سبتك يالخاز جان الخاز باز/ابالقوايل

سبتك يالخاز جان الخاز بازي= يوم شفت اسرارنا في منتداكم
مفتضح بين الذيابه والجوازي= كشفة الاسرار هي غاية مناكم
المخبا تظهرونه بالنوازي= ولا تخافون الاثر يقفا وراكم
الصحيح تنزلونه والمجازي= والهزل والجد يحضى في رضاكم
انت نباش ومراوغ وانتهازي= ولا بقى الا تدعي انك ملاكم
بس انا لك واقفن لك بارتكازي= لين اجيبك عند مشرفك انتحاكم
هو يجيز افعالكم او ماتجازي= ان حكم والا انتواعد بالمحاكم
وقاضي المستعجله حكمه نجازي= ادّعي وانتم تجيبون ادّعاكم
وبعدها تدرون من بالحق فازي= وتعرفون ابا القوايل لا نواكم
حالفن لظهر عيوبك والمخازي= واطلب التعويض لي من كل حاكم
وادعي بالظلم وابتز ابتزازي= حتى اشوف اديونكم قامت تراكم
وبالغصب حافين تاطون القزازي= وغير كتم انفاسكم يظلم سماكم
لين تطلع لك وتطلع له جوازي= وعن اديار المسلمين اقلع مداكم
او اشوفك بالخلا ترعى المعازي= حايلن للحد يوم ادهر حياكم
تتركون القاع والارض العزازي= والمشاجر والدعث هي مبتغاكم
وكل يومن لك مكانن تقل غازي= متعبن كلب الغنم يلهث وراكم
والموارد مابها بير ارتوازي= تزعبون من الحساوه ورد ماكم
والقرب حمله على العير متوازي= تاردونه بالصباح وفي مساكم
وتنقلون شبوككم هن والخزازي= من شقاكم الغدا يطرد عشاكم
والحمير مدرباتن ماتهازي= الرصاصي شايلن كل امعناكم
وإلا الابيض للقرب والشيل لازي= والخضر مرياع يسلم من غثاكم
وان بغيت السوق تركب تركوازي= تركبونه لو تزورون اقصراكم
ترتكز فوقه وتكشخ تقل بازي= عاسفينه مايخالف عن هواكم
اشهد ان افعالكم افعال نازي= ياهل الخيمه حقيقه وش بلاكم
كلكم يامنتدى الخيمه اعزازي= كيف نسكت للذي يخدش حياكم
وافزعوا واخذو حقوقي بامتيازي= هيه جعل اللاش يالخيمه افداكم
وإلا انا له في قصيدي وارتجازي= وسامحوني بالخطا تكرم لحاكم