايه
يمين من نزل تبارك وياسين = انك قمر عمري وكوكب فضايه
أدراك بالخاطر وأعاملك باللين = وأرجي عسى الله مايخيب رجايه
أحب من حبك وأعادي المعادين = وأدعي لك الله بالستر والهدايه
فقدتك البارح وجريت صوتين = هذي وهي ليلة وعند نسبايه
كله غلا ياويلي اثر الغلا شين = الله واساله لايبين غلايه
من حبها حبيت كل الصغيرين = صارت محبتهم بقلبي هوايه
عودتك الممشى علشان تمشين = أشد بالثنتين وأقصر خطايه
واليا بكيتي قمت أهلل وتصغين = وأحيان أغني لك وأردد غنايه
يضيق صدري لاسمعتك تونين = وأجر صوتي من خلايب خلايه
وان جيت أبسهي عنك لديت بالعين = الدرب قدامي وأطالع ورايه
رد الوفا ياريوف مابيه هالحين = أبيه لادارت عليه رحايه
أبيه لامن صارت العشر ثنتين = اليا تركوني عزوتي واقربايه
وأبيه لامنه غدى الليل ليلين = لااشتدت الأيام وأظلم سمايه
وأبيه لا عزوك فيه المعزين = تدعين رب البيت يغفر خطايه
اليا كتب ربي فراق المحبين = ثم دفنوني لابتي وأصدقايه
توك صغيرة سن منتيب تدرين = والعالم الله وش تكون النهايه
اما التفتي لي وزين على زين = والا رميتيني بدار الرعايه

البارحه ساهرٍ ماغمضت عينــي = وشـلون ابرقد وانا عـيني شقـــاويه
اليا تذكـرت بـنتـي فرحـة سنينـي = هلت دموعي على الخدين جـــبريه
بين الدكاتر تصوت لي وتدعيني = لبيــه ياقلب ابوك اللي طفى ضــيه
شالوا ذهبها على زين الفساتيـني = والثوب الازرق عليها صـار ماريه
تلد عين الحزن وتقول وش فيني = بابا حبيبي تكلم قــول وش فيـه
صديت عنها وانا اللي في كافيني = في ذمتي يارهف ماهوب في يديـــه
خليتها عندهم واقفيت من حينــي = ومن ضيقة الصدر جريت الهجينيه
العين تبكي وهوجاسي مخاويـني = ومن لامني في رهف مافيه ماويــه
والله مااخلـيك دام الله مخليني = ياشمعة الدار يانور العـزيزيه
ومادبر الواحد المعبود مرضيني = رضيت في دبرتك ياعالــــم النـــيه

سلام الله سلام الله سلام الله على البانين = بـنوا مجدٍ باياديهم وكملنـا بايادينا
ابوفيصل وابومتعب وابوخالد حماة الدين = مزعلهم مزعلنا ومرضيهم مرضينا
لهم فـ ارقابنا بيعه لهم فـ قلوبنا تمكين = عهود جدود وسـط لحود نفنا ماتخلينا
غلاهم من غلا عبدالعزيز وكلهم غالين = وحنا تحت طاعتهم من اولنا لتالينا
من اللي ناصر الدعوه من اللي ورّد الظامين = من اللي وحد الدوله من المينا الى المينا
من اللي حصّن الكعبه وزمزم والحرم تحصين = من اللي طبَق الشرع السماوي فوق اراضينا
من اللي ومّن الحجاج لاجوا للحرم عانين = من اللي ولّف قلوب القبايل قبل ياتينا
هذاك الفذّ اخو نوره حجا المضيوم والمسكين = هذاك اللي بعين العطف والرحمه يراعينا
هذاك اللي عشق نجد وسنينه في بحر عشرين = هذاك سنين حاضرنا هذاك امجاد ماضينا
لفى من شرق يرفع بيرق التوحيد عقب سنين = من افراق ٍ معذبنا وشوق له ٍ معنينا
لفانا يضحك حجاجه وحنا له بعد راجين = وأسس دولة الاسلام وحكًم شرع والينا
تزّعم واشرقت شمسه على القاصين والدانين = تمنيناه منوه لين جانا ماتمنينا
فرحنا ثم عرضنا عرضة ّ صفوا لها الصفين = وشاركنا وباركنا وهنونا وهنينا
ونادانا المنادي رافع ٍ صوته بعلم ٍ زين = وقال الحكم لله ثم لابوتركي ونادينا
حكم فينا بشرع الله وحدّ السيف للجانين = وسمّاها السعوديه وباسماها تسمينا
تحت حكمه بنينا ياعرب بيت الشعر والطين = وتحت حكمه تطهرنا وكبرنا وصلينا
وتحت حكمه توحدنا وبينّا الهدى تبيين = وتحت حكمه ترابطنا حضرنا مع بوادينا
وتحت حكمه تجندنا وصرنا للوطن حامين = وتحت حكمه تعلمنا وعلمنا وربينا
هل الارهاب والتفجير والتكفير ملعونين = خسوا يخسون جند ابليس لامنا ولافينا
هذولا مالهم ذمه هذولا والله الغادين = هذولا مجنن مجنن واجن من المجانينا
اجل وشلون في شهر رمضان بفعلهم ناوين = جوار البيت في مكه وياربي تعافينا
ألا وش ذنب ابو تسعين عام وذنب ابو شهرين = ألا ياكبرها ياعبرها الله لايورينا
عسى الله مايوخذنا بفعل الطغمة الطاغين = وحوش ومجرمين وظالمين ومستبدينا
ينابح كلب لندن ويتعزوى بارد الخدين = زبن عند اليهود وقام يشتمنا ويوذينا
عماُ يعمي عيونه مابقى الا هو غراب البين = اجل هي سايبه يومه على ابن سعود يدعينا
شبح وجه وعمى عين ومرض قلب وكسر رجلين = على من سب دولتنا وحاكمنا واهالينا
انا بدعي وقولوا بعدها ياالسامعين آمين = عسى ربي يطوّل عمر ابونا اللي يذّرينا
عسى الله يحفظه ويديم عزّه خادم البيتين = ابوفيصل تحت حكمه تظللنا وبنينا
ملكنا اللي نماري به ونفخر به وله وافين= معزبنا وقـايدنا وسيدنا وحامينا
ملكنا الوالد القايد ملكنا اللي حمى الثنتين =مجندنا لدين الله ميامين ٍ ميامينا
ملكنا لاتضايق من فعول الزمره الباغين= تطمّن ياولد عبدالعزيز ولاتوصينا
على اليمنى على اليمنى معك والله يمين يمين = ومايلزمك يلزمنا ومايعــنيك يعنينا
ومايزعلك يزعلنا ومايرضيك به راضين= ومايبعدك يـبعدنا ومايدنيك يدنينا
تأسينا باابوبكر وعمر وايضاً بذا النورين = ورفعنا راية الدين الحنيف ولاتونينا
ولانجحد وفا الوافي ولاننسى خطا المخطين = وطيبة ٍ فعايلنا وموجعة ٍ مرامينا
فزعنا للكويت ولانبي لحد ٍ علينا دين = نخانا جابر الأحمد ووفينا وكفّينا
على صدام ردينا الجزا والصاع بالصاعين = وخليناه يلعن كل كلب ٍ وهقه فينا
عليهم دارت الدنيا وراحوا في رحاها طحين = واخونوره بخير وخير اخونوره مغطينا

وجودي على الطيِّب .. وجودي على الأجواد = وجــودي عـلـى الـلـي ضيـفـهـم مايمـلـونـه
وجـودي علـى شـوف السـوانـي وهــن رداد = وجـودي علـى شـوف البعـل يــوم يطـوونـه
وجـودي علـى الشيـلات ومشـاهـد الحـصـاد = وجــودي عـلـى طــرق الهجيـنـي يشيلـونـه
وجـودي علـى شـوف الحيـا والمطـر منقـاد = وجـودي علـى شــوف الـبـدو يــوم يتلـونـه
وجـودي علـى شـوف المروبـع رفيـع عمـاد = وجـودي علـى شـوف المغاتـيـر مــن دونــه
وجــود السجـيـن الـلـي تقـيـد عـلـيـه قـيــاد = فـقـيــر ولا لــــه لابــــةٍ تـقـضــي ديــونـــه
وانــا وأحـمــد الله ماعـلـيَـه مـــن الـحـسـاد = ولاهمـنـي هــرج الـــردي عـمـيـت عـيـونـه
وانا لي مع أهـل الطيـب مصـدر ولـي ميـراد = وأحـب النشامـا وأبخـص الطـيـب وشلـونـه
وأحـــب الـرفـيـق الـلــي يـسـيـر بـلامـيـعـاد = وأحـب الشـجـاع الـلـي خصـومـه يهابـونـه
وأحــب الأصـيـل الـلـي تقـيـد بسـلـم أجــداد = يـهـب الـهــواء ويـــزل مـاحــرك غـصـونـه
ولـــي مـنـهـج مـاغـيــره دام لــــي مـقـعــاد = يشـيـب الـغـراب وطـيـب الـسـاس ماخـونـه
ولا أخـــاوي الا طــيــبٍ يـفـتـخـر بـأمـجــاد = الـيـا ضـاقــت الـدنـيـا بـالأجــواد ينـصـونـه
ولانــيـــب للـمـقـفـيـن تـــابـــع ولاطــــــراد = تــرى طــارد المقفـيـن تـسـري بــه جنـونـه
ولانـيــب لـلــي صـــد عـنــي تـــرى نـشــاد = ولاأخـيـل بـــرق لاح فـــي عـالــي مـزونــه
ومـن زعـل منـي قلـت لـه منـت ابـن شــداد = ولا انـتـه ذيـــاب الـلــي بشـلـفـاه يـطـرونـه
وأنـا ماأرجـي محـمـد ولاخـفـت مــن حـمـاد = ولا قـلـت ويـــن حـمــود يـالـلـي تعـرفـونـه
ولاأخــلــي الــدلــة عــلــى ذمــــة الــبـــراد =وأنـــا أنـقــد عـلــى الـلــي طـبــع الأجــــداد ينسونه
وأنـا مـاأذكـر انــي كـنـت شـاعـر ولاقـصـاد = لـكـن الـزمـن خـلانـي أقـصـد مـــع لـحـونـه
تصبـرت لـي مــدة وأشــوف الصـبـر مـافـاد = وعـزي لـمـن بـيـح شـقـى الـوقـت مكنـونـه
يالـيـت الـزمـان الـلـي مـضـى مــرة يـنـعـاد = يالـيـت الليـالـي تـحـفـظ الـعـهـد وتـصـونـه
أهــل العبـايـر لاطــرى مامـضـى وش عــاد = زمـــان الـسـعـد لافـــارق الـنــاس يبـكـونـه
عسـى الوقـت يصفـي والليالـي تعـود أعيـاد = يطيـب الصويـب ويسعـف القلـب مضنـونـه

ياعل من سب النبي والصحابه= يشوف ماشافوه تبّاعة الفيل
باكر يصب الله عليهم عذابه= ويظلّهم طيرِ مثل طير ابابيل
وتصبح منازلهم هدام وخرابه=ويشفي صدور اهل الصدور المغاليل
اهبوا مربية البقر والكلابه=اهبوا هبيتوا كان ماانتم رجاجيل
شرّابة الوسكي ذبحهم شرابه= حنا دواهم والليالي مقابيل
نبينا دونه اسود الحرابه= مير الخلا يااهل القلوب المهابيل
خان الدنمركي وقرّب ذهابه=ياويله من اهل السيوف المصاقيل
امه تبي تبكي وتنعي شبابه=وعليه عين اخته تبي تسهر الليل
وحياة من نزل علينا كتابه= انّا لها ياقاطعين المواصيل
بقيادة اللي كل مجرم يهابه= العاهل الحلحيل من راس حلحيل
شيخ الشيوخ اللي عزيز جنابه= ابن سعود الوايلي مسرج الخيل
تكفى ياابومتعب نبيها طلابه= نردّها في نحورهم ياملا السيل
نبي نخليهم عشاًَ للذيابه= وحنا هل العادات ذبّاحة الحيل
شعبك يبيها منك ياشيخ ثابه= نقمع بها روس الفتن والاباطيل
الليل والله يحمده من سرى به=وترى الندامه في السهر والتعاليل
وهذا الوطن نبينا في ترابه= وهذا فخرنا ياالقروم المشاكيل
اطهر جسد فـ اطهر ثرى لاغرابه= اليا فزعنا نرهب الجدي وسهيل
فـ قلوبنا محمد وشرعٍ مشى به= حبّه توارثناه جيل بعد جيل
من دونه السيف المذّهب نصابه= ومن دونه ارقاب الرجال المفاتيل

رحت الرياض وجيت يومي تقضيت = وأقول سمح دربنا ياكريمي
يومي تعديت الحسي وارجهنيت = سالي ومتسلي وحالي سليمي
عارض غزال وشتت العقل تشتيت = مزيون متزين وشكله عديمي
نظرني بعينه وأنا مااستعديت = وأصبحت من نظرات عيونه سقيمي
أهملت أنا الطاره وبالزين سجيت = كني على وارد أمريكا غشيمي
عشرين كيلو كل ماأسرعت هديت = وأقفى ولاأخذت الوفاء من غريمي
أشمل وأنا مع مفرق تمير لفيت = مدري من أهل سدير والا قصيمي
مير الوكاد اني بشوفه تسليت = والظاهر ان الزين منا تميمي
يوم التفت لي وابتسم شمعة الليت = ضاعت علومي والسبايب خصيمي
من شوفته لانيب حي ولاميت = جدد حبيب الروح جرحٍ قديمي
عاقل ولكن عقب فرقاه جنيت = ودموع عيني مثل دمع اليتيمي
ماينفع الأدوية لو تداويت = دواي شوفك ياهبوب النسيمي
لو بالتمني يوم شفتك تمنيت = تصير كل الليالي نديمي
لكن ترى ماأخبر أحد فادته ليت = خليتني ياصاحبي مستهيمي
ياصاحبي ودعتك اللي حمى البيت = اللي على أحوال الخلايق عليمي