ون بن جــدلان من لايع لاعه = كن في كبــــــدي دوافير صناعي
العب المنكــــوس واحب روباعه = ممن بالوقــت والوقت خداعي
مادريت ان ضحكـة الوقت خداعه = شفت مدخالــي ولا شفت مطلاعي
لابغيت اســج والا انبسط ساعه = دق قلبي من ورى حدب الاضلاعي
كن من بين الضلوع آلة طباعه = تشتغل لا نمت واقـــوم مرتاعي
هم صدري مايفــرق تجماعه = غير جر الصوت والناس هجاعي
فاقدن لــي سلعة واكبر بضاعه = سلعة تشــرى ولا هيب تنباعي
رفقة الطيـــب الا غير اطباعه = اشهد انها كيـــة توجع اوجاعي
راكب اللـي صممه راعي صناعه = جمس بيك اب مـن حديثات الأنواعي
الوحيد اللــي فريد من انواعه = حوض رفــرف مايبي شد واشراعي
لاأنس البنـــزين عجل تفرقاعه = مخطر من سرعته يقلع اقلاعي
لا تحرك شفت فـي الارض مشلاعه = التواير تظهر الماء من القاعي
ينعش القـلب الحزين ابتمهلاعه = لامشى قـام يتمهلع تمهلاعي
لا ضرب بأرض العتش كن تهزاعه = بنت شيـخ طامحه من ولد راعي
في رجا الغـايب ترجا لمرجاعه = تنقد العشـاق وتطق الأصباعي
نفسها من جملة الخلق منصاعه = ماتبي الا واحـد ذكره يشاعي
لانه اللي يكسب الطيب بذراعه = الرفيق الصافي الصامل الواعي
الفخر والطيب ساسه ومنباعه = يـــوم بعض الطيب تقليد وصناعي
فلا لفيته فأخبرونــــــــي عن اوضاعه = وأخبروا راعـي الجمايل عن اوضاعي
وانشده ويش السبايب من اهزاعه = لا علي ناقص ولا بيه فزاعي
ودنا نرضيـه ونحاول اقناعه = كان(ابن مهمل)بعد يسمـع الداعي
كان يبغي الحق للحق قطاعه = نلزمه والحق ماعنه مجزاعي
وكان مبغــض فالرجاجيل بتاعه = لايجي ناقـد ويلحقني ارياعي
للرفيق انخلـي الناس خضاعه = مانوريه الجـفا والتمطاعي
الصداقه عندنا ذخر واطماعه = رفقة ماهـي برفقة تمتاعي
حد جدتها على البرق لماعه = وان خذت يوميـن مفعولها ضاعي
فلا أطرد المقفي الى سفط اشراعه = ماهبل اللي للمقفين تباعي
ان تجمعنا على العز والطاعه = وان تفرقنا فجوج الله اوساعي
ومن يحـط اذنه على كل سماعه = جاه فرقا ماوراها تجماعي
والزباد ختام هرجي ومطلاعه = يرفقه من ريحـة المسك ذعذاعي