::|[ ديوان : الشآعر المرحوم مفـرح الظمنــي . ]|::

ياراكب اللي يقطعن المراخيم=هجنن من الفرجه يجيهن خفاخيف
فج العضود محجلات القوايم=وبطونهن مثل السباع المهاريف
لاكن خبط خفوفهن بالحمايم=خبط الغشين اللي سحابه مقانيف
ارخصولهن حبل الرسن بالهمايم=واخذو عليهن يالنشاما غطاريف
تلفون ابن ظمنه قوى العزايم=سواد خيال البكار المشاعيف
عوق الخصيم وستر سود اللثايم=ليا حل في تالي المظاهير تجتعيف
من قو عزمه مايهاب العظايم=يارد ولو قدمه رماتن نواتيف
يشهد بفعله لابسين العمايم=ويشهد له البارود والرمح والسيف
واليا اعتزا بعشواه والحظ قايم=يجمع مواليفن ويفرق مواليف
ترعا به العشوى نبات الوسايم=من وادي الباطن اليا اقصا المشاليف
له رفة يفطر بها كل صايم=تضفي حسانيها على الجار والضيف
ودلال صفرن فيهن الهيل عايم=دايم على جمر المناره مهاديف
ونجرن ليا دنه صحا كل نايم=يطرب لصوته كل من يشرب الكيف
وصحون تعرض للوجيه الحشايم=يرمي بها حيلن شحمها شحم ريف
ردو سلامي يم جال اللوايم=ابو محمد لا حصل له صواديف
واليا نشدكم علموا بالعلايم=قولوا ربوعك ما عليهم تخاليف
ومن بعدها حثو لهن بالولايم=ثم اذكروه بخير ياهل المواجيف

يابدر خلي بالهوي ..شاتني شوت =شوتت لواعيب.. تشاوت اكورها
ما عاد ينفعبه قصيدي..مع الصوت =رايات حبي .. في يدينه كسرها
غديت مثل اللي مع الدرب مبهوت =عينه من الفرقا..تنثر عبرها
عليك يا غرون وحذفني بتابوت =حبه معاليق الضماير سعرها
غر.. وكلامه قوت .. ومقابله قوت =يطرد عن النفس المريضة كدرها
يلعب بقلبي لعبة الربع ..بالكوت =أحد ..ربح فيها ..والآخر خسرها
وجدي لها.. ووجد العواجي على نوت =جته المنيه .. وما شبع من ثمرها

ياموتري شد عزمك دق الساعه = خلي كذب بالوعد والزام قافيني
عزي لمن صاحبه عقب الغلا باعه = زاد الجفا واشترى ناس جديدني
الله يلوم الغضي وش غير اطباعه = وانا احسبنه على الدنيا يصافيني
فيما مضالي يقول السمع والطاعه = واليوم صد وتكبر مايحاكيني
يارجل منتي ورى المقفين تباعه = عيب عللى اللي تبع ناس مقفيني
من لاعرف وين مدخاله ومطلاعه = يصبر على ماجرى بالعسر والليني

بس لاتعاتبني ترى البال مشغول = ماحمل عتابك والليالي طويله
حل الهوى بيننا حل معقول = اما تشيل الحمل والا نشيله
هذا نصيبي عندكم ويش اباقول=ماعاد عندي ياريش العين حيله
هنيت قلب ماتولع بمحمول =ماولعنه ناقضات الجديله
لاسايل عنهن ولا هو بمسوؤل = مايعرف الا مصحفه وتهليله
وانا ذبحني ناعس الطرف مكحول = سنه صغير والوصايف جميله
يلوعني لوع الوحش لابرق الجول = بكر هداده والمراعي مسيله
ويفرني فر اللواعيب للقول = خلا قليبي كورة له عميله

مبدا كلامي سلامي..تحياتي واحترامي.=.عدد براق الظلامي وسط المزون الثقيله
ثاني كلامي نصيحه..لاهل الوجيه السمحيه.=.فيها فوايد مليحه للــي يــمــيــز دلــيله
تمسك يامودماني..واحسب حساب الزماني.=.واطلب من الله الغفراني محيي العظام الهزيله
الاولى كمل افروضك..ابذل جهدك مع ملحوضك.=.صلاتن لله تعوضك عند المولى فضيله
انا اوصيك بالطاعه..ترى دنياك قطاعه.=.تبدل ساعه بساعه لا تحسبنها طويله
بالك تغضب والدينك..ولا تزمجرهم بعينك.=.اصبر وكتف يدينك لو حطوك بمليله
غذوك وكيف تنساهم..تخضع وتطلب رضاهم.=.ولاتدعي بفرقاهم على حساب الحليله
بالك تقرض قفا الغافل..هراجن بالقفى سافل =..خلك عن دربها جافل حيث النمه رذيله
شرور الناس جنبها..ودروب الخير صاحبها.=.اسمع وانشد مجربها فوايدها جميله
والراضه فيها السلامه..والسرعه منها الندامه.=.جنب دروب الملامه واسلم من كل ميله
وهذا ماوصفنا لك..ودبر حالك بحالك.=.عسى درب الهدي فالك والعبد الله وكيله

يوم الخميس اللي مضا صار ما صار=ياما اقشر الفجعات عقب الوناسه
قالوا توفا شيخكم حر الاحرار=ابن قطيم اللي بعيدن مراسه
نايف اليا ركبو على قب الامهار=كم شيخ قومن بالتفق طش راسه
خيال شقحن ربعت عشب الاقفار=ترعا خضاره ثم ترعا يباسه
فكاكها من كل غاصب وغدار=من هيبته ترعا بليا حراسه
دايم على صوب العدا يشعل النار=والقفر لو هو بين الاجناب داسه
واليا غزاهم غارين يطلب الثار=من حر مايونس بقلبه نحاسه
في ربع ساعه بدل الدار بديار=من ظربهم باع الطمع بالفلاسه
راع البويضا يوم سوالدخن ثار=تجنبوه عداه من قو باسه
واليا انتخا بصعيب وصعيب جبار=ياويلكم ياراكبين الفراسه
هذي عوايد شيخنا مابه انكار=شجاعته ماهي شهاده دراسه
والعود عقب له حرارن بالاوكار=فيهم على ضرب المعادي حماسه
تراحيب جعله من طويلين الاعمار=سمي خاله مانقص عن قياسه
وادعو معي ياأجواد يانسل الابرار=في جاه من شيد على الكون ساسه
يالله عساه لجنه الخلد زوار=في جنه الفردوس يضفي لباسه
تمت وصلي الله على خير مختار=شفيع الامه في نهار التعاسه

يالمعلم دخت من كثر الكتابه = حضرتي للدرس من كبر المصايب
دفتر التعليم قلبي ماشقابه = شقوتي في صاحبي ضافي الذوايب
يالمعلم لاتطالبني طلابه = شل قراطيسك وجوز من الطلايب
لاتلوم اللي تعذب في شبابه = عذبه طفل مع البدوان غايب
صاحبي يم النفود اقفت ركابه = حالف لانصاه لو دونه نشايب
لو تشوفه يالمعلم في ثيابه = كان تصبح من جميع الدرس تايب

انا هواي جويدل دلها زين = تلعب وتضحك والمبيسم ذبوحي
حبيتها حب الشرف للشريفين = قلبي عليها مثل ورع شفوحي
ورع يذاود عبرته والدهر شين = البيت خالي والرعايا سروحي
وجدي عليها وجد من حده الدين = قليل مال ولا المدين سموحي
او وجد من جاروا عليه السلاطين = بالسجن مضيوم قليل الشبوحي
او وجد عود واصل عمر تسعين = ماتوا عياله والقريب شحوحي
او وجد عذرى زوجوها مسيكين = تبغى الفراق وكل يومن طموحي
بليت بعفش مايعرف القوانين = وجهه كريه وبالعطايا شحوحي
ياليت عمري ياعرب وقم عشرين = والحق هوى بالي واداوي جروحي
فيما مضى نمشي بروض وبساتين = يرقص لنا غصن الهوى بالمزوحي
واليوم في بيتي كسير الجناحين = عاجز وشيبي في الصوابر يلوحي
امسي بهم ويصبح الهم همين = هم يراودني وهم يروحي
يالله ياغافر ذنوب المصلين = ياواحدن تدري بحالي وتوحي
تغفر ذنوبي يوم عرض الموازين = وانت اللذي لذنوب عبدك دموحي

تعالوا ياهل الشيمات ياللي تفهموني = توحوا للجواب اللي يناسبكم صوابه
انا قبل احسب ان المرجله طرق اللحوني = سوات اللي جمع له مال ماحسب حسابه
لقيت المرجله تمشي على تسعة ركوني = تنادي من يحب الخير في منزل كتابه
الاوله بذلة المعروف باللي يبذلوني = ترى من يبذل المعروف بالطيب لقابه
واقول الثانيه من ضاع دينه طاح دوني = ومات بملة الكفار والله مادرابه
واقول الثالثه والدك والدم الحنوني = توقع لاتقاصيهم وتجعلهم ذيابه
واقول الرابعه عن ضيفكم لاتبخلوني = اليا جاء في محل الجود قولوا مرحبابه
لان الضيف ضيف الله وقدره مايهوني = وبيت العز يالاجواد ماينصك بابه
واقول الخامسه للجار حذرا تغلطوني = ويلزمك احتمال الجار مع كثر الحبابه
واقول السادسه درب النمايم لاتجوني = ترى راعي النمايم مايحوش الا الخيابه
واقول السابعه باللي ومن بك لاتخوني = اليا خنت الامين يحطك الله في عذابه
واقول الثامنه عن كل خايب تبعدوني = ردي المعرفه وسع جنابك عن جنابه
واقول التاسعه لطمة عدوك بالعيوني = اليا منه زما العايل ترى الذله عيابه
نصيحه قلتها من قلب للي يسمعوني = على تسعة ركون وكل ركن قلت مابه