انه سافر مره من الرياض ومعه صديق له اسمه(عبدالعزيز)
وفي ذلك الوقت لم تكن الطرق معبده كما هي الان*
فتعطلت السياره في الوحل وكان يوما ممطرا فتلوثت ملابس
شاعرنا فقال:
:: ₪ :: :: ₪ ::
سفره لعلها يا عزيز ما تعود=بين خزه والخناصر قعدنا ليلتين
موتر مشيه لك الله مثل(---) الذلول=دايم يرجع ورا يا معين الصابرين
ان بغى الجودا رد البنك رده لا يجوز=ان مشى ساعه وقف يا عزيز ساعتين
مع صلاب الحزم يمشي وكنه في نفود=جعلها الله للقرافه وحنا سالمين
البساتم والكرنكات جمله والعمود=جعلهن يخبطن من يسار ومن يمين
ثم اشوفه في عيوني مثل كنب الهنود=واقف تسفي عليه السوافي كل حين
أقبل الليل واكتف النهار واعذاب العيـون مـن السهـر=تنقص الحال والعلة تزيد مابعد صـاح صيـاح النبـات
كل مادار وقتي واستـدار عارضتـي صواديـف الدهـر=يفعل الله بخلقه ما يريد باصروني علـى عمـري فـوات
قاعدن بين نار وبين غار واسهر الليل من سابع شهـر=لو اضلوعي حيد من حديد كان ممـا جـرى متخالفـات
التفت من يميـن ويسـار ماعـن التـرف رداد الخبـر=كلما اصبحت لي صبحٍٍٍن جديد غابت الشمس والعلم الثبات
يوم أقول آه من غير اختيار ضوح خدّه مثل ضوح القمر=ثم عينه مثل عين الفريد مقدر انساه لـو قلبـي حصـاة
صرت في دار والغالي ابدار والدهر صار له بطن وظهر=والقريب اختلف قبل البعيد مقدر ارسل سـلام ولا صـلاة
اتقي بالصغار من الكبار والحذر مـا يفـك مـن القـدر=كان مار جاني العلم الوكيد عندي الموت أخير من الحيات
ان نخيت الرفيق ابدى العذار ما نفعني بحـزات الخطـر=واظهر العز قدام الضديد كـان مابـي جـروح كاميـات
افترقنا ولا ادري ويش صار حان دون الخبر منك البحر=كيف تدله وانا همي شديد يا غناتـي ولا غيـرك غنـاة
شين الانكار عقب القرار ليتنـي فيـك حققـت النظـر=اشهد ان التمني مايفيد ما احسب انك تسـوي هالسـواة
ياناس راعـي المحبـة لا تعذلونـه=ما هوب عن صاحبه داله ولا سالـي
لو يسهر الليـل كلـه لا تلومونـه=الحب بلوى مانيـب أول ولا تالـي
لي صاحبٍ ما قطعت الياس من دونه=لو غاب عني خياله بس يبرى لـي
الصاحب اللي سحر هاروت بعيونـه=ودي بشوفه ولكـن مـا تهيـا لـي
يا هايف الخصر عيني فيك مفتونـه=والبعد يا صاحبي ما يرخص الغالي
الروح يا صاحبي بحماك مرهونـه=عزّي لحالي عقب فرقى هوى بالـي
يا كود وصلك على مثلي ويا هونـه=إن كان حالك طواها اللي طوى حالي
عن غيرك القلب غسلتـه بصابونـه=والعين ماتلتفت في كـل الأزوالـي
ما يجرح القلب كود فراق مضنونـه=ابطيت ما أرسلت لي ياحوت مرسالي
أجر صوت جميع النـاس يوحونـه=وغديت مثل المصيح بالخلا الخالـي
الله اكبر ياحمام من صلاة العصر ناح =وانشغل قلبي معاه لاجزاه الله بخير
الله اكبر يوم ناض طار ورفرف بالجناح=ودي اتبع ساقة الراعبي وازريت اطير
ودي اتبع ساقته بالمقيل وبالمــــراح =شوف عيني بين هاك المباني يستدير
واهنيك بالمــسا ياحمام وبالصـــباح =كل يوم تشاهد الترف ملهوف الضمير
ياحمام الورق قل للغضي سيد المـــلاح=عن ذهابي قل لزين الوصايف يستخير
وصف خده بارق الوسم من منـــشاه لاح=يوم شعشع زاد نور البلد عقب الاخير
والعيون عيون خشف(ن)تربى بالبيـــاح=كل ما هبت نسيم الهبايب يستذير
يامريح القلب قلب المولع ما اتســتراح=تقل يجذب للهوى في سلوك من حرير
اتضيم واتهضم وانا مالي صـلاح =واتقلب طول ليلي مثل وصف الكسير
ياهلي لولا الهوى كان اطنب بالصياح =عقب فرقا الترف ماادري وش الدنيا تصير
كن بعيونه لراع الهوى زرق الرمــاح =هو خطر واللي تولع معه قلبه خطير
يا بعد نوم الليل عن حجـر عينـي = صبر على ما صار من وال الأقـدار
صبرت صبر بـاح منـه الكنينـي = أضحك مع العالم وكني علـى نـار
ما غير أهوجس بين نفسي وبينـي = يعلم بها العلام فـي كـل الأسـرار
تقل اتحـرى لـي علـوم تجينـي = مع الطروش اللي يجيبون الأخبـار
فهمت رأس العلـم مـن كلمتينـي = من يوم قالوا جـا محمـد ونصـار
تكسّـرت عقبـه جرايـد يميـنـي = عز الله اني عقب ما صـار صبّـار
من عقبهـا ونيـت لـي ونتينـي = ونة غريب بالخـلا ضـاع واحتـار
لولا الله أبـرك ثـم قـوة يقينـي = لا طير مثل الطير من كـف صقـار
تخنقنـي العبـره وأفـرّك يدينـي = واحترت مثل مصالي النـار والغـار
علـم يخلـي كـل قاسـي يلينـي = كنه على قلبـي رصـاص أم كـرار
الـى ذكـرت عيالـه المصغرينـي = هــذا يعزيـهـم وهــذاك زوار
احد على جنبه واحـد لـه ونينـي = جتني هموم القلب من كـل الأقطـار
قلت اصبروا والله مـع الصابرينـي = الله يكافيكـم صواديـف الأشـرار
عسى عوضنـا الحـي بالميتينـي = ناصر ونايف ذخرا سـر واجهـار
وأحمد وعبـدالله ذرانـا الحصينـي = صغار سن وان بـدا الـلازم كبـار
يجبر عزاي اللي بخلقـه ضمينـي = محيي العروق الميته عقب الأمطـار
مالي عن المكتوب فـوق الجبينـي = لو رحت شرق وغرب ويمين ويسار
صليت نصف الليـل لـي ركعتينـي = أطلب لـه اللـي للخطيـات غفَّـار
خفف ذنوبه يـا أرحـم الراحمينـي = في ماقفٍ ما ينفعـن فيـه الأعـذار
جعلـه برضوانـك مـن الفايزينـي = بالماقف اللي بـه يضيعـن الافكـار
في ماقفٍ بـه كـل خافـي يبينـي = تمت وصلى الله على سيد الأبـرار
::|[ ديوان الشاعــر الكبيــر / أحمد الناصر الشايع ]|:: 
:: ₪ :: 
