تغطلس حاكم القطبين بين المارد وعفريت=حكم له شيخ له في كل قطب صروح مبنيه
غزاهم في ظلامٍ والسبب من ولعةٍ في ليت=ركب من فوق سبعينٍ على الالفين مع ميه
ثمان سنين ياناصر تجرع سم مع حلتيت=طحن له حبةٍ زرقا بجوف الداب والحيه
تغشّاه العرق بارد ولاهو حي لاهو ميت=وقف له من تميم الفين جنيٍ وجنيه
قراله نوتةٍ من نوت وقالت نوت ليت وليت=ليامنك كشفت ارقامها تقطع بجنبيه
وانا من قبلها في زاد مسلم قالط وسميت=وقبل الزاد فنجالٍ قدوعه حالي شويه
الا يانوت شفت الموت فوق الضلع باني بيت=وحدر الضلع ياناصر ثمان الاف عفريه
يسرحها يضويها مع الوادي ليا مريت=رفع رايه على جبال اليمن ماهي يمانيه
وانا لولا جذبني نور في نورٍ ترى ما اضويت=على وادي سماه بليل من غيمه صحاويه
اناظر في قدم رجلي على هوني ولازليت=ولاحت لي بيارق سود شرقٍ مع شماليه
سمعت الصوت يزهمني وانا في يمته ناديت=ورد الصوت من غربٍ وناداني جنوبيه
لقيت العبد الادريسي ينادي ياهلا حييت=على ضلعٍ تراجف فيه ديّه عقبها ديّه
تلقيته بوجهٍ منه مرتاحٍ ولا صديت=ولكن كل مخلوقٍ ابه حسنه وابه سيه
دخلت لمجلسٍ عامر وحاكم راعيٍ به هيت=عليه الشامه السودا براس المتن ماريه
انا سويت وش سويت لو سويت ماسويت=وجتني نوت بكتابٍ عرفت العلم تاليّه
على ناصر ولد فارس تراك اخطيت ثم اخطيت=الك نيه وله نيه وانا يانوت لي نيه
تهلي بك ثلاث الاف لامن رحت ولامن جيت=على جبال الجزيره للصدى روحاتٍ وجيه
ولكن ناصر لحاله يسريها وانا سريّت=ثلاث الاف عفريتٍ على وضحا عمانيه
اسل السيف الاجرد واحسب اللي فيه كم ادميت=قلوبٍ سود في بشرة حماره بنت شاميه
ملوك الجن بالمغرب معك وترد لي لاامسيت=تفرعّن حاكم الوادي بقاصيه ودانيه
تكفيت العنا ما بك قصورٍ في عناك اكفيت=تعلمت الصبر من وقت قاسي ماش حنيّه
تفرعن ناصر بشعره كسب له سمعةٍ مع صيت=اقوله والكلام لنوت ياخيٍ مدح خيّه
وواريته ثرى من قبلها تكبيره وصليت=بقى قبره اثر من فوق ضلع ونوت تحتيه
شهدتي له وانا شاهد ولوني بامدحه ما اوفيت=ابوفارس لحق عهد الزناتي والهلاليه
تزوبع زوبعه والروس الاربع قرنها خرتيت=جنوبيه شماليه وشرقيه وغربيه
على ميمون ماطافت علوم وفاالامور اخفيت=جرى دمه بعرق وكبده من الغل مرويّه
ابوديباجه ان حاشك بسوط مشّوكٍ غنيت=صدى صوته وصلني لو يجره فالسعوديه
شطائيلٍ مع شيخٍ كبيرن لا وصلك اغفيت=ولامن مات شيخه ماكفاه الفين مرثيه
تناسينا ولا ننسى على برقان كان الفيت=تبي تضحك على العالم مع هاذي وهاذيه
ملوك الجن جنّت من عقل صاحي ولا جنيّت=وتبقى الحبه الزرقا عن الحساد مخفيّه
نهايتها ياناصر اسلم وسلّم ليا رديت=عرفت العلم من نوت الرزينه والهواويه

على قبر اليتيمه نـوت ثوبـي بالخـلا شقّيـت = ذكرت الله وشبّت في ضلوعـي حـربٍ أهليّـة
عقب وِتْر السبع والخمس والتسبيح والتسميـت = طيور الما على سلمـى تغنّـي (طـاق طاقيّـة)
على باقي عرَق ساقي زجاجـة كاهـنٍ شمّيـت = على قِرْنـة حجاجـه نجمـة السِبْـط اليهوديّـة
على الجنب التهامي لبّسوني خرقةٍ فـي زيـت = تلالى مثل واري جمرةٍ فـي حـوض صفريّـة
على ساقة ملوكٍ من بـلاد الرافديـن أضحيـت = أركّب سـنّ واقلـع سـنّ لـو مالـه ولا ليّـه
وفي ريشة جناحٍ من حمام الأخشبيـن ادويـت = امّذْرِع شان واقـرع شـنّ وآبرقـع نصيريّـة
وعلى ظهر النعامة سافروا بي سبعةٍ من هيـت = إلى أعتى شعـوب الأرض الادنيّـه والاقصيّـة
ذبحت العبد الادريسي ونِجْـل الطاغية:حِبْرِيـت = بأرض المغرب الأقصى طبخت من اللحـم نيّـة
على تابوت نوت احيا واموت افنيت ما ابقيـت = ضربت الطار واجتاحـت عبيـد الـزار كونيّـة
على قبر اليتيمة نوت أجدّد حسرتـي لا جيـت = وأقبّـل ضاحكـات المـوت تحتيّـة وفوقـيّـة
على شانك ينوت اعميت خطلان البشوت اعميت = أقـارع كـل ذو سِـدْنٍ وذو خِـدْنٍ وكوفـيّـة
على شانك ينوت ادميت روس الخاينين ادميـت = أسرّج مِـرْج أمـرّج سِـرْج علويّـة وسفليّـة
على شانك ينوت اضرب بحدّ مْصقّـلٍ إصليـت = وكدنـا ننتهـي لـولا خيانـة عيـد الألفـيّـة
خبيثٍ من بني قومي سقاني حامـض الكبريـت = قرَت وسطه عجوزٍ من ذوي حضـرم ظفاريّـة
وبسم اللي لهول اسمه تزلزل منبـر السوفيـت = نحَرهـا اعلـى ظهرهـا جُبّـةٍ بالسـمّ مطليّـة
ثلاث دهور اصارع نافثات الـزرو مـا ذلّيـت = أغيّب شمس وادفن رمْـس والأصنـام مرميّـة
ثلاث ازمان أداقش مسرجات الجانّ في تكريـت = ثلاث ازمان تمْرخ لـي ملـوك الجـانّ رجليّـة
ثلاث سنين اعافـر نافخـات الطيـن ماولّيـت = ثـلاث سنيـن أكفّـن قاريـات التيـن بيديّـه
وثلاث شهور ألاعي نازلات الطور مـا ملّيـت = اجاوب جنب خيمـة ضاربـات الطنـب طبليّـة
وثلاث ايّام تنعاني سرايـا يـام ليـن اصغيـت = أقدّم كـوع اوخّـر كـوع يـا بيّـي ويـا بيّـه
لذي الفيروز سادن معبـد النيـروز مـا لبّيـت = لغير الواحـد المعبـود مـا أبديـت مـا فيّـه
بوادي برْك طارت بي حراير تُرْك يوم امسيـت = أعاشر ليـل عاشـر كـل ذي حمـراً نميريّـة
طباين سبْك تدبْك دبّك ساع اقبلت ساع اقفيـت = لسرْدٍ شـرْد جـرْد مـرْد اصيّـح كـل قيسيّـة
ببطن القِرْش اعشّي حايمات العـرش ماغدّيـت = وحرْش الطرْش اورّدها قليب الهرش عصريّـة
بوجه الحوت جلّ اللي خلقنـي ضيغـمٌ صنتيـت = هِزَبْرٍ مـا تحـرّك منـه ساكـن ألـف سكنيّـة
ورب البيت ما خلّيت منهـم بيـت مـا هدّيـت = أهـدّم دور وابـنـي دور والآيــات متلـيّـة
هل المزمـار عبّـادة لسـان النـار والباكيـت = بني الإفْرَنْج قـومٌ مـن فـروج الزنْـج مبليّـة
بكى سابور ذو الأكتاف في قصر الملك بلْهيـت = على نَيْكـل سقيفـة عابـد الهيكـل ضحاويّـة
تغطرس بِطرس النقرس وجينا له على التوقيت = من ارض الفرس وارض الروم جبنا القوم منهيّة
بعمّا والنبا والخمس من سـورة سبـأ شدّيـت = بقوّة مـا تواتـر فـي الليـال العشْـر مكيّـة
أقمنا دولـة الأيتـام مـن حِلّـي إلـى حِلّيـت = وآخـر عهدنـا مـا أورَدَتْ ليلـى الأخيلـيّـة
وانا ما هاضني فيما على بيض الورَق خطّيـت = شجـاعٍ لقّبـوه :أحمد.ولـه شلفـا وشبـريّـة
أعرف أحمد إلى جاء جاء وانا لا شلت ماحطّيت = تحامينا علـى وضـح النقـا والأرض محميّـة