الا ياالله ياللي تحت هيبـة سلطنتـــــك اسلمـت = لك المسلم يسبح لك بحمـدك ولـك الاســـلامـي
احمدك واشكرك واثني عليك بما علـي انعمـت = تزودني وفا قـدر العشيـر ووصـــل الارحامـي
ولجك الفجر ياليل الذهول اللي علـي اضلــمـت = بعرضك واقع الماضي بعيني عـرض الافلامـي
ولهتك يالنديم اللي على صافي وفـاك اضرمـت = بصفحة ذكريات العام واللـي مـن ورا العــامـي
بعد تقرير مشوار التجـارب نجحـك واجــــزمـت = بان السيف سيفي والعصا والمحـزم احـزامـي
عطتني عزلة اخلاصي معك نسيان من نادمـت = كتبتك وانطوت صحفي عليك و جفـت اقلامـي
اباهـي لا ابالـي واتبيسـط كــل ماقـــــــدمـت = اشـب النـار قـدام العـرب واشيـد اخيـــــــامـي
نهاري حر شمسه يستحي منها لسـان الشمـت = وليلي ترقب نجومـه ملامـة كـل مـن لامـــــــي
على ضو الكلام اللي كشف عنا ستار الصمـت = عرفت اني تحت برق الامل في روض الاحلامي
احسب انك تيمم با اتجاهـي ويـن مـا يممـــت = واثر ما انت بورايه في الطريق ولانـت قدامـي
مصيبه لاتدنت قيمتك فـي عيـن مـن قيمــــــت = يشوفك بالسهل وانته تشوفه بالسمـا السامـي
كثر ماحن قلبي للونيـس وكثـر مـا درهــمـت = فجر صدري حنيني واتعـب الاقـدام درهـامـي
عيون الصد وعيون التجافي حول مهما اكرمـت = تشـوف المجتهـد كسـلان والبنـاي هـــــدامـي
مدام ان جانبك شام لجنابي وانت عنـي شمـت = كثر خيـرك وانـا مانيـب لاجــــايـع ولاضامـي
اشوف انه علي واجـب ليـا مريتكـــــــم سلمـت = مرور اكرام تربطـه الكرامـه عنـد الاكــــرامـي
على شان الخفوق اللي على عرشه قعدت وقمت = حجب عنك الدجى لين اشرقت لك بيض الايامي
ختام السالفه ياطيب العشـره كرمـت ودمــــت = هذا حقك علي وحق شرهاتـي علـى اوهامـي
مصير الوقت يشرح لك دروسه وان غفلت ونمت = يصحيك الزمان اللي يصحـي كــــل مـن نامـي
تذكرني لامنها خابـت اوهــامـك فمـن وهمـت = وشفت الفرق في حب الخشوم وحـب الاقدامـي