اخذقلبـي يالغـضـي والهديةمـاتـرد=وانت ياسيدالهوى هات قلبـك وازهلـه
لاتغرك وقفةالسـاق لـو دونـك صمـد=والله ان الزلزلـة فـي عظامـه منزلـة
من يقول الطرف لا طالعك جـاه الرمـد=والله ياغيـر العمـى مايغـرز بأكحلـه
جيت اغني لك (وعد يا بعد عمري وعد)=ويوم شفتك ارتبكـت وقريـت البسملـة
يابعد روحي وش اللي بقـى منكـم بعـد=ما ذبحنا بآخـره وش نوصـف بأولـه
من تمره وانت لا بـرق ولاانـت برعـد=من يلومه لو تحلحـل عليكـم حلحلـة
من يلومه لو رمى ضافي الثوب وسجـد=او بعد حتى طلع له على الـراس نخلـة
لو تواصيف الحلا فيك يحصيهـا العـدد=كان ابكتب من تهامة الى شعـب جبلـة
من تعامى عن سنـا نوركـم ولا جحـد=كل نجـم بـان يلفـي عليـه ويسألـه
سحر بابل في حناياك صاحي مـا رقـد=سلسلة من سلسلة سلسلة فـي سلسلـة
طب وسط الملعبة طب يـا فـال السعـد=حط بقلـوب الصبايـا سهـوم مرسلـة
كل عين ما تسمـي بإسـم واحـد أحـد=لا تهمـك مثلـك الله خلقـه ويكفـلـه
يرجع الماخوذ لو عنكـم بساعـة يلـد=يمكن انك نجمة الجـدي وانـا بوصلـة
كل حسن غيركم عندي مـا قـام وقعـد=ما جذبني حلو ريقـه ودافـي مخملـة
أنت ايه انت انت يا بوح من قال وقصـد=بالحروف المعجمة والحـروف المهملـة
من يطولك عن مراعاة زولك مـا يصـد=لو تفجر فـي محانـي ضلوعـه قنبلـة
بس لا تزعل اذا قلت لـك ملعـون جـد=عادتي لا شفت حلو الجمال العـن هلـه