مرحوم ياشيخ(ن) له الطيب تذكار= اللى على شعبه يمد العطايا
يومن سمعت العلم فى كل الاخبار= هليت عبراتى بذيك الزوايا
اى والله ابكى شيخنا نسل الاحرار= رمز المحبه مال جابر تهايا
ماهوب انا ابكى غيرى اكبار واصغار= هذاك ابونا مسكنه بالحنايا
جابر ملاذ اللى عليه الزمن جار= قايد سفينتنا عظيم المزايا
يشهد له الشعب الكويتى والاقطار= خيره على بعض الدول له روايا
ياما كسا شعبن فقير(ن) ومحتار= ومن اولن يمشون شبه العرايا
وكم من يتيم(ن) عاش من مده الحار= خله حياته تزدهر بالهدايا
كل(ن) ذكر طيبه وفعله له اذكار= فيه الكرم ثابت وحسن النوايا
ليا عطا لله مداته اكبار= ماكان يرجى من عطاه الدعايا
شيخن يعديك المنايا والاخطار= يوم العدا شنو علينا الخطايا
كافح بجهده يوم صار الذى صار= بالمال والحكمه وزود الوصايا
رد البلد لاهل البلد وافى الاشبار= واعلن صداها فى جميع النحايا
ننعيك ياشيخن لنا والد(ن) بار= ماهى بدينا يوم جتك المنايا
الموت حق ولاعن الموت مفرار= امرن من اللى عالمن بالخفايا
الله يجيره من سنا واهج النار= عساه بالجنه حميد السجايا
تمت وصلى الله على خير الابرار=محمد الهادى شفيع البرايا