يا مل عيـن ٍ كـدّر البيـن بالهـا=الها ثلاث شهـور ينشـي خيالهـا
تلج بحصـون الضمايـر رعودهـا=وبروقهـا بيـن الحنايـا اشتعالهـا
انهل مغـرب ليـل الاثنيـن وبلهـا=حتى جـرت وديانهـا مـن زلالهـا
ولا كف من خطبٍ دهاهـا غشينهـا=ولاصحى سماها لين جابت حثالهـا
والعين لوتسقى الثرى من دموعهـا=ولو كان تبكي ايامهـا مـع ليالهـا
ما احدٍ على هـل العبايـر يلومهـا=يوم انها تنعى عزيـز ٍ غـدى لهـا
تبكي على مضنونها مثـل غيرهـا=صروف الدهر ماهي عليها لحالهـا
هذي سـوات الله بخلقـه وسنتـه=قدامها جرى لهـم مـا جـرى لهـا
تبكي على رمز الشيم منبـع الكـرم=شهم ٍ يروم من المراجـل جزالهـا
المرجله عذرا ً على نايـف الحجـا=تسبـى عقـول الطيبيـن بجمالهـا
واللاش ولد اللاش ما يشتقـي بهـا=ما يشتقي فـي حبهـا الا رجالهـا
والا الردي ترى الرخامه عشيقتـه=عليه تضفـي شيلـةٍ مـن شيالهـا
لا عجز يصعد للعـلا ينحنـج لهـا=مثـل انحنـاج ام الغـزال لغزالهـا
كوخ الرخامه في اسفل الدرك مرتخي=ومن عجز يرقىا لنايفات ارتخى لها
ومن شام يم المرجله واشتقى بهـا=يحفي سبوته فـي مراقـي جبالهـا
امثـال ابـو سطـام رهيـن حبهـا=اللي بعسرات المراقـي رقـى لهـا
احبهـا مـن صغـر سنـه وحبتـه=ياما استمالـت رغبتـه واستمالهـا
طاعة كريم الوجه غايـة مقاصـده=من صغرته متمسكـا ً فـي حبالهـا
ونفسه عن افعـال الدنايـا يعزهـا=نفس ٍ شريف فعولهـا راس مالهـا
ويمنا ً قصد مرضـاة ربـه بمدهـا=اللي تمـده مـا درت بـه شمالهـا
ويمنا ً كماالهمـال للضيـف كفهـا=ترخص ليال العسر غالـي حلالهـا
له ربعـةٍ للضيـف دايـم مشيـده=ونارٍ مـن الصالـي يقـرب دلالهـا
وحيلٍ على المنسف ينسف عصوبها=والا هرافا ً مـن خزايـز اطفالهـا
الله مـن دنيـا ً اليـا زان وجههـا=لابد ما تلقـح لـو اطـول حيالهـا
النـاس مـا يستبشـرون بلقاحهـا=وتشيّب الاطفـال لاضنـت عيالهـا
دنيا ً يحـل العبـد فيهـا ويرتحـل=لا وصل يومه نوخـت لـه رحالهـا
اللوح فيه الخلق والمـوت والبعـث=كتبت بـه ارزاق البرايـا واجالهـا
نفهم ردى الدنيا ونـدري بقصرهـا=مير البشـر يغرهـا طـول امالهـا
اليا صار ندري ان المخاليق فانيـه=والنـاس والدنيـا قريـب ٍ زوالهـا
ياجب علينا اليوم نصبر ونحتسـب=لحمولهـا مـا يبـرك الا جمالـهـا
صبر على البلوى والايمان بالقضاء=لو كبرت البلـوى يخفـف اثقالهـا
وندعو لابو سطام بالعفو والرضـى=فـي جنـةٍ عليـه دان ٍ ظلالـهـا
ويعوّضه باهـلٍ يعوضـون بالاهـل=وبالـدار دارٍ خيـرٍ منهـا بدالهـا
وسطام واخوانه عوضنـا وذخرنـا=واسود الشرى ما تخّـر الا شبالهـا
شبول ٍ شهدنـا فعلهـا قبـل حلهـا=الكل منهـم رايـة الجـود شالهـا
وصلوا على اللي جا من الله بالهدى=عـداد مـا تـذري ذواري رمالهـا