يارجل عن دار عبّاد الصنم فضّي = فضّي يرجلي وخلّي فضّتك فضّة
ويا عين عن كلّ عورة غافلٍ غضّي = والاّ ابتليتي وعنك الطرف ماغضّه
ويا نفس عن ما يدنّس شيمتك جضّي = جضّي جضيض افحجٍ حسّ الوَنَسْ جضّه
وحُظّي على من يسدّ النايبة حُظّي = حرٍّ يدورج قصير الريش ويْحُضّه
في ذمّتي ماعلى المقفي دَرَج فَضّي = الاّ على من على شوفي دَرَج فضّه(1)
ويا نفس في ذروة المجد العلا نضّي = نضّة حرار الوقار النضّة النضّة(2)
ومن كلْ مصافح وَصِخْ يدْ يا يدي وضّي = يا مْصافح النجس كفّك نجس قم وضّه
قصر الخنا ما جذبني لونه الفضّي = ما ابغاه لو طرّزوا مبناه بالفضّة
بيوتٍ الاّ بيوت العزّ تنقضّي = لو هي حديدٍ سرع ما تْجيك منقضّة
وليد يا مسندي ما مضّني مضّي = الا زمانٍ يمازح دابه وْرضّه(3)
ومن فعله الوجه مسْوَدٍّ ومبيضّي = وبافعالها الناس مسودّة ومبيضّة
عند اختلاط الزهر حلوٍ ومحْمضّي = تظهر لك التجربة حلوه ومِحْمَضّة
وليد شوفة رفيف البرق معْرِضّي = تعرض بروح عروض اعْراض مِعْرِضّة
ناب الدهر عضّني ثم كضّني كضّي = وقفّى وقفّيت اعضّ المرّ وآكضّه(4)
وقتٍ يبي في مثل (سعن مْحَثَل)خضّي = هيهات ماني قطاة ادناة ما خضّه
وقتٍ بلاظيه قام يْلظّني لظّي = لاظي تلظّى ومن لاظي لظىً لظّه
وقتٍ ليا شضّ شاضي شضوته iiشضّي = اظهر شظو ساق شظو الشظو ما شضّه
روضٍ بدبدب دبا حنّان مكتضّي = قلبً هجوسه تجوسه جوس مكتضّه
وغافل زمانه يِحَسْب (الضوّ) مثل (الضّي) = ما ينبه الاّ وقد ناب الدهر مضّه
وقتٍ ملى بالحصا كفّه يبي رضّي = وبجاه (ألفْ لام ميم) ارضيه وآرضّه
وبأصابعي لو بينفعني كثر عضّي = أكلت كلّ اصْبعٍ من كثر ما آعضّه
حظّي جلس لي على المليان ومْفَضّي = طلقة عمى ساقه أوّل ساقٍ تْفضّه(5)
وليد لو من شكى حظّه يرى حظّي = تحمّد الله مِيَة مرة على حظّه
اصيح وين الذهيب اليابس الغضّي = واثر البحر يابسة و(اليابسة)(غضّة)