ودي بمسيارٍ على منقع الجود=شيخٍ ورث مكارمه من جدوده
أجداده اللي يوم طارد ومطرود=بين الجموع الرمح يروون عوده
لا جالنوا المعركة برق ورعود=تعجبهم بروقه وحنت رعوده
اليا اختلط فالجو عجّ وبارود=خيالهم لا هاب جمعه يقوده
تقول منقضٍ من الضلع جلمود=قدامه لفرسانه مثل الطروده
ذادوا عن أحياض القيم والشيم ذود=لين بعثوا مجد العرب من لحوده
في جود جدانه على غيرهم زود=وسعود مجده فالملى بان زوده
عضو الكرم من مولده معه مولود=ودر الفضيلة راضعه من ديوده
من شبّته لين أنه أقبل يجي عود=دون المعالي ما تراخت جهوده
ولا يرخي الهامة مدا البيض والسود=إلا لربه فالركوع وسجوده
الطيب اللي ريح طيبه مع النود=كسا الوطن طيب وتعد أحدوده
طيبه شذاه أزكا شذا من شذا العود=والياسمين أزكا من أزكا وروده
بنيت بيت الدين والجود يا سعود=ذراه خوف الله ودينه عموده
وأن جاك مضهود من الدين ملهود=بعد الشقا يا سعود يلقى سعوده
أقل مداتك ليا جاك مظهود=اسخا سخين بالعطايا تكوده
يا ما عطيت من الونيتات ولقود=ومن شيك بنك ما تعدد نقوده
والبيت عدّ يدهله صدر وورود=تروي بعد ترده وتصدر وروده
وكم من سجين دونه الباب مردود=حبل الرجا به مبهمات عقوده
قضيته وصلت لها درب مسدود=وباتت حياته بالشهور معدوده
اسنين بيدينه ورجلينه قيود=وبوه عود بايحات سدوده
صار الأمل في شوف غاليه مفقود=ما له جدى إلا الدمع محفٍ خدوده
بالجاه أبو خالد بذل فيه مجهود=واطلق بعون الله مكبل قيوده
يرجي ثواب العبد من عند معبود=رب به أمال العباد معقوده
عديت لي شيئن مثبت وما كود=أفعال أبوخالد تزكي شهوده
وتاريخ أبو خالد مثل شامخ الطود=يصعب على راع المدايح صعوده
وسلم عدد ما طاف بالبيت من رود=وعداد ما تذري ذواري نفوده