البارحة يوم ان بعض الملا نام =انا عن المضجع تجافت جنوبي
ابكي مثل غيري على شيخ الإسلام=شيخٍ غلاه مخيمٍ في القلوبي
يا كم بكوه من ايسر الشرق للشام=ومن الشمال اليا جنوب الجنوبي
يوم التلفزيون بث النبا الهام=كثر البكاء في كل حدٍ وصوبي
ولو البكاء يحيي لنا مدح الاقرام =بكيت لين اغرق من الدمع ثوبي
ولو النياحة ما بها ذنب وآثام=عليه شقن العذارا الجيوبي
وعلى وفاة الشيخ نكسنا الاعلام=جميع مسلم في جميع الشعوبي
شيخٍ عن الدنيا وعن ما بها شام =يرجي فضل غافر كبار الدنوبي
نبراس علمه مثل بدر الدجا التام=وفي صالح الإسلام يعمل دؤوبي
ومن يوم جاء عمره ثلاثة عشر عام=لين ان شمسه قربت للغروبي
وهو محفيٍ في مطلب العلم الاقدام=بسبيل دينه للمفواز يجوبي
من منبع الحكمة شبع زاد وايدام=وكم ديد علمٍ في اناه محلوبي
علمه مثل هداج للمضمي اجمام=ما ينقصه نزف الدلي والغروبي
عدٍ غزيرٍ جمه أبيض من الخام=والذ واطهر من درير النصوبي
وبدد سنا علمه حناديس الاظلام =وصحح مسار مضيعين الدروبي
ومن تاه ما بين الحقايق والاوهام=يشوف نورٍ كان عنه محجوبي
وكان اقدحوا في دين الاسلام=الاخصام اللي عليهم في الكتاب مغضوبي
زراقت المسلم والاسلام باسهام=وملصقت فيه التهم والعيوبي
تحيزم لحرب الخبيثين بحزام =ووقف مواقيف البطا والحروبي
لمبارزة عدوان الاسلام مقدام =من دون دين الله حماه مهيوبي
بنص الايات وبالادلة والاحكام =يلجم لسان المفتري والكذوبي
ويلحم ثقوب اسياج الاسلام بالحام =كان الخبيثين احدثوا به ثقوبي
وقف عن الاسلام الالسن والاقلام=والمهتدي غالب ماهوب مغلوبي
ولا كشرت غبر الليالي والايام =وشام الزمان وجاء بوجهٍ شحوبي
بالخير يسعى للارامل والايتام =ويفزع لهم وقت القسا والكروبي
حبرٍ سخيٍ شهم صوام قوام =زاهد ورع عند الجميع محبوبي
غيابك وفرقاك ورحيلك يا الامام =خطبٍ دهانا من كبار الخطوبي
نطلب عسى اللي يستلم بعدك الزام=بعد رحيلك في غيابك ينوبي
و يا الله يا رب الثقيلين علام =السر والعلانية والغيوبي
تجعل يبا الافراج يا مجري الانسام =عليه رحمه كل نسمة هبوبي
يا المرتجى يا ذا الجلال والاكرام =عسى وليك ما يمسه لغوبي
ويلبس ثياب الفوز لبسه للاحرام =ويقيم بين انهار واشجار طوبي
ويبنى له بطوبا مقاصير واخيام =وينعم بملبوس وطعام وشروبي
واثمارها تفتقت عنها الاكمام=وانهار ما يطري عليها النضوبي
يا الله تجمعنا على الحوض قدام =وتجيرنا نهار فور ورسوبي
ونصال نارنٍ بالحجر تضرم اضرام=منها جلاميد الصفايح تذوبي
لاهل الكبائر يومئذٍ والاجرام =ما عن مواقعها مفر وهروبي
للمشركين اللي يعبدون الاصنام =منهم حطبها للوقود محطوبي
يا العبد لاتهيم مع درب من هام =أعرف ترى قدمك نعيم وشبوبي
أسلك طريق أهل السعادة والانعام =ودرب الشقا منت بعليه مغصوبي
وأوصيك في وصل القرابة والأرحام=بعد الفرائض والسنن والوجوبي
وصل وتزك وحج وجهاد وصيام=وجميع ما تعمل عليك محسوبي
وختامها اصلي على سيد الانام=واستغفر الله من ذنوبي واتوبي