ياسعود جينا لك وفاء جينا معزه واحترام = جينا على حسب الاصول السائده بالمجتمع
يالنابغه يالحارثي والنعم مافيها كلام = اقولها لطلق شنب وعيد للي ماسمع
لانك صديقً بالوفاء وافي ولك عندي مقام= الا رفيقً لانخيته سل سيفً يلتمع
وانا على عرف الرجال احرص وكلي اهتمام= والا الردي مالي ورى عرفه ولاشوفه طمع
وان كانها جتنا كذا من شخص جاهل مايلام= افضل الأصلاح دايم واكره اسلوب القمع
الا اليا منه تمادى قلت ياجاهل سلام= تعال جاء وقت الحساب اللحين نجمعهن جمع
والمرجله ماهي تمني لاحرام ولا حرام= ولا ينطح الشدات رجلاً يكتسي عينه دمع
ويالنابغه يالحارثي والنعم مافيها كلام= اقولها لطلق شنب واعيد للي ماسمع

يا ناصر الحربي هلا عداد زوار المقام=اللي تزوره في صلاة العيد وأيام الجمع
والمجد له قمه وله يا مسندي ذروة سنام=وأنته كسبت الاوله بالغصب ماجاتك رمع
فارس على صهوة جواد الشعر وتشيل الحسام=واللي تجذم مايشيل السيف ويدينه زمع
اكبر دليل أنك عميد المفرده نلت الوسام=من الشموخ .. وكلنا في حظرتك شوف وسمع
ابشر بعزك والرضا والحق وافي بالتمام=أمد لك كفي وفا واشعل لك بيوتي شمع
واللي حصل من خبل لايزعج ولايحمل خصام=لاتلتفت لاهل العلوم العور والاريا الصمع
طبع الكرام اليا حصل غلطه من أبناء اللئام =تعرض عن الرديان والغلطان يجحر ويخمع
وياناصر الحربي هلا عداد زوار المقام=اللي تزوره في صلاة العيد وأيام الجمع