ماجور يا طرف غشى الجيب ديمه = بعد النبا اللي في وكالات الاخبار
الخطب فادح والمصيبه عظيمه = منها عقول الشعب تذهل وتحتار
لو كان يورون الجلد والعزيمه = من عظمها عزم الصناديد ينهار
شعب فجيعة عاهله في صميمه = طاريه يظرمها مثل ظرمت النار
يكنها جوف الصدور الكظيمه = واليا التهب فالجوف بركانها ثار
بدمع الأسى والحزن ينعى زعيمه = الوالد المتواضع العادل البار
فهد لتاريخه صروح ضخيمه = من ضخمها لازم تلد لها الانظار
سيسان مبناها مروه وشيمه = وسقوفها الطولات والجود والكار
ونفس ويمنا بالعطايا كريمه = دايم نداها مثل همال الامطار
فهد ليا من الخبر وصل تيمه = وضاعت علوم الغير ردوا له الشار
فالمحفل الدولي لملفاه قيمه = وللمحفل اللي هو يجي فيه مقدار
وان غاب كن الناس لما لميمه = غياب لو كان الملايين حضار
واجه بعهده معضلات جسيمه = ومشاكل تربك فهيمين الابصار
من دارنا كل يبي له غنيمه = ومن كل داويه تحيط بنا الاخطار
ولا حصل الطماع غير الحريمه = سياسته دون العرب حصن واسوار
يسد عنا ما انفتح من خريمه = ودون العقيده راسي مثل سنجار
بشجاعة معها سياسه حكيمه = يعالج بها الاجراح جبار كسار
يكسر بها صم العظام السليمه = ولكسر الامه فالملمات جبار
ولا هوب عجل في مبارز خصيمه = قدام يعطيه النصيحه والانذار
ولا بارز الاخصام يفدح غريمه = منه الخصوم ليا زجر عزمهم خار
وحكم الشرع والسنه المستقيمه = اليا تقدم فامر صاروا له انصار
يوم ارتكب شين النوايا الجريمه = بسياسته صده عن الدار والجار
منه المنافق ذاق مر الهزيمه = واخذ لجيرانه من الخاين الثار
احيا بطولات الجدود القديمه = مثل الحيا اللي يحيي اموات الاشجار
بفضل الكريم اللي علينا نعيمه = في عهده الدار اينعت فيها الاثمار
رحل وذكره والفعايل مقيمه = تبقى شواهد مثل ما تبقى الاثار
جعله مع اصحاب الوجيه الوسيمه = في جنة من حدرها تجر الانهار
وحط الامانه في صدور حميمه = خيّر وحط امانته عند الاخيار
أهل الحساني والمزايا العديمه = عبدالله وسلطان وافين الاشبار
من قسمة الطيب اخذوا اكبر قسيمه = ويشهد لهم بالعدل في كل الاقطار
ياما تبنوا من يتيم ويتيمه = وحسناتهم عمّت على الجار والدار
في عهدهم ماحدٍ شكى من ظليمه = وايمانهم غيث على الشعب مدرار
واخوانهم طب الكبود السقيمه = ويجرعون اضدادهم كاس الامرار
في شعبهم ما يسمعون النميمه = والشعب فيهم ما تسمع للاشوار
ولا يجي بين النديم ونديمه = ولا يلقح حيال الفتن غير الاشرار
وروسٍ تفكر في لقاح العقيمه = ودك تقلم مثل تقليم الاظفار
وأهل المبادي والعقول الفهيمه = يعطون مجنب عن هل النار والغار
ولا البليد يقاد مثل البهيمه = ولا يستفيق الا ليا صار ما صار
وحكم العدل نطلب من الله يديمه = ويحصنه عن كل خاين وغدار