أنا ما لقيت اللـي يشاركنـي الأحسـاس=من الساحل الشرقي ليا الساحـل الغربي
و من حدها اللي من ورى قصر بن هباس=ليا أقصى الطوال اللي جنوب عن الدربي
ترفع مزاجي عن مزاجات بعـض النـاس=ورفض عقب مسكان الرفـاع يتحدربي
عن المنزل اللي فيه للساقطيـن أونـاس=لـدار المعـزه والعزيـزيـن سافـربي
زراج قفر ما جاه لهـل الـردى عسـاس=و لا دوجت بربوعـة الهيـم والجربي
مزاجي كمـا طيـر ليـا هبلـه نسنـاس=عن أرض المذله في سما العز يشهربي
يحلـق بجـو العـز تحليقـة القرنـاس=عن الشرك يم ديـار الانصـار هاجربي
طمحت لحديث بن عمر هو وبن عبـاس=وهجرت الرياضيات والجمع والضربي
ليا وردو انذال المـلا عقلـت الانجـاس=مزاجي مـع المظمـاه عنهـا يصدربي
لو العز بحـر ٍلالتطـم يغـرق الغطـاس=رسابي مزاجي فـي موانيـه وابحربي
اجنب يميـن عـن المناقيـد و الادنـاس=وخلـي طـريـق ٍللـمـلام يتياسـربي
انا مع طريق اللي لهم فالدجـى نبـراس=هذا دربهـم وانـا علـى دربهـم دربي
اقـص الاثـار المستجـدات والــدراس=تقفيت اثـر وافيـن الاشبـار والثربي
و عن منهج ٍ سارو معه مارغب المنكاس=تسهـل معـه ممشـاري ولا توعـربي
وانا حالفٍ بمكـون الـروح و الانفـاس=ومرسل خيار الخلق من خيـرت العربي
ما تصغ المسامع للمطامع ولا ارخ الراس=ولـو كـان كـل ٍينتقدنـي ويسخـربي
اقاس الظروف وسمعتي كنهـا القرطاس=ولا اطلـب جميـل البوسنه والصربي
وقل ٍتسوده عزت النفس مـا بـه بـاس=ولا خضع يا كود لكاشف الضر والكربي
لو ارخي عزيز النفس لجل الذهب والماس=بقت وصمةٍ لاحـل بـي ذكـر وتذكربي
هذا هو طريقي والبشر والعقول أجناس=وكل ٍ لـه أرا ولـه منهـج ولـه دربي